PHUNGTANGBYA 14 - Zotung Bible 2016

¹ Ahawpaw nopi nynh a inn kha a sak, thuasalama angaeepaw nopi nynh tuh amaw kuih toulou khate a inn kha a phou.

² Dingnaw kya a cceih hae paw tuh Bawipaw raw a rih hae, thuasalama a thyaruh hae paw nynh tuh amaw kha pawlangria khyh hae.

³ Mingaeepaw nynh a hopaw bya tuh amaw ke hanlan ccungngue nynh thua, thuasalama mihaw hae munglae nynh tuh mimaw kha a thungkhaw hae.

⁴ Tangnuapaw um leinaw kya-e vaetua aenawpaw kua tuh thyaararih lan accawnghan, thuasalama vaetua thawzung liate looh patae avoi.

⁵ Alungzipaw ccaekia tuh hynbya ho khyh, thuasalama ahme leipaw ccaekia nynh tuh hynbya a ho.

⁶ Sarya a mangpaw nynh tuh hawnaw kha a ccung zemah alakaw, thuasalama a nyhthyapaw nynh tuh hawnaw kha zoikadeihte a mue.

⁷ Mingaeepaw nynh a umnaw kha cciatawtua, pawccecize tuin kyakhe hawnaw bya na muih lan khyh.

⁸ Mihawpaw hawnaw tuh a ccianaw laanpi kha a nyku, thuasalama mingaeepaw a ngaeenaw nynh tuh a cciakhaesei.

⁹ Mingaee hae nynh seinaw kha pawtua-ungsah khyh hae, thuasalama miding tuh Pachia kya-e maehoynaw kyakhe a lungtua.

¹⁰ Thinlung nynh amaw vawsawnaw kha a nyku, a lungtuanaw kha mah milae hae kya neethungbua khyh.

¹¹ Ccungccaw hoyleipaw inn tuh ro athua cih, thuasalama midingpaw bu tuh atyn cih.

¹² Ccungccaw nynh akyhpaw laanpi cite a tuapaw kha, athangnaw tuh chinaw lang a cceihpaw laanpi nynh thua.

¹³ Ccungccaw tuh a nuin lyakhe heize a thinlung kya a ngaethah kho, lungtuanaw athangnaw tuh ngaethyanaw nynh thua.

¹⁴ A ccouseikuhpaw ccungccaw tuh a hiinzia khate a vueso cih zah, ccungccaw hoypaw tuh a cyisahnaw khate a vueso cih.

¹⁵ Tuanaw a zyapaw nynh tuh atyn-are kha a zyn, thuasalama a hawpaw nynh tuh a ccianaw laanpi kha hoyte a doku.

¹⁶ Mihawpaw tuh raeringkute um zah hoyleinaw kha a sibia, thuasalama mingaeepaw nynh tuh synkuh khyh zah a sawphahkuh.

¹⁷ A thindynpaw ccungccaw nynh tuh ngaeepaw rya kha a law, Ahoy leipaw paccynkunaw a hoipaw tuh ccungccaw hae nynh a hua hae.

¹⁸ Tuanaw a zyapaw tuh ngaeenaw rho kha a ccou, thuasalama a hawpaw tuh hawnaw kha bawilukhung lang a khungku.

¹⁹ Ccungccaw hoyleipaw tuh ccungccaw hoypaw malang khe a bakhung, ccungccaw hoyleipaw tuh miding hae koikua kyakhe a bakhung.

²⁰ A ryachipaw tuh a innpaw hae nynh heize a hua hae, thuasalama mihoipaw tuh ruiban patae a hoi.

²¹ A innpaw kha a theihryapaw tuh misei nynh thua, thuasalama ryachi hae kha thaw a ccih hae paw tuh lungtua hae paw nynh thua.

²² Ahoy leipaw paccynkunaw a hoi hae paw tuh sei khyh hae tou? Ahoypaw kha a paccyn hae paw tuh lungzinaw te zyn lan umnaw kha a mue cih hae.

²³ Ryalaw rupaw miakaw kya thanenaw a um, thuasalama bya kyalya honaw nynh tuh ryachinaw rou kha nynh athuakhae.

²⁴ Mihaw hae bawilukhung tuh mih hawnaw kha nynh thua, thuasalama ngaeenaw tuh mingaee hae kya-e haetapawsi nynh thua.

²⁵ Ahmepaw ccaekia nynh tuh ccungccaw hiinnaw kha a khum, thuasalama hynbya a hopaw tuh ccungccaw a pheepaw nynh thua.

²⁶ Bawipaw raw a rihpaw tuh zynkunaw varyng hoi zah, a ccaaw hae mah khynnaw a hoi cih hae.

²⁷ Bawipaw rawrinaw tuh chinaw kaang kha sibia khonawpaw hiinnaw tuidy nynh thua.

²⁸ Siapharan phu-enaw tuh ccungccaw zapi kya nynh a um, thuasalama ccungccaw zapi a um khyh lanze, uktu siapharan tuh aroh.

²⁹ A lungsaepaw tuh myarya hawpaw nynh thua, thuasalama a thindynpaw nynh tuh ngaeenaw kha a langsaku.

³⁰ Lungdaenaw nynh pynsaw kha a dansah, thuasalama eiungnaw nynh tuh ru kha a mueesah.

³¹ Ryachi hae kha a tuaa a sah hae paw tuh minmin a Raetupaw kha a sarya hae paw nynh thua, thuasalama ryachi hae kha thaw a ccih hae paw tuh a Raetupaw kha saw a tua hae paw nynh thua.

³² Ccungccaw hoyleipaw tuh ahoy leipaw cyisahnaw keiccuze a khuliakuh, thuasalama miding tuh chinaw kya heize khynnaw a hoi.

³³ Hawnaw tuh hawnaw a hoi hae paw tuanaw kyakhe a um, thuasalama mingaee hae thinlung kya a umpaw tuh a langkuh.

³⁴ Dingnaw nynh minphuin kha a hangthung, thuasalama seinaw tuh minphuin miakaw elang minthunaw nynh thua.

³⁵ Hawrarih lante ryalahpaw ryalahtu tuh siapharan kya maehoynaw a mue, thuasalama maethyanaw a thuakhaepaw ryalahtu tungvaw khe siapharan tuh a thinria.