PHUNGTANGBYA 18 - Zotung Bible 2016

¹ Milae te a mungkuh leipaw tuh amaw rynaw kyalya te a um rypaw nynh thua, ahoypaw hawnaw miakaw kha a nawccah khyh.

² Mingaee nynh tuh amaw tuanaw kyalya kha langsakuh zah, nythyanaw kyakhe a lungrythua khyh.

³ Hoyleinaw he yn thua vae ze, dothatheihnaw mah athuabua; maethyanaw te thethyanaw tuh a thuakheih hae.

⁴ Ccungccaw khalang kya-e bya tuh akhupaw tui hawte thua zah, hawnaw tuidy tuh aluapaw vaw hawte nynh thua.

⁵ Aseipaw ccungccaw kha maedopaw te byapianaw kyaze seinaw a hoi leipaw kha shungsahpaw tuh hme khyh.

⁶ Mingaeepaw munglae nynh pekunaw a thuakhae, a munglae nynh ccungbua kha a ngiaku.

⁷ Mingaeepaw khalang tuh amaw ronaw thua zah, a mung tuh amaw elang kaang nynh thua.

⁸ Ccungccaw lawtypaw byaho tuh aepaw athuapaw te lokuh zah, pyn lungkhu lang po a tee.

⁹ Ryalawnaw kya a thawnawpaw tuh amaw uccaw kha alakaw lan a rosahpaw ccungccaw te uno nynh athua hae.

¹⁰ Bawipaw min tuh tynkarangpaw rhawviainn nynh thua; miding hae nynh tuh-e inn lungkhu lang ccue hae zah a khyn hae.

¹¹ Mihoipaw nynh tuh a hoirumnaw kha atynpaw khuapi thua zah, ahangpaw khua hohung te nynh aloku cite a tua.

¹² Thinlung hangsahkunaw tuh ronaw laeze laan a mawty, zakawsangsakunaw tuh sawtuanaw laeze laan a mawty.

¹³ Bya hoyte a thae mawze, bya a khungpaw ccungccaw tuh a ngaeepaw te maethya a lawkuhpaw nynh thua.

¹⁴ Ccungccaw thinlung nynh ccinaw a e-ia kho; thuasalama lungronaw kha hummou a teing kho cih?

¹⁵ Ahawpaw thinlung nynh tuh nynaw kha ccakhungkuh zah, mihawpaw nakaring nynh mah nynaw kha a ccung.

¹⁶ Lasung nynh a pyatupaw elang laanpi kha a hungpya; alesaepaw ccungccaw kalan a thuakhae.

¹⁷ Byapiazung kya bya a hotypaw tuh ahmepaw lo salamah, a innpaw paw nynh yn thua zah amaw kha bya a khialiathya.

¹⁸ Ccungthydungnaw nynh eikunaw kha daesah zah, huhan hoi hae paw bya kha a paepya hae.

¹⁹ U te neitaw bawmkupaw tuh atynpaw khuapi hawte nynh thua, thuasalama u te neitaw pekupaw tuh rhawhohung sakoihccaw te nynh aloku.

²⁰ Ccungccaw tuh khalang kyate apoupaw athae khate vue asokuh; munglae kyate apoupaw kha nynh vuesonaw kha a thuakhae.

²¹ Lae nynh chinaw te hiinnaw kha a uk hae, lae a sungsahpaw tuh lae athae kha a ae cih.

²² Zu a muekuhpaw tuh uccaw hoypaw a muekuhpaw thua zah, Bawipaw kyate maehoynaw kha a mue.

²³ Ryachipaw nynh soihbiakunaw kha a mang, thuasalama mihoipaw nynh tuh rehahan lante a khung.

²⁴ Ruiban abang tuh ruiban huataw thua hae salamah, ruiban hoypaw tuh u te neitaw sasaw laeze a bekuh hua.