MATTHAI 28 - Zotung Bible 2016

Jesu Thoothuinaw

¹ Sabbath nin koute lonaw naw kheit kyaze masaty nin awkhua khuadaetakaw khe Magdala khuanung Mary te ccangpaw Mary tuh shaw do lan a cceih hae.

² Vaekheihmawte myarya rupaw innry yn suekuh; pawccecize Bawipaw vaawpaw nynh vaawlang te yn rung zah shaw athuhfu kha a nue koute a vawlan khe a haung.

³ A muinsan tuh khozaw te lokuh zah a boeining tuh vuiraw hawte araw.

⁴ Shaw a rintu hae tuh tuh-e paw raw a ri hae keiccuze thyngkuh hae zah, kharouh chihpaw hawte nynh athua hae.

⁵ Vaawpaw nynh nopi hae kha, “Rih nan oh, nanning nynh a khiade hae paw Jesu kha nynh na ccung oh cipaw ka ny.

⁶ Aning tuh hein kya um vae khyh, a ho hawte a thoothui vae. Rang oh lah a ccynaw hae hmin hynh oun dotua oh.

⁷ Arangte la cceih oh lah a zuitu hae kyakhe, ‘Aning tuh chinaw kyate a thoothui vae; Galilee ram lang nae malang phe cceih vae cih, tuin kya amaw kha na la muih cih oh,’ cite la hopah oh. Nanning kha kae hopya vae oh,” a cipya hae.

⁸ Tukeiccuze nopi hae tuh ri biate, lungtuanaw alepi te shaw kyate rangsakute cceih hae zah a zuitu hae kha hopya khylan a ccue hae.

⁹ Tualeipite Jesu nynh minmin kha yn tungkuh hae zah, “Nae kya daenaw um sah!” a cipya hae. Minmin nynh amaw kalan cceih hae zah a ccu kha pom hae zah a beik hae.

¹⁰ Jesu nynh minmin kha, “Rih nan oh; cceih oh lah ka uno hae kha Galilee lang ccia lan la hopah oh, tuin kya minmin nynh kae kha yn muih cih hae,” cite a hopya hae.

Shaw Rintu hae kyate Thaesahnaw

¹¹ Tuh-e nopi hae a ccia lya hae khe, shaw rintu hae abang nynh khuapi lungkhu lang cceih hae zah acyihkuhpaw balyn kha ranpibawi lepaw hae kya a hopya hae.

¹² Ranpibawi lepaw hae tuh piccan hae ryte tungkuh hae zah khua a khan kou hae te, rhawkaw hae kha phua patae pya hae zah,

¹³ “Nanning nynh, ‘Khuazi marya kae itheih lyakhe a zuitu hae nynh oun cceih hae zah a rhua kha phe ru hae,’ nae ci cih oh.

¹⁴ E kong hynh ram uktu nynh yn thae ze kaemaw nynh kae soihbia cih zah vawsaw kae tungsah lan khyh oh,” cite a hopya hae.

¹⁵ Tukeiccuze minmin nynh phua kha lawkuh hae zah a hopya hae thyhte a cyi hae; e kong hynh Judah hae nynh atunin cia a ho ung hae.

Zuitu hae Ryalaw Nawnaw

¹⁶ Zuitu hae lu haw lae kheit tuh Jesu nynh a hopya sya hae paw Galilee ram e mua langkhe a cceih hae.

¹⁷ Amaw kha he a muih hae te a beik hae; thuasalama abang tuh lunghiinnaw a hoi hae.

¹⁸ Jesu nynh yn thua zah, “Vaawlang te laephi vawlan e kawhoinaw balyn tuh kamaw kalan pya athua vae.

¹⁹ Tukeiccuze la cceih oh lah minphuin hae balyn kha zuitu lang la rae oh, Paaw, Ccapaw te Thyaa Muisaw min te baptisma la pya oh.

²⁰ Kaw kae pya oh paw balyn kha a zui nawlan hae la ccangpah oh; laephi she athang cia nae kya tyty ka um,” cite a zuitu hae kha a hopya hae. Amen.