PHUNGTANGBYA 27 - Zotung Bible 2016

¹ Awkhualan kong hanlan pookuh nan, pawccecize tuh-e nin nynh pawmou yn thuakhae cih cipaw na nyh khyh.

² Namaw khalang te pooku leite milae nynh ae poo hae sah, namaw mung te pooku leite khycce hae nynh ae poo hae sah.

³ Lung te laesia tuh ari hae, thuasalama mingaee nynh yn thuakhaepaw thinrianaw tuh tuh-e phuin ning hae laeze arihua.

⁴ Bungpawnaw tuh rysawthyanaw thua zah, thinrianaw tuh lungmohnaw nynh thua, thuasalama eiungnaw tuh hum nynh mou a taening kho cih?

⁵ Phe alangkuh lante a seinaw phypyate thuiheipaw tuh aphirute sungsahpaw laeze ahoyhua.

⁶ Ruiban hoypaw nynh vaemaw ae muesah zemah, sungsahnaw phang ae hoi, thuasalama na rhawpaw nynh ae myngpaw kha tuh ae lingpaw nynh thua.

⁷ A byn vae paw nynh tuh khoitui kha heize ry vae khyh, thuasalama a kanmawpaw hanlan tuh akhahpaw kha heize phe a e.

⁸ A inn kyate a khiavuikuhpaw ccungccaw tuh a bu kyate a khiavuikuhpaw pavaw te nynh aloku.

⁹ Zimuin te amynkhuhpaw nynh lung a tuasah, thuasalama vawsawnaw nynh tuh thinlung kha a koisah.

¹⁰ Na ruiban thuasah, na paaw ruiban thuasah la vua nan; vawsaw na tung lyakhe na puizia inn lang la cceih nan; Anaenaw umpaw innpaw tuh asawnaw umpaw puizia laeze ahoyhua.

¹¹ Ka ccaaw, hawsakuh lah ka lung yn tuasah tua, tuhteze nynh yn theihrya hae paw kha bya ka khung kho cih hae.

¹² Mihawpaw nynh tuh vawsawnaw kha muih zah a retawku; thuasalama tuanaw a zyapaw nynh tuh ccianua zah, tuh-e vawsawnaw tuh a teing.

¹³ Nyku leipaw ccungccaw hanlan aamah a khanpakuhpaw kya-e boeining kha la lawkuh, Ramccang ccungccaw hanlan aamahkhan lante a ponpaw uccaw kha la kyngpah.

¹⁴ Awkhua takaw te tho zah a innpaw kha roi myarya ccae lante hythua a pyapaw tuh, thyalawnaw a raetupaw lang ria athua cih.

¹⁵ Accohkuh thyapaw zu tuh khuaane nin ze pharyphary po arahpaw khuaa te nynh aloku;

¹⁶ tuh-e nopi kha phang kheepaw tuh khivae kheepaw te nynh aloku, tuhkhyhze ranglang kuihphe te chitui phang huupaw te nynh aloku.

¹⁷ Sivaw nynh sivaw kha a hesah, ccungccaw nynh ccangpaw ccungccaw hawnaw kha a hesah.

¹⁸ Thaeku ku kha a do-oihpaw tuh a thae kha a ae cih, a bawipaw kha a do-oihpaw tuh minhoynaw a mue cih.

¹⁹ Tui lungkhu khe na maee na muihku hawte, pawcihawpaw ccungccaw mou athua cipaw kha a thinlung nynh a langsah.

²⁰ Michi khua te Abaddon ram tuh a lungryccing khyh hawte, ccungccaw mit tuh a lungryccing boi khyh.

²¹ Sui te ngun tuh maee te syntawtua athua, tuhawte ccungccaw tuh thehoynaw a ccoupaw khate syntawtua athua.

²² Mingaee kha looh ryte sung kyakhe sungkae te phongde athua zemah, a ngaeenaw tuh amaw kyate phiakuh lan khyh.

²³ Na tuuphu konglang kha hoyte nyh lah, na vaetua phu kha hoyte pekitua;

²⁴ pawccecize hoirumnaw tuh zungzae tyn khyh, siapharan lukhung mah she takyh hanlan tyn khyh.

²⁵ Lonua tuh zo zah kinno thawpaw yn ccue, te mua vawlan e lonua hae tuh suelua he athua te,

²⁶ tuutaw nynh na boeining kha ae rin cih zah, miaa hae nynh na laephi mee kha ae rin cih;

²⁷ na looh lang thuasah, na innbyn looh lang thuasah, te na seenung hae looh lang thuasah miaa mateitui tuh phe azaw cih.