PHUNGTANGBYA 20 - Zotung Bible 2016

¹ Misutui tuh saryanaw a thuakhaepaw thua zah, aruikuhpaw niapaw tuh pekunaw nynh thua, tuh-e liate a seipaw miakaw tuh a hawpaw thua khyh.

² Siapharan thinrianaw tuh chindeih nynh a siapaw te nynh aloku; a thin a riasahpaw tuh amaw te amaw kha hiinnaw a zosakuhpaw nynh thua.

³ Pekunaw kha a daesahpaw tuh sawtua lan umpaw nynh thua, thuasalama angaeepaw miakaw nynh pekunaw kha a puisah.

⁴ A thawnawpaw nynh leithue ccyh kya leithue khyh; tukeiccuze loohrue ccyh yn thua tuh, pawpaw mah mue vae khyh.

⁵ Ccungccaw thinlung kya eenaw tuh akhupaw tui te nynh aloku; thuasalama mihawpaw nynh tuh khah-e tui kha a thekuh cih.

⁶ Ccungccaw patae nynh a lungzipaw nynh ka thua cite mimaw te mimaw kha a hoku hae, thuasalama alungzipaw ccungccaw kha hum nynh mou a muih kho cih?

⁷ Miding nynh dingnaw laanpi kya zui zah, a ccaaw a no hae tuh hythuanaw a ccou hae!

⁸ Byapianaw bawitungkhung kya a haungpaw siapharan nynh hoyleinaw balyn kha a mit te pong a laesah thya.

⁹ “Ka thinlung ka thyaasaku vae; ka seinaw kyate ka thyaa vae,” cite hummou a ho kho cih?

¹⁰ Ahme leipaw khinlung te ahme leipaw tounawpaw tuh parouh mawte Bawipaw hanlan anungsikuhpaw nynh thua.

¹¹ Imua nynh heize a cyipaw kha acci te cci khyh, ahme te hme khyh kha a cyisahnaw khate amaw toulou nynh a langsaku.

¹² Thaenawpaw nakaring te muihnawpaw mit hynh parouh mawte Bawipaw nynh a rae.

¹³ Ipaw kha sungsah nan, tuhkhyhze tuh na ryachi cih; na mit kha na dae zetuh, looh patae na hoi cih.

¹⁴ A retupaw nynh, “Hoy khyh, hoy khyh,” a cithya, oute cceih zah a poku.

¹⁵ Sui a um, amee rupaw lung mah patae a um, thuasalama hawnaw bya tuh amee myarya rupaw nynh thua.

¹⁶ Ny leipaw ccungccaw elang aamah a khanpakuhpaw kya-e boeining kha kyngpah; ny leipaw ccungccaw hanlan aamahkhan lante pya athuapaw ponpaw uccaw kha kyngpah.

¹⁷ Hynhute muepaw looh tuh athua zemah, a aetu khalang kya lungpyng te phe abeih cih.

¹⁸ Tuanaw pyakupaw kha lawku liate paccynkunaw tuh atyn; Ahawpaw cciakhaenaw a um ze kyalya rhaw na tho cih.

¹⁹ Thanrynaw nynh byaru kha a phy; tukeiccuze bya kathuhkaleih a hothyapaw khate la mungkuh nan oh.

²⁰ A nung te a paaw kha thya a lawpaw tuh mohkaraepaw kyakhe a maeekhua tuh a chih cih.

²¹ Arangte muepaw rho tuh athangnaw kya hythuanaw um lan khyh.

²² “Hoyleinaw kha ka liaru cih,” cite la ho nan; Bawipaw kha ngaw lah, amaw nynh ae bawm cih.

²³ Khinlung laesahnaw tuh Bawipaw hanlan anungsikuhpaw thua zah, ahme leipaw zawccu tuh hoy khyh.

²⁴ Ccungccaw a cciakhaetupaw tuh Bawipaw nynh thua; ccungccaw nynh a laanpi kha pawtemou a nyh kho cih?

²⁵ “E tuh Pachia hanlan athyaa,” cite rangkhirangkhaete ho koute nyalangte bua tuaku thui tuh byakinkunaw a raetu hanlan kaang hawte nynh thua,

²⁶ Ahawpaw siapharan nynh tuh ccungccaw hoylei hae paw kha ccangkung vawte vaw hae zah, leccu te a tousah thin hae.

²⁷ Ccungccaw thinlung tuh pyn lungkhu umpaw balyn kha akaw-aleih a ccungpaw Bawipaw maeekhua nynh thua.

²⁸ Lungzinaw te zyn lan umnaw nynh siapharan kha thungkhaw zah, dingnaw nynh a bawi haungnaw kha a tynsah.

²⁹ Mino hae phu-enaw tuh mih thawzung nynh thua, ataw hae paw puithyanaw tuh mih sangpaw kha nynh thua.

³⁰ Vaemaw kha accih lante singpya liate ahoy leipaw kha athyaa; ziaku buakunaw nynh mah pyn lungkhu e hae kha a thyaasah.