PHUNGTANGBYA 22 - Zotung Bible 2016

¹ Hoirumnaw patae laeze minhoynaw kha poku lanpaw nynh thua, maehoynaw tuh sui te ngun laeze ahoyhua.

² A hoirumpaw te a ryachipaw tuh a laenaw hae um khyh: Bawipaw tuh tuh-e hae balyn a raetupaw nynh thua.

³ Mihawpaw nynh vawsawnaw kha muih zah a retawku; thuasalama tuanaw a zyapaw nynh tuh po cceih zah, tuh-e vawsawnaw kha a teing.

⁴ Zakawsangsahkunaw te Bawipaw rawrinaw hanlan muepaw lasung tuh hoirumnaw, sawtuanaw te hiinnaw nynh thua.

⁵ Ccungccaw hoyleipaw laanpi kya tuh hinpaw te kaang a um hae; a raeringkuhpaw nynh tuh tuh-e hae kyate a sihaeku.

⁶ Imua nynh a zui lanpaw laan dingpaw kha ccangpah lah, he yn piccan te, tuin kyate cceihsei vae lan khyh.

⁷ Mihoipaw nynh ryachipaw kha a uk, a koiitupaw tuh a koiisakuhtupaw see nynh thua.

⁸ Ahme leipaw ccacii a vuapaw tuh vawsawnaw looh kha a rue cih, a thinrianaw ccungngue tuh amaw tungvaw accah cih.

⁹ Hysahnaw thinlung hoi hae paw tuh hythuapya athua cih hae, pawccecize mih looh kha ryachi hae a neethung hae.

¹⁰ Ccungccaw a saryapaw kha po dee lah, byalungnaw mah a toikuh cih; pekunaw te theihryanaw mah adae cih.

¹¹ Athyaapaw thinlung kha ry zah a byaho a-epaw tuh siapharan kha a ruiban lang a hoi cih.

¹² Bawipaw mit nynh nynaw kha phang a rin, thuasalama a hynhupaw bya kha tuh a vua.

¹³ Thawnawpaw nynh, “Inn atolang chindeih a um! laanpi kya yn teisei cih!” a ci.

¹⁴ Nopi hoyleipaw khalang tuh akhupaw hunghua nynh thua; Bawipaw nynh a thinrianuapaw ccungccaw tuh tuh-e hunghua lungkhu lang a ccah cih.

¹⁵ Imuapaw thinlung kyakhe ngaeenaw tuh phang a um, thuasalama thuiheinawpaw ccungngue nynh tuh-e ngaeenaw kha ccaring a dee.

¹⁶ Amaw hoirum khylan a ryachipaw kha a tuaa a sahpaw te mihoipaw kha a pyapaw tuh solei a ryachi cih.

Hawnaw Bya hae

¹⁷ Hawnaw bya: Na nakaring kha tuakuh lah, a haw hae paw bya kha ngaetua, te na thinlung kha ka ccangpyanaw kalan hin pyaku tua;

¹⁸ pawccecize khah-e hae kha na lungkhu kya na ccykeku ze lungtuanaw a um cih, na mung kyakhe mah phe a um vae cih.

¹⁹ Bawipaw kha na doliaku nawlan, atunin hynh-e bya hae hynh kae ccangpya.

²⁰ Hawnaw te tuanaw pyakunaw bya sung thum hynh na hanlan phe ka zei vae khaw?

²¹ Tuh-e bya hae tuh nang ae sawtupaw kalan khe akyhpaw bya te na khung kho nawlan hae, adingpaw te akyhpaw langsaku nawlan nynh thua.

²² Ryachi hae kha mih rya a chi keiccuze luade nan hae, Riathae hae paw kha koikua lungkhu kya vawsaw pya nan hae;

²³ pawccecize Bawipaw nynh mih bya kha a pankhae cih hae zah mih uccaw a luatu hae paw kya-e hiinnaw kha a luaru cih hae.

²⁴ Thinria a mangpaw te ruiban lang la tang nan oh, a thindynpaw te la mungkuh nan oh,

²⁵ a laanpi kha na zuisei cih zah, namaw te namaw kaang na kaesakuh sei cih.

²⁶ Milae laebah hanlan aamahkhanpyaku lan bya la kinpakuh bua nan.

²⁷ Pya lanpaw na hoi khyh zetuh, na ikhung kha ae lawpah cih hae.

²⁸ Na minpaaw hae nynh la bing hae paw langmawlya e syntawnaw lungbing kha la nue nan.

²⁹ Amaw ryalaw kya athyapaw ccungccaw na muih tou? aning tuh ccungccaw huataw hanlan ryalawpya leite siapharan hanlan rya a lawpah cih.