PHUNGTANGBYA 11 - Zotung Bible 2016

¹ Ahme leipaw zawccu tuh Bawipaw hanlan anungsikuhpaw nynh thua, thuasalama ahmepaw khinlung kha tuh a lungrythua,

² Lysakunaw a um lanze, maethyanaw a um; thuasalama hawnaw tuh zakaw a sangsakuhpaw kya a um.

³ Dingnaw nynh miding hae kha a cciakhae hae, thuasalama thyaruhnaw nynh mihyn hae kha a ro hae.

⁴ Thinria ccyh lya tuh hoirumnaw hynh thane khyh, thuasalama dingnaw nynh chinaw kyate a khum,

⁵ Dingnaw nynh ccaenaw um leipaw ccungccaw kha a laanpi a lawsahpya, thuasalama ccungccaw hoy leipaw tuh a hoyleinaw liate a khuliakuh.

⁶ Dingnaw nynh miding hae kha a khum hae, thuasalama a lungzi leipaw tuh a karankunaw keiccuze kaang a kae.

⁷ Ccungccaw hoyleipaw tuh he a chih te, a ngaehoinaw kha phe aroh, ccungccaw hoyleipaw ngaehoinaw tuh accakaepaw lang nynh a tang.

⁸ Miding tuh vawsawnaw kyate luesah thua zah, amaw ccelang ccungccaw hoyleipaw nynh tuh-e vawsawnaw lungkhu lang a tee ru.

⁹ Pachia pawlangria leipaw nynh a khalang khate a innpaw kha a ro, thuasalama miding kha tuh hawnaw liate luesah athua.

¹⁰ Miding hae nynh hoynaw a mue hae ze, akhuapi te mih lungtua; ccungccaw hoylei hae paw nynh ronaw a mue hae ze, lungtuate a sia hae.

¹¹ Miding hae kya-e hythuanaw liate khuapi tuh hangthung athua, thuasalama ccungccaw hoylei hae munglae keiccuze khua tuh ro athua.

¹² Mingaee nynh tuh a innpaw kha a dothatheih, thuasalama a hawpaw tuh daebabi lan a um.

¹³ Ccungccaw thethya a hothyapaw tuh byaru kha a phy, thuasalama a lungzipaw nynh tuh a thinlung kya zya a thuruh.

¹⁴ Cciakhaenaw a um leinaw tuh ram a khuliakuh, thuasalama tuanaw hoypaw pyatu alungnaw kya tuh khynnaw a um.

¹⁵ A ny leipaw ccungccaw laebah hanlan bya a kinpakuhpaw tuh vawsawnaw a tung cih, thuasalama tuhcite byakinpyaku lan a eipaw tuh a khyn cih.

¹⁶ Thawccithyapaw nopi tuh sawtuanaw a mue, thuasalama a ozia hoy leipaw nopi tuh maethyanaw nynh thua. Rawthyanaw tuh pawpaw sanmah hoi leinaw lang a tang, thuasalama a rawhoypaw tuh hoirumnaw a mue.

¹⁷ Thawccinaw a hoipaw tuh amaw te amaw kha hoynaw a pyaku, thuasalama thawccinaw a hoi leipaw tuh amaw te amaw kha vawsawnaw a pyaku.

¹⁸ Ccungccaw hoyleipaw nynh tuh ahme leipaw ryalaw mee kha nynh a mue, thuasalama dingnaw ccacii a vua hae paw tuh ahmepaw ryalaw mee kha a mue hae.

¹⁹ Dingnaw kya varyng atynpaw tuh a hiin cih, thuasalama hoyleinaw kya a ohleihkuhpaw tuh a chih cih.

²⁰ Thinlung thyaruhpaw tuh Bawipaw hanlan anungsikuhpaw nynh thua, thuasalama ccaenaw um leipaw laanpi kha a zui hae paw kya tuh a lungrythua.

²¹ Ccungccaw hoyleipaw tuh detahnaw mue leite um lan khyh. thuasalama miding hae tuh a lue cih hae.

²² A puithya zemah tuanaw-roihnaw a hoi leipaw nopi tuh voh naduh kya-e sui kuihpu te nynh aloku.

²³ Miding hae rynaw tuh hoynaw te rou nynh a thangkhaeku; ccungccaw hoyleipaw nynh a ngaehoinaw tuh thinrianaw te nynh a thangkhaeku.

²⁴ Ccungccaw abang nynh rythyte a pya hae zemah, houh a hoithung hae; mingccang hae tuh mih sithah zahmah, ahobounaw houh alung.

²⁵ A lung-uapaw ccungccaw tuh a hoirum cih zah, milae kha tui a pyapaw tuh amaw kha mah tui pyaru athua cih.

²⁶ Looh kha phang a byhpaw tuh ccungccaw hae nynh thya a law cih hae, thuasalama looh a zua hae paw lu vawlan khe hythuanaw a um cih.

²⁷ Hoynaw kha zuakute a ccungpaw tuh maehoynaw a mue cih, thuasalama hoyleinaw a ccungpaw tuh hoyleinaw nynh a thuanua cih.

²⁸ A hoirumnaw kha a doliakuhpaw tuh baleih anaan cih, thuasalama miding tuh thingnaw hinlalyhpaw hawte a hiin cih.

²⁹ A innbyn kya vawsawnaw a thuakhaepaw tuh khivae kha rho lang a ccou cih, A ngaeepaw nynh a hawpaw kha rya a lawpah cih.

³⁰ Miding nynh a thaepaw thae tuh hiinnaw thingku nynh thua, puathonaw nynh hiinnaw kha a ro.

³¹ Miding nynh mah laephi vawlan hin a ryalaw mee kha a mue ze, ccungccaw hoyleipaw te miseipaw nynh pawcih alungpaw amee kha mou houh a mue cih?