PHUNGTANGBYA 28 - Zotung Bible 2016

¹ Ccungccaw hoyleipaw tuh hum nynh san a dee khyh zemah a ccue, thuasalama miding tuh chindeih hawte a rawthung.

² Ram kya doukunaw he a um vae ze uktu patae a langkuh. thuasalama ahawpaw uktu liate ram tuh atyn.

³ Ryachi hae kha a tuaa a sah hae paw uktu tuh looh marya a rohpaw khuaaratui te nynh aloku.

⁴ Upadi a zui leipaw nynh ccungccaw hoyleipaw kha the a hoysah, thuasalama upadi a zuipaw nynh tuh ccungccaw hoyleipaw kha a rawse.

⁵ Ccungccaw hoyleipaw nynh byading kha thaethya khyh, thuasalama Bawipaw a ccung hae paw nynh tuh byading kha phe ccing lan a thaethya hae.

⁶ Dingnaw laanpi a zuipaw ryachipaw tuh, a hoirum zemah a thyaruhpaw laeze ahoyhua.

⁷ Phungbya a zuipaw tuh ahawpaw ccaaw nynh thua, a zu-ae hae paw ryte a mungkuh hae paw tuh a nung te a paaw kha maethya a law hae.

⁸ Ato pataepi lawkute a hoirumnaw a kaethung sakuhpaw tuh ryachi hae kha thaw a ccihpaw ccungccaw hanlan a ccakhungpahpaw nynh thua.

⁹ Phungbya kha a ngae ry khyh zetuh, a sawsangnaw kha mah anungsikuhpaw nynh thua.

¹⁰ Miding hae kha ahoy leipaw laanpi lang a cciakhaesei hae paw tuh amaw nynh a thaepaw hunghua lungkhu langkhe a ccah cih, thuasalama ccaenaw um lei hae paw tuh hoynaw kha rho lang a ccou cih hae.

¹¹ Mihoipaw nynh tuh ka haw cite a tuaku, thuasalama a nyhthyapaw ryachipaw nynh tuh tuh-e paw kha akaw-aleih a ny.

¹² Miding hae nynh taenaw a mue hae ze, myarya lepaw phu-enaw a um, thuasalama ccungccaw hoylei hae paw nynh a hangku hae ze, ccungccaw hae nynh a retawku hae.

¹³ A cyiseimenaw kha a pheipaw tuh a laan a sui ua lan khyh, thuasalama a seinaw kha phykuh zah a vuapaw tuh thawccinaw a mue cih.

¹⁴ Bawipaw raw a rih zungzaepaw tuh lungtuapaw nynh thua, thuasalama a thinlung a khungsakuhpaw tuh vawsawnaw lungkhu lang a ccah cih.

¹⁵ Ryachi hae kha a uktupaw bawi hoyleipaw tuh a siapaw chindeih khyhze a khiavuikuhpaw vong te nynh aloku.

¹⁶ Nythyanaw a hoi leipaw uktu bawi tuh myaryamaw are-aropaw nynh thua; thuasalama ahme lei lante muenaw kha a huapaw tuh a hiinshe sae cih.

¹⁷ Ccungccaw hiinnaw kha a tuaa a sahpaw tuh hunghua lungkhu lang cia a ccue cih, humhung nynh mah bawm nan sah.

¹⁸ Dingnaw laanpi a zuipaw tuh a khyn cih, thuasalama ahme leipaw laanpi a zuipaw tuh hunghua lungkhu lang a ccah cih.

¹⁹ Loo a phokuhpaw tuh looh patae a hoi cih, thuasalama accakaepaw kha a deehuipaw tuh a ryachi myarya ccih cih.

²⁰ A lungzipaw ccungccaw tuh hythuanaw patae a mue cih, thuasalama arangte hoirum a rypaw tuh detahnaw mue leite um lan khyh.

²¹ Mirymihua tuanaw tuh hoy khyh— tuhzemah ccungccaw tuh sanlou phe kheit hanlan hoyleinaw kha a rae kho.

²² A karankuhpaw tuh hoirum khylan rangsakuh zah, ryachinaw nynh a thuanua lanpaw kha nyh khyh.

²³ A lae te ccungccaw a poothyapaw laeze, a seinaw phypyate a pepaw ccungccaw tuh nyalangte maehoynaw kha houh a mue cih.

²⁴ “Seinaw thua khyh,” cite a nung khyhze a paaw kha uccaw hankhakheit a luadepaw tuh damiahpaw te a mungkuh hae paw nynh thua.

²⁵ A karankuhpaw nynh pekunaw kha a puisah, thuasalama Bawipaw a doliakuhpaw tuh a hoirum cih.

²⁶ Amaw tuanaw kha a doliakuhpaw tuh mingaee nynh thua; thuasalama hawnaw laanpi a zuipaw tuh a khyn cih.

²⁷ Ryachi hae kha a pyapaw tuh ahobounaw um lan khyh, thuasalama a mit a masipaw tuh thyalawnaw patae a mue cih.

²⁸ Ccungccaw hoylei hae paw nynh a hangku hae ze ccungccaw hae nynh a retawku hae; thuasalama minmin he a ro vae hae ze, miding hae tuh a hangkuh thung hae.