PHUNGHOTU 5 - Zotung Bible 2016

Sawtuanaw, Zakawsangsakunaw te Lungryachinaw

¹ Pachia inn lang na ccia vae ze, na laanccia kha la raeringkuh; mingaee hae nynh silawnaw raepaw laeze bya ngaeku khylan naekute ccia tuh ahoyhua; pawccecize mingaee hae nynh ahoy leipaw rae kha pawtemou sibia lan cipaw nyh khyh hae.

² Byaho lan rangsakuh nan; Pachia malang byaho lan na thinlung te rangsakuh nan, pawccecize Pachia tuh vaawram um zah, nang tuh lae vawlan nynh na um; tukeiccuze na bya zya sah.

³ Lungriathaenaw alung ze maan alung, te a ngaeepaw tuh bya patae a ho.

⁴ Pachia kalan byakinkunaw na rae ze, ccingsah lanpaw na thysung nan sah; pawccecize a ngaeepaw tungvaw lungtuanaw hoi khyh. Bya na kinkupaw kha ccingsah tua.

⁵ Bya na kinkuh zah, ccingsah leite na umpaw laeze bya na kinku khyhpaw kha ahoyhua.

⁶ Na bya nynh seinaw kalan ae cciakhae nan sah, “Ka cyiseipaw nynh thua,” cite locceihtu malang ho nan; pawccemou Pachia nynh na bya kha a thinria zah na cyipaw ryalaw kha ryakhae a ro lanpaw tuh?

⁷ Maan patae sah te bya patae ho tuh accakaepaw nynh thua; Pachia raw kha la rih.

⁸ Ram ramkhakheit kya ryachi hae tungvaw tuaasahkunaw um zah, byading te ahmepaw a um khyhpaw kha na muih lanze na ngaeangthua nan sah; pawccecize ahangpaw bawi kha ccangpaw ahang huapaw bawi nynh a thungkhaw; te minmin laeze ahang huapaw bawi lu kheit a um ung.

⁹ Laephi kyate a poupaw tuh ccungccaw balyn hanlan nynh thua; siapharan nynh mah loo kha a doliakuh.

¹⁰ Phua a rypaw ccungccaw tuh phua te a lungryachikhaekuh lan khyh; sisua a rypaw tuh a muepaw khate a lungryachikhaekuh lan khyh. E hynh mah accakaepaw nynh thua.

¹¹ Hoipaw uccaw alung ze, a aepaw ccungccaw mah alung; uccaw a hoitu tuh a uccaw kha a mit te a muih laelan, ccangpaw pawmou a mue?

¹² Ryalahpaw tuh beihtaraw a ae zemah, patae a ae zemah hoyte a ih; thuasalama mihoipaw tuh a sisua pataepi kha nynh amaw kha isah kho khyh.

¹³ Khuanin kaw kya ngaethya lan umpaw hoyleinaw ka muihpaw tuh: a hoitu nynh amaw vawsaw nawlan a hoirumnaw kha a ccyku,

¹⁴ tuh-e hoirumnaw tuh ahoy leipaw ryalaw keiccuze phe azo; aning nynh ccaaw a saah zemah, a ccaaw hae hanlan a kuih kya pawpaw mah um khyh.

¹⁵ A nung vue kyate a sasete yn pui hawte, a sasete bua a ki cih; thawte rya a la lawpaw hanlan a kuih te pawpaw mah ccyngkuh lan khyh.

¹⁶ E hynh mah myarya thahpaw hoyleinaw nynh thua: yn thua lya hawte a cceih cih; khivae hanlan thawte rya a law hae paw kyate pawmou a mue cih hae?

¹⁷ A she lungkhu balyn mohnaw kyakhe looh ae zah, lungriathaenaw, ccinaw te thinrianaw te a um.

¹⁸ Ahoy cite ka muihpaw tuh: khuanin kaw kya Pachia nynh aening oun pyapaw hiinnaw ccyh syntaraw kyahin ae te nia, te ah ryalaw kyate muepaw kyakhe lungtuakhaeku hynh nynh thua; pawccecize tuh-e tuh aening hanpaw nynh thua.

¹⁹ Pachia nynh ccungccaw miakaw kha sisua te hoirumnaw a pya, ccungccaw tuh tuh-e hae kyakhe a lungtuakhaekuh zah amaw hanpaw kha ccoute a ryalaw kya lungtuanaw a mue—tuh-e tuh Pachia lasung nynh thua.

²⁰ Pachia nynh a thinlung kya lungtuanaw a pya keiccuze nulang e a hiinnaw ccyh kha liathui vae lan khyh.