MIKAH 5 - Zotung Bible 2016

¹ Atu nanning kha koihlunawpaw pang te koihlu na thua vae oh; aening kha phe oun law vae hae; Israel uktupaw byaki kha tungbang te a bua vae hae.

Bethlehem kyate Uktu Bawi

² Pou Bethlehem Efrath, nang tuh Judah ram kyaze adihpaw khua na thua zemah, Israel a uk cih paw bawi tuh na kyate ka hanlan yn langkuh cih, aning athonaw tuh langmawlya, alawe vae paw ccyh kya a la um vae paw nynh thua.

³ Tukeiccuze neitangia a ccihpaw nopinung tuh neitaw a pui mawlaezung cia Bawipaw nynh Israel hae tuh a vua cih hae; te a laehypaw a uno hae tuh Israel hae kalan a ki cih hae.

⁴ Te aning tuh a thadyn cih zah Bawipaw thawzung khate thuasah, Bawipaw a Pachia min lesaenaw khate thuasah a tuuphu hae kha looh a dang cih hae. Minmin tuh khyndadyh lan a um cih hae, pawccecize aning tuh laephi adianaw cia alesaepaw athua cih;

⁵ aning tuh daenaw ccungccaw athua cih. Assiria hae tuh ah ram lungkhu lang oun tee hae zah, ah laephi kha he oun sy hae ze, tuurin lu sari te uktu lu tarya kha minmin dou khylan saw lan hae.

⁶ Minmin nynh Assiria ram, Nimrod ram kha thaloi te a uk cih hae zah, Assiria hae nynh ah ram lungkhu lang oun tee hae ze thuasah, ah ramri lungkhu oun sy hae ze thuasah minmin nynh aening kha oun khum cih hae.

A Laehy hae paw hanlan Malang Ccyh

⁷ Minphuin patae nynh a umlu hae paw Jakob ciihan a laehy hae paw tuh Bawipaw kyate yn ccahpaw dangtui hawte thuasah, lonua vawlan accawpaw khuaa hawte thuasah athua cih hae, tuh-e khuaa tuh ccungccaw kha doliakuh khyh zah, a chihthyapaw humhung kha sanmah ngaehoikuh khyh.

⁸ Minphuin hae laku kya ccungccaw patae nynh a umlu hae paw Jakob ciihan a laehy hae paw tuh ramkaw e loramsaw hae laku umpaw chindeih hawte thuasah, tuuphu hae laku umpaw chindeih nopaw hawte thuasah athua cih hae; chindeih nynh po a ccia vae ze, khumtu lu kheit san a um lei lan ciate, tuu hae kha syde hae zah zoihtatyh lan a pae hae.

⁹ Nang ae rawse hae paw kha na tae cih hae, na rhaw hae balyn tuh ro athua cih hae.

¹⁰ Bawipaw nynh a hopaw tuh, tuin nin vae tuh, nanning laku e nae marang hae kha ka maemih cih hae zah, nae marangle hae kha ka roh cih hae;

¹¹ nae ram e khuapi hae kha ka roh cih hae zah, nae rhawlungrua balyn kha ka ting cih;

¹² naawthya hae paw kha ka roh cih hae zah, nae kya beidinhothya hae paw um vae lan khyh hae;

¹³ nae kya um hae paw zohtuh hae te na beik oh paw tung hae kha ka roh cih hae, nae kuih te na raeku oh paw kha na beik vae lan khyh oh;

¹⁴ nae kya umpaw Asherah zohtuh hae kha ka khulia cih hae zah, nae khua hae kha ka roh cih.

¹⁵ Ka bya a ngae lei hae paw minphuin hae kha thinria bungpaw te ka liaru cih hae.