MIKAH 7 - Zotung Bible 2016

A Ozia Thahpaw Israel

¹ Ka hanlan ngaethya lan kou um! Hawnin ccyh kya thingthae lo koute a muihkuh leipaw hawte thuasah, misu thae lo koute ange kya ae lanpaw a muihkuh leipaw hawte thuasah ka thua vae; ka ae rypaw avoi typaw thaeku thae kha um vae khyh.

² Ram lungkhu kya alungzipaw ccungccaw um vae khyh, adingpaw ccungccaw lu kheit san um vae khyh; mih balynte ccungccaw kha chia lan buhkhaw hae zah, lu kheit te lu kheit kaang a syakhawkuh hae.

³ Ahoy leipaw cyi nawlan mih kuih tuh myarya apuakuh; bawi te byapiatu hae nynh pyaruh kha a ngia hae, kaw a hoipaw nynh a rypaw kha hopah hae zah, tuhcite byading kyate a cceihsei hae.

⁴ Minmin kyaze ahoy huaccepaw tuh thabu hawte thua zah, minmin kyaze ading huaccepaw tuh tureih kya-e hinpaw hawte nynh thua. Pachia nynh raeringnaw a la pya vae hae hawte, minmin detahnaw nin tuh yn thua vae; atu tuh mih lungmuanaw ccyh nynh thua vae.

⁵ Na banpaw kha zyn nan, na sungsahpaw kha doliakuh nan; na by vawlan a ihpaw na zu kya heize raeringkute byaho;

⁶ pawccecize ccapaw nynh a paaw kha a thethyasah zah, ccanung nynh a nung kha a rawse, monung nynh a ninnung kha a rawse; nae rhaw hae tuh nae innbyn kya-e ccungccaw hae kha nynh athua hae.

⁷ Thuasalama kae tuh Bawipaw kha ka ccung cih, yn khumtu Pachia kha ka ngaehoikuh cih; ka Pachia nynh yn thaepah cih.

Ngaesikunaw te Pachia Doliakunaw

⁸ Pou ka rhawpaw, ka tungvaw na lungtua nan sah; kae tuh ka khuliaku ze ka thokuh cih, mohnaw kya ka haung ze Bawipaw tuh ka hanlan awnaw athua cih.

⁹ Bawipaw tungvaw ka sei keiccuze a thinrianaw kha ka teing cih, aning nynh yn pankhae zah, bya yn piapya mawlaezung ka teing cih. Awnaw kalan khe yn poukhae cih zah, amaw kya-e thyaaccounaw kha ka mue cih.

¹⁰ Tetuh, “Bawipaw na Pachia tuh teimou a um?” cite yn khiapaw ka rhawpaw nynh tuh-e tuh a muih cih zah a maethah cih. Aning nynh a shungpaw kha ka muih cih; laanpi e tuiccua hawte amaw kha syde athua cih.

Ki lanpaw Kong Profehbya

¹¹ Na khualungrua raenaw ccyh yn thua cih! Tuin nin vae tuh na ram tuh akochih cih.

¹² Tuin nin vae tuh Assiria ram te Izip khuapi hae kyate thuasah, Izip ram te Vawpi kyate thuasah, rili kin hae te mua hae miakaw kyate thuasah na kalan oun cceih cih hae.

¹³ Thuasalama tuh-e laephi kya-e ccungccaw hae mih cyisahnaw ahoy leipaw keiccuze tuh-e laephi tuh ccungccaw phe adae cih.

¹⁴ Na tuuphu athuapaw na ccungccaw hae hynh na hoitang te rin hae, minmin tuh ramkaw kya ramnonaw khe mih makhaete a um hae paw na tuuphu nynh thua hae; langmawlya hawte, Bashan te Gilead kyakhe rampaeesakuh hae.

¹⁵ Izip ram kyate na pou lya hawte, ngaeang lan umpaw uccaw hae kha kaening oun muihsah.

¹⁶ Minphuin hae nynh a muih cih hae zah, mih thawzung balyn kha mih maethyakhaekuh cih; mih mung kha mih kuih te a huhkuh cih hae; mih nakaring mah nawthae lan khyh;

¹⁷ hupaw hawte thuasah, laekhu kya avawpaw hawte thuasah laenoi kha a lya cih hae. mih rhawlungrua alungkhu kyate thyngkute a pou cih hae; Bawipaw ah Pachia kalan khe thinphang ri biate oun ki cih hae, te na rawri biate a thadyn cih hae.

Pachia Sungsahnaw te Ngaethyaumsahnaw

¹⁸ Hoyleinaw kha ngaethyate, a laehypaw a rho ccungccaw hae mih cyiseimenaw kha a ngaethya hae paw, nang ae lopaw Pachia hummou a um? A thawccinaw langsakunaw kyakhe a lungrythua keiccuze aning tuh zungzae a thinria khyh.

¹⁹ Aning nynh aening kha ngaethya bua oun umsah cih zah, aening hoyleinaw balyn kha a ccu kaw khe a syde cih. Kae seinaw balyn kha rili akhupaw lungkhu langkhe na vua cih.

²⁰ Langmawlya kae minpaaw hae kya bya na kinku vae hawte, na lungzinaw kha Jakob kya na langsakuh cih zah, arulaekuh leipaw na sungsahnaw kha Abraham kya na langsakuh cih.