PHUNGTANGBYA 21 - Zotung Bible 2016

¹ Siapharan thinlung tuh Bawipaw kuih kya umpaw vadungtui hawte thua zah, Bawipaw nynh a rynaw miakaw langkhe a mae.

² Ccungccaw nynh tuh a cyipaw balyn kha akyh cite a muih, thuasalama Bawipaw nynh tuh thinlung kha akhin a sae.

³ Silawnaw rae laeze dingnaw te byading rae kha Bawipaw nynh a ccou ryhua.

⁴ Lysakunaw mitdae te tansakunaw thinlung, ccungccaw hoyleipaw kya-e maeekhua tuh seinaw nynh thua.

⁵ Azuakuhpaw ccungccaw paccynkunaw nynh hoirumnaw kha a thuakhae cih, thuasalama rangkhirangkhaete a cyihpaw miakaw tuh ryachinaw a tung ccaccing cih.

⁶ Hynhute muepaw sisua tuh akhuhthungpaw tuihu hawte thua zah chinaw kaang nynh thua.

⁷ Ccungccaw hoylei hae paw tuh mih puathonaw nynh mimaw kha a roh cih hae, pawccecize ahmepaw kha cyih ry khyh hae.

⁸ A seipaw ccungccaw laanpi tuh akou, thuasalama athyaapaw ccungccaw cyisahnaw tuh akyh.

⁹ A ccohkuh thyapaw zu ryte inn lungkhu kya umlae tuh innccukaly apaki lang umpaw tuh ahoyhua.

¹⁰ Ccungccaw hoyleipaw thinlung nynh tuh hoyleinaw kha a ry; a innpaw hae tungvaw thawccinaw hoi khyh.

¹¹ Ccungccaw a saryapaw nynh detahnaw he a ing te, tuanaw a zyapaw tuh hawnaw houh a mue; a hawpaw kha thuihei lanze, hawnaw houh a mue.

¹² A dingpaw nynh ccungccaw hoyleipaw inn kya a cyihkuhpaw kha hoyte a ny; ccungccaw hoyleipaw kha ronaw kalan a sawbung.

¹³ Ryachipaw nynh a siaruapaw kha na nakaring na hutawku zetuh, namaw he na sia te, hum nynh sanmah ae thaepah lan khyh.

¹⁴ Aruh lante pyapaw lasung nynh thinrianaw kha daesah zah, boei kaw te zya ccyngpaw pyaruh nynh myarya thinrianaw kha a daesah.

¹⁵ Ahmete byapia athua zetuh, miding hae elang lungtuanaw nynh thua, thuasalama hoyleinaw a rae hae paw hanlan lungronaw nynh thua.

¹⁶ Nythyanaw laanpi kyate a vaevuipaw tuh a chih hae paw phu kya a um cih hae.

¹⁷ Hoysahnaw a rypaw tuh a ryachi cih; misutui te chitui a rypaw tuh hoirum lan khyh.

¹⁸ Ccungccaw hoyleipaw tuh midingpaw hanlan shawkhawnawpaw thua zah, a lungzi leipaw tuh midingpaw hanlan shawkhawnawpaw nynh thua.

¹⁹ A ccohkuhpaw te peku a rypaw zu ryte umkheih lae tuh laesia ram kya um ze a hoyhua.

²⁰ Mihawpaw inn kya tuh aphutepaw sisua te chitui a um, thuasalama mingaeepaw nynh tuh tuh-e sisua tuh phe a thangsah han.

²¹ Dingnaw te thawccinaw kha a ccungpaw tuh hiinnaw te sawtuanaw kha a mue cih.

²² Ahawpaw ccungccaw nynh tuh rhawkaw hae khuapi kha ccianua thung zah khuaccaaw hae nynh a doliakuh hae paw sihkakinpaw rhawhohung kha phe a ro kho.

²³ A mung te a lae a sungkuhpaw tuh vawsawnaw kha a sihaekuhpaw nynh thua.

²⁴ A lysakuhpaw, a tansakuhpaw te ccungccaw pawlangria leipaw tuh a min kha, “Saryatupaw,” a ci hae.

²⁵ A thawnawpaw tuh rya a law ry khyh keiccuze myarya a ryduaanaw nynh amaw kha a chisah kho.

²⁶ Ccungccaw hoyleipaw tuh ninlang a rynaw ale, thuasalama miding nynh tuh sithya leite a pya hae.

²⁷ Ccungccaw hoyleipaw nynh silawnaw a raepaw tuh anungsikuhpaw nynh thua; ahoy leipaw paccynnaw te yn ccyng zetuh hohcihmou houh anungsiku?

²⁸ Akyh leipaw ccaekia tuh a roh cih, thuasalama hoyte a ngaepahtupaw nynh tuh hmerarih lan ccaekia a khan cih.

²⁹ Ccungccaw hoyleipaw nynh tuh a rawthungpaw mitmae khate a umsaku, thuasalama miding nynh tuh a laanpi kha a paccynku.

³⁰ Bawipaw malang tuh hawnaw, nynaw te tuanaw pyakunaw hynh alakawpaw nynh thua.

³¹ Rhawtuknaw nin hanlan marang kha paccyn athua vae, thuasalama taenaw tuh Bawipaw kya-e nynh thua.