PHUNGTANGBYA 10 - Zotung Bible 2016

Solomon Hawnaw Bya

¹ Solomon phungtangbya hae: Ahawpaw ccaaw nynh a paaw lung kha a tuasah, thuasalama angaeepaw ccaaw nynh tuh a nung kha a ngaethyasah.

² Hoyleinaw liate muepaw sisua tuh amia um khyh, thuasalama dingnaw nynh tuh chinaw kyate a luesah.

³ Bawipaw nynh miding kha a vuelawsah lan ua khyh, thuasalama ccungccaw hoylei hae paw kya-e ryduaanaw kha tuh a pingpya hae.

⁴ Thawnawpaw kuih nynh ryachinaw kha a thuasah, thuasalama zuakunaw kuih nynh tuh hoirumnaw kha a thuasah.

⁵ Hawnin ccyh kya uccaw a ccakhungkuhpaw ccaaw tuh a hawpaw nynh thua. thuasalama loohrue ccyh lya a ihpaw ccaaw tuh maethyanaw kha a thuakhae.

⁶ Hythuanaw tuh miding hae lu vawlan a um, thuasalama ccungccaw hoyleipaw mung nynh tuh puathonaw kha phe a thuruh.

⁷ Midingpaw kha liathuinaw tuh hythuanaw nynh thua, thuasalama ccungccaw hoyleipaw min kha tuh azo cih.

⁸ A hawpaw nynh tuh kawbya kha a ccykeku, thuasalama bya kathuhkaleih a hopaw tuh ronaw kalan a phungkuh cih.

⁹ Dingnaw kya a cceihpaw tuh khyndadyh lan a cceihpaw nynh thua, thuasalama akoupaw laanpi a zuipaw tuh muihbia athua cih.

¹⁰ Mit phalyh a masipahpaw tuh vawsawnaw kha a thuasah, thuasalama rawthungte a thuiheipaw tuh daenaw kha a rae.

¹¹ Midingpaw khalang tuh hiinnaw tuidy nynh thua, thuasalama ccungccaw hoyleipaw a khalang nynh tuh puathonaw kha zya a thuruh.

¹² Huakunaw nynh pekumaekunaw lang a tangsah, thuasalama sungsahnaw nynh meseinaw balyn kha pong a bong.

¹³ Nythyanaw a hoipaw munglae kyakhe hawnaw kha muih athua, thuasalama ccungngue tuh tuanaw a hoi leipaw ke hanlan nynh thua.

¹⁴ Mihawpaw nynh nynaw kha a ccakhungku, thuasalama mingaeepaw nynh kathuhkaleih a hopaw bya tuh ronaw te anaekuh.

¹⁵ Mihoipaw hoirumnaw tuh a kya-e atynpaw khualungrua nynh thua, A ryachipaw kya-e ryachinaw tuh amaw ronaw nynh thua.

¹⁶ Miding hae ryalaw mee nynh mimaw kha hiinnaw kalan a cciakhae hae, thuasalama ccungccaw hoylei hae paw kya-e amia nynh mimaw kha seinaw kalan a cciakhae hae.

¹⁷ Thuiheinaw a ngaepaw tuh hiinnaw laanpi kya nynh a um, thuasalama thuiheinaw a vuapaw tuh laanpi kha a mesei.

¹⁸ A hynpaw mung nynh huakunaw kha a thuruh, ccungccaw thethya a hopaw tuh a ngaeepaw nynh thua.

¹⁹ Bya patae ho lanze, seinaw a umthya, mihawpaw tuh byahonaw kya a sungkuh.

²⁰ Miding hae munglae tuh ngunphua hoypaw hawte nynh thua; ccungccaw hoyleipaw a thinlung tuh amee azya.

²¹ Midingpaw munglae nynh ccungccaw patae kha looh a dan, thuasalama mingaee hae tuh tuanaw a hoi khyh keiccu hae ze a chih hae.

²² Bawipaw hythuanaw nynh hoirumnaw kha thuakhae zah, tuh-e hoirumnaw kyakhe ngaethyanaw kha pybia khyh.

²³ Cyiseinaw hynh angaeepaw hanlan lungpawnawpaw hawte nynh thua, thuasalama nythyanaw a hoipaw hanlan hawnaw tuh lungpawnaw nynh thua.

²⁴ Ccungccaw hoyleipaw nynh a ripyapaw uccaw tuh a tungvaw kya a thua cih, thuasalama midingpaw nynh tuh a rypaw kha a mue cih,

²⁵ Khise atho ze, ccungccaw hoylei hae paw tuh phe a zo hae, thuasalama miding hae tuh zungzae atyn hae.

²⁶ Haw hanlan misutui ariapaw hawte, mit hanlan maeekhuh hawte nynh a thawnawpaw tuh ryalaw a nawtupaw hanlan athua.

²⁷ Bawipaw rawrinaw nynh hiinshe a saesah, thuasalama ccungccaw hoyleipaw hiinshe tuh adyn cih.

²⁸ Midingpaw ngaehoinaw tuh lungtuanaw te nynh athang, thuasalama ccungccaw hoyleipaw ngaehoinaw tuh accakaepaw lang nynh a tang.

²⁹ Bawipaw laanpi tuh miding hanlan rekunaw nynh thua, thuasalama hoyleinaw a rae hae paw kha a ro hae.

³⁰ Miding hae kha papin vua thua lan khyh hae, thuasalama ccungccaw hoylei hae paw tuh laephi kya um lan khyh hae.

³¹ Midingpaw khalang nynh hawnaw bya kha a ho, thuasalama ahoy leipaw lae kha tuh thoh pae lan aw athua cih.

³² Midingpaw mung nynh nawccaw lan umpaw kha a ny, thuasalama ccungccaw hoyleipaw mung nynh tuh arawsekuhpaw bya kha a ho.