PHUNGTANGBYA 13 - Zotung Bible 2016

¹ Ahawpaw ccaaw tuh a paaw thuiheinaw kha a ngae, thuasalama ccungccaw a saryapaw nynh tuh thuiheinaw kha ngae khyh.

² Ccungccaw hoypaw nynh a bya kya-e athae athuapaw, ahoypaw uccaw kha a ae, thuasalama ahynpaw ccungccaw hae nynh tuh puathonaw kha a ry hae.

³ Munglae a raeringkuh hae paw tuh mih hiinnaw kha a khynsaku hae; raeringku leite bya a hopaw tuh amaw toulou kha a roku.

⁴ A thawnawpaw nynh ccangkhakheit kha a ry zemah pawpaw sanmah mue khyh, a zuakuhpaw nynh tuh phe zaw lan a mue cih.

⁵ Miding nynh tuh hynbya kha a hua, thuasalama ccungccaw hoyleipaw ryalaw tuh nungsikuh zah maethya lan a um.

⁶ Dingnaw nynh laanding a zuipaw kha a thungkhaw, thuasalama hoyleinaw nynh misei hae kha a khulia hae.

⁷ Ccungccaw abang tuh pawpaw sanmah a hoi khyh hae zemah, mihoipaw hawte a umsaku hae, abang nynh tuh sisua patae a hoi hae zemah ryachi hawte a umsaku hae.

⁸ Hoirumnaw tuh mihoipaw hiinnaw kha shawkhawkunawpaw nynh thua, thuasalama a ryachipaw nynh tuh hurawnaw bya kha thae khyh.

⁹ Miding hae awnaw tuh phaephae a ak, thuasalama ccungccaw hoylei hae paw maeekhua tuh a chih cih.

¹⁰ Lysahkunaw nynh tuh pekumaekunaw kha a thuakhae, thuasalama hawnaw tuh tuanaw pyakupaw a lawkuh hae paw kyakhe a um.

¹¹ Arangte muepaw hoirumnaw tuh azyabung cih, thuasalama beihtararaw te sisua a tungkuh hae paw tuh a hoithung cih hae.

¹² Ngaehoinaw tuh accyh aro ze, thinlung accih, thuasalama rynaw he accing tuh hiinnaw thingku nynh thua.

¹³ Ccangpyanaw kha pawlang a ria leipaw tuh amaw toulou tungvaw ronaw a thuakhae, thuasalama kawbya kha saw a tuapaw tuh lasung a mue cih.

¹⁴ Mihawpaw kya-e ccangpyanaw tuh chinaw kaang kha sibia nawlan hiinnaw tuidy nynh thua,

¹⁵ Hawnaw hoypaw a hoipaw nynh maehoynaw kha a mue, thuasalama a lungzi leipaw laanpi tuh ronaw laanpi nynh thua.

¹⁶ Mihawpaw tuh atyn-are kha hawnaw khate nynh a cyi, thuasalama mingaeepaw tuh a ngaeenaw kha a langsaku.

¹⁷ Ahoy leipaw zeccuetu nynh vawsawnaw a thuakhae, thuasalama a lungzipaw locceihtu nynh dannaw kha a thuakhae.

¹⁸ Thuiheinaw kha pawlangria leipaw tuh ryachinaw te maethyanaw nynh a thuanua, thuasalama thuiheinaw a ngaepaw tuh sawtuanaw a mue.

¹⁹ Rypaw kha muepaw tuh lungpawnaw nynh thua, thuasalama hoyleinaw kyate maeleihkupaw tuh mingaee hae hanlan anungsikuhpaw nynh thua.

²⁰ Mihaw hae ryte a mungkuh hae paw tuh a haw cih, thuasalama mingaee hae ryte a mungkuh hae paw tuh vawsawnaw a tung cih.

²¹ Misei hae kha vethyanaw nynh a deehui hae, thuasalama miding hae tuh hoynaw lasung a mue hae.

²² Ccungccaw hoypaw nynh tuh a mintaw hae kyacia rho a nungpya sya hae, thuasalama miseipaw hoirumnaw kha miding hae hanlan suelua athua.

²³ Khomaw loo nynh ryachi hae hanlan looh patae a voipya hae, thuasalama tuh-e tuh dingleinaw keiccuze phe azo.

²⁴ Ccungngue a mang leipaw tuh a ccaaw a huapaw nynh thua, thuasalama a ccaaw a sungsahpaw tuh a ccaaw a di lya maw te hoyte a thuihei.

²⁵ Miding tuh ae lanpaw phe zaw lan a hoi, thuasalama ccungccaw hoylei hae paw tuh zungzae mih vuelaw.