PHUNGTANGBYA 1 - Zotung Bible 2016

¹ Israel siapharan, David ccapaw Solomon phungtangbya:

Byalaanmaw

² Hawnaw te thuiheinaw kong ccangkunaw hanlan, akhupaw bya kha nythyanaw hanlan,

³ dingnaw, byading te laesah leinaw hanlan te

⁴ tuanaw a zya hae paw kha hawnaw, mino hae kha nynaw te tuathyanaw ccangpya khylan nynh thua.

⁵ A haw hae paw nynh mah thae hae sah lah, houh haw hae sah, a thya hae paw nynh thyanaw houh mue hae sah,

⁶ phungtangbya te tousenaw bya kha thuasah, mihaw hae bya te mih bya akhupaw kha thuasah a thaethya nawlan hae nynh thua.

⁷ Bawipaw rawrinaw tuh hawnaw athonaw nynh thua; mingaee hae nynh tuh hawnaw te thuiheinaw kha pawlangria khyh hae.

Ruiban Hoy leipaw Raeringkunaw.

⁸ Ka ccaaw, na paaw thuiheinaw kha ngae lah, na nung ccangpyanaw kha vua nan;

⁹ pawccecize tuh-e hae tuh na lu hanlan apuithyapaw pungde athua cih zah, na nging hanlan si alungmung athua cih.

¹⁰ Ka ccaaw, misei hae nynh ae soih hae ze, la oupah nan hae.

¹¹ Minmin nynh, “Kae kya cceihbua, ccungccaw chia lan buhkhaw oh sih; seinaw a hoi lei hae paw kha akonglang um leite buhkhawte zia oh sih;

¹² Michi khua nynh a hiin pite mih pyn balynte ccungccaw a laang hae hawte, Hunghua lungkhu lang accah hae paw hawte po laang oh sih.

¹³ Aphutepaw uccaw hae balyn kha luade lan zah, ah inn hae kha luadepaw uccaw te phe biasah lan.

¹⁴ Kae kya yn mungkuh bua; phuabu ccangkheit kha hoibung lan,” a ci hae ze,

¹⁵ ka ccaaw, minmin kya la cceihbua nan, mih laanpi kha la sihaekuh;

¹⁶ pawccecize mih ccu tuh hoyleinaw kalan khe ccue zah, ccungccaw chia lan mih thyrang.

¹⁷ Pavaw muihnaw kaang kya nungpyapaw loohtoi tuh alakaw;

¹⁸ thuasalama ccungccaw hoylei hae paw nynh mimaw te mimaw kha chiaku lan a buhkhawku hae! mih hiinnaw kha zosaku lan a buhkhawku hae.

¹⁹ Muenaw elang a karankuh hae paw laanpi tuh tuhcite nynh athua; tuh-e nynh mimaw hiinnaw kha a zosah.

Hawnaw nynh Kokunaw

²⁰ Hawnaw nynh laanpi kyakhe a sia; khualae lungkhu khe a roi kha a saw.

²¹ Ccungccaw asuh huanaw laanpi kyakhe a sia; khualae teenaw koikua hae kyakhe bya a ho:

²² “Pou mingaee hae, hohseciamou na ngaee ung cih oh? Ccungccaw a sarya hae paw nynh ccungccaw saryanaw kya hohseciamou mih lungrythuakhaekuh ung cih zah, mingaee hae nynh hawnaw kha hohseciamou a hua ung cih hae?

²³ Ka thuiheinaw bya hynh ngae oh; ka tuanaw kha kae pya cih oh; ka bya kha kae nysah cih oh.

²⁴ Kae ko oh zah na ei keiccu oh ze thuasah, ka kuih ka dyng zah hum nynh sanmah pawlang na ria khyh oh keiccu thuasah,

²⁵ tuanaw hoypaw kae pya oh paw balyn kha pawlangria leite, ka thuiheinaw kha na ngae khyh oh keiccu thuasah

²⁶ vawsawnaw na tung oh ze kae nuinseru cih oh; rinaw nynh ae thuanua oh ze kae sarya cih oh,

²⁷ vawsawnaw nynh khise hawte thuasah, rinaw nynh khiccung hawte thuasah ae thuanua oh zah, vawsawnaw te lungriathaenaw nynh he ae thuanua oh te, kae sarya cih oh.

²⁸ Tuinte tuh minmin nynh yn ko cih hae, thuasalama ka oi vae lan khyh hae; thawte yn ccung cih hae, thuasalama yn muih lan khyh hae.

²⁹ Minmin nynh nythyanaw kha hua hae zah, Bawipaw rawrinaw kha pokuh khyh hae,

³⁰ ka pya hae paw tuanaw hoypaw kha lawku leite, ka thuiheinaw balyn kha pawlangria khyh hae,

³¹ tukeiccuze mih cyisahnaw athae kha a ae cih hae zah ahoy leipaw mih tuakunaw khate phe a byn cih hae.

³² Pawccecize tuanaw a zya hae paw tuh laanpi a me keiccu hae ze chih hae zah, mingaee hae tuh a sawphahkunaw hae kha nynh mimaw kha a ro hae;

³³ thuasalama ka bya a ngae hae paw tuh a khyn cih hae zah, thinphang leite hiinhoyte a um cih hae,” a ci.