PHUNGTANGBYA 15 - Zotung Bible 2016

¹ Byanepaw nynh thinrianaw kha a daesah, thuasalama bya repaw nynh tuh thinrianaw kha a thuakhae.

² Mihawpaw lae nynh ahoypaw nynaw kha a kosah, thuasalama mingaeepaw khalang nynh tuh ngaeenaw bya kha a ho.

³ Bawipaw mit tuh hmin takyh kya um zah, ahoypaw te ahoy leipaw ccungccaw hae kha tyty a do hae.

⁴ Byanepaw tuh hiinnaw thingku nynh thua, thuasalama byarepaw nynh tuh thinlung a ccisah.

⁵ Mingaee nynh tuh nungpaaw thuiheinaw kha pawlangria khyh, thuasalama thuiheinaw a ngaepaw tuh a hawpaw nynh thua.

⁶ Miding inn kya tuh sisua patae a um, thuasalama ccungccaw hoyleipaw nynh a muepaw sisua tuh vawsawnaw nynh phe a zosah.

⁷ Mihawpaw munglae nynh nynaw kha a pazaesahku; mingaee hae thinlung tuh tuhcite thua khyh.

⁸ Ccungccaw hoylei hae paw silawnaw tuh Bawipaw hanlan anungsikuh. Thuasalama miding hae sawsangnaw kha tuh a lungrythua.

⁹ Ccungccaw hoyleipaw laanpi tuh Bawipaw hanlan anungsikuh, thuasalama dingnaw laanpi a zui hae paw kha tuh a sungsah hae.

¹⁰ Laanpi a meseipaw hanlan accihpaw thuiheinaw a um, thuasalama thuiheinaw kha a huapaw tuh a chih cih.

¹¹ Sheol te Abaddon ram tuh Bawipaw malang ccaerarih lan a lang hae, tuh-e hae laeze ccungccaw thinlung tuh alangkuh hua.

¹² Ccungccaw a saryapaw tuh thuiheiku ry khyh; mihaw hae kalan cceih boi khyh.

¹³ A lungtuapaw thinlung nynh lungtuanaw mitmae kha a langsaku, thuasalama ngaethyanaw thinlung keiccuze lung aroh.

¹⁴ Mihawpaw thinlung nynh tuh hawnaw kha a ccung, thuasalama mingaee hae khalang nynh tuh ngaeenaw kha nynh a dangku hae.

¹⁵ Ryachi hae ninsaw balyn tuh arupaw nynh thua, thuasalama alungtuapaw thinlung tuh zungzae tuapaw poi nynh thua.

¹⁶ Bawipaw rawrite beihtaraw hoi tuh sisua pataepi hoite thinphangte um laeze ahoyhua.

¹⁷ Sungsahkunaw a umnaw kya enaw-eho te zerya aepaw tuh huakunaw a umnaw kya athopaw vaetua saw te aepaw laeze ahoyhua.

¹⁸ A thindynpaw nynh pekunaw kha a puisah, thuasalama a lungsaepaw nynh tuh pekunaw kha a daesah.

¹⁹ Thawnawpaw laanpi tuh hinpaw nynh pong a zithin, thuasalama miding laanpi tuh laanluepi nynh thua.

²⁰ Ahawpaw ccaaw nynh a paaw lung a tuasah, thuasalama angaeepaw ccaaw nynh tuh a nung kha a theihrya.

²¹ Tuanaw a hoi leipaw hanlan ngaeenaw tuh lungtuanaw nynh thua, thuasalama mihawpaw nynh tuh ahmepaw kha a cyi.

²² Tuanaw pyakunaw a um leite tuh, paccynkunaw aroh, thuasalama tuanaw pyatu alung zetuh paccynkunaw atyn.

²³ Ccungccaw tuh bya khungkupaw liate a lungtua, ccyh dosete hopaw bya tuh pawcih baban ahoy!

²⁴ Mihawpaw nynh a zuipaw hiinnaw laanpi tuh akaw lang e michi khua kha sibia khylan ahangnaw langkhe nynh a ccia.

²⁵ Bawipaw nynh alysakuhpaw kya-e inn kha a phoupya, thuasalama nomaenung umnaw kha tuh a tynsah.

²⁶ Ccungccaw hoyleipaw kya-e tuanaw tuh Bawipaw elang anungsikuhpaw nynh thua, thuasalama athyaapaw ccungccaw bya kha tuh a lungrythua.

²⁷ Ahme leipaw muenaw elang a karankuhpaw tuh a innbyn hanlan vawsawnaw a thuakhae, thuasalama pyaruh kha a huapaw tuh a hiinshe sae cih.

²⁸ Miding nynh tuh pawtemou horu lan cipaw kha a thinlung kya a tua, thuasalama ccungccaw hoyleipaw khalang nynh tuh bya hoyleipaw kha ruarua a ho.

²⁹ Bawipaw tuh ccungccaw hoyleipaw kyate asawkuh, thuasalama miding hae sawsangnaw kha a ngaepya hae.

³⁰ Mit awnaw nynh ccungccaw lungtuasah zah, thehoypaw nynh ru kha kintui te a biasah.

³¹ Ahoypaw thuiheinaw kha hoyte a ngaepaw tuh mihaw hae laku a umbua cih.

³² Thuiheinaw a ngae ry leipaw tuh amaw toulou kha pawlang a riakuh leipaw nynh thua, thuasalama thuiheinaw a ngaepaw tuh hawnaw a mue.

³³ Bawipaw rawrinaw tuh hawnaw te thuiheikupaw nynh thua, sawtuanaw a um mawze zakawsangsakunaw a umty.