MIKAH 6 - Zotung Bible 2016

Pachia nynh Israel Seibenaw

¹ Bawipaw nynh a hopaw bya hynh thaetua oh: Tho oh lah, mua hae malang khe nae byathan kha hopya tua oh, sangpyng hae nynh nae roi kha thae hae sah.

² Pou mua hae, zungzae atynpaw laephi athonaw aleihpaw hae, Bawipaw byathan hynh ngaetua oh; pawccecize Bawipaw tuh a ccungccaw hae tungvaw byathan hoi zah, Israel te bya a eikuh cih hae.

³ “Pou ka ccungccaw hae, nanning kha pawmou kae cyi oh? Pawtemou nae thaw kae bang sah oh? Oun khungtua oh!

⁴ Nanning kha Izip ram kyate kae cciakhae thung oh zah, seetangnaw kyate kae shawkhaw oh; nae malang khe Moses, Aaron te Miriam kha kae sawpya oh.

⁵ Pou ka ccungccaw hae, Moab siapharan Balak nynh a paccynkupaw kha thuasah, Beor ccapaw Balaam nynh bya a khungrupaw kha thuasah liathui oh, Bawipaw nynh nanning khum khylan a cyipaw kha na ny nawlan oh, Shittim kyate Gilgal kyacia acyihkuhpaw kha liathuitua oh,” a cipya hae.

Pachia nynh A Rypaw

⁶ Bawipaw malang khe paw ccyngpyate mou ka cceih cih zah, ahangnaw umpaw Pachia malang khe ka beik cih? Maee-ute silawnaw te kum kheitpaw vaetuataw hae khate tou amaw kalan ka cceih cih?

⁷ Bawipaw nynh tuutepaw thong kheit te chitui vawpi thong haw kha a lungrythua vema? Ka cyiseimenaw hanlan ka ccatawccaw kha tou ka pya cih? Ka thinlung seinaw hanlan ka ccaaw kha tou ka pya cih?

⁸ Pou ccungccapaw, aning nynh ahoypaw kha phe ae hopya vae; dingrarih lante cyi lanpaw, thawccinaw hoi lanpaw te zakawsangsakute Pachia malang hiin lanpaw kha Bawipaw nynh nang ae ngiapaw thua khyh tou?

Hynhunaw te Puathonaw kha Detahnaw

⁹ Bawipaw roi tuh khuapi kya accae (na min kha rawrinaw tuh hawnaw nynh thua): Pou khuapi kya a pumkuh hae paw, ngaetua oh!

¹⁰ Ccungccaw hoylei hae inn kya umpaw ahme leite a mue hae paw sisua te ahme leipaw tounawpaw khinlung kha ka ning kho cih tou?

¹¹ Ahme leipaw zawccu te ahme leipaw khinlung a mang hae paw tungvaw ka ngaesang kho cih tou?

¹² Khua lungkhu e mihoi hae tuh puathonaw te phe abeih hae; khua kya um hae paw tuh hynbya ho hae zah, mih khalang lungkhu kya hynbya a hopaw lae a um.

¹³ Tuhcite na seinaw keiccuze nang kha vuate ro khylan ka thotakaw vae.

¹⁴ Na ae zemah na byn lan khyh, na lungkhu kya kanmawnaw a um cih; na mue zemah na ccakhungkuh lan khyh, na ccakhungkupaw kha thaloi rhaw kalan ka pya cih.

¹⁵ Ccacii na tu zemah looh na rue lan khyh; chitui na miaa zemah chitui kha na thuhkuh lan khyh; misu thae na su zemah misutui na neih lan khyh.

¹⁶ Pawccecize Omri siapharan phungbya kha thuasah, Ahab siapharan nynh a cyipaw balyn kha thuasah na zui zah, minmin nynh tuanaw ae pya hae paw kha na zui. Tukeiccuze nang tuh ccungccaw adaepaw lang kae rae cih zah, khuaccaaw hae kha a sarya hae paw lang ka rae cih hae; tuhcite nang tuh ccungccaw hae nynh nuinsenaw kha na teing cih.