PHUNGTANGBYA 19 - Zotung Bible 2016

¹ Dingnaw laanpi a zuipaw ryachipaw tuh ccouseikunaw bya a hopaw mingaeepaw laeze ahoyhua.

² Nynaw um leite rynaw tuh hoy khyh, Rangsakute a cceihpaw tuh a laanpi a vaethya.

³ Ccungccaw tuh a ngaeenaw nynh ronaw kalan a cciakhae, tuhzemah a thinlung kyakhe Bawipaw tungvaw a thinria.

⁴ Hoirumnaw nynh ruiban patae a thuakhae, thuasalama a ryachipaw tuh ruiban hoi khyh.

⁵ Ahme leipaw ccaekia tuh detahnaw mue leite um lan khyh, hynbya a hopaw tuh lue lan khyh.

⁶ Ccungccaw patae nynh a lung-uapaw ccungccaw kya maehoynaw kha a ccungku hae, humhung mah lasung a pyatupaw hanlan tuh ruiban nynh thua.

⁷ A ryachipaw kha a uno hae nynh heize a hua hae ze, a ruiban hae nynh thytuh hohcihmou houh a sibia vae cih hae! A kohui hae zemah tuh-e hae tuh, tuin kya um vae khyh hae.

⁸ Hawnaw a muepaw tuh amaw te amaw a sungsakuhpaw nynh thua, nythyanaw a ccykekuhpaw tuh hoynaw a mue.

⁹ Ahme leipaw ccaekia tuh detahnaw ing leite um lan khyh, a hynpaw tuh a roh cih.

¹⁰ Mingaee tuh hiinhoyte um lan ngaekuh khyh, see nynh a bawipaw ukpaw tuh houh ngaekuh vae khyh.

¹¹ Mihaw hae tuh mih lungsae zah, milae seinaw kha ccuinpya leinaw tuh mih phu-enaw nynh thua.

¹² Siapharan thinrianaw tuh chindeih nynh a siapaw te nynh aloku, thuasalama a thawccinaw tuh lonua vawlan e dangtui te nynh aloku.

¹³ Angaeepaw ccaaw tuh a paaw hanlan ronaw nynh thua, Peku a mangpaw zu tuh boubou accawpaw khuaaratui te nynh aloku.

¹⁴ Inn te hoirumnaw tuh nungpaaw rho nynh thua, thuasalama ahawpaw zu tuh Bawipaw kyate muepaw nynh thua.

¹⁵ Thawnawnaw nynh ithuhnaw kha a thuakhae, a thawnawpaw tuh a vuelaw cih.

¹⁶ Kawbya a zuipaw tuh a hiin cih; a zuipaw laanpi kha pawlangria leipaw tuh a chih cih.

¹⁷ A ryachipaw tungvaw thawccinaw a hoipaw tuh Bawipaw kha uccaw a koiisakuhpaw thua zah, Bawipaw nynh phe ccing lan a sang cih.

¹⁸ Ngaehoinaw a um lyakhe na ccaaw hae kha thuihei hae; a ro nawlan hae ngaethyaumsah nan hae.

¹⁹ A thinthah zah a puathopaw ccungccaw tuh detahnaw a ing cih; amaw kha vae kheit na khum ze, tuhte bua na khum cih.

²⁰ Malang ccyh kya hawnaw na mue nawlan, tuanaw pyakupaw kha ngae lah, thuiheinaw kha lawkuh.

²¹ Ccungccaw thinlung tuh khuakhankunaw patae a hoi kho, thuasalama Bawipaw khuakhannaw rou nynh atyn cih.

²² Ccungccaw kya ry lanpaw tuh lungzinaw nynh thua, a ryachipaw lang tang tuh a hynpaw lang tang laeze ahoyhua.

²³ Bawipaw rawrinaw tuh hiinnaw ccaccing nynh thua; tuh-e rawrinaw a hoipaw tuh khyndadyh lan a um cih zah vawsawnaw tung lan khyh.

²⁴ A thawnawpaw tuh a kuih kha pake lungkhu lang pute, a khalang lungkhu lang bawku lan sanmah hua khyh.

²⁵ Ccungccaw a saryapaw kha zia lah, tuanaw a zyapaw nynh hawnaw a mue cih; mihawpaw kha na thuihei zetuh nythyanaw a mue cih.

²⁶ A paaw kha zia zah a nung kha a deepaw ccaaw tuh maethyanaw te thethyanaw a thuakhaepaw nynh thua.

²⁷ Ka ccaaw, hawnaw vua khylan thuiheikunaw bya kha ngae nan.

²⁸ Ccaekia hoyleipaw nynh byading kha pawlangria khyh, ccungccaw hoyleipaw khalang nynh hoyleinaw kha po a laang.

²⁹ Ccungccaw a sarya hae paw hanlan detahnaw, mingaee hae ke hanlan ziakunaw tuh paccyn ty athua vae.