MATTHAI 23 - Zotung Bible 2016

Kawbya Sazae hae te Farasi hae

¹ Te Jesu nynh ccungccaw zapi te a zuitu hae a hopya hae paw bya tuh:

² “Kawbya sazae hae te Farasi hae nynh tuh Moses tungkhung kya nynh a haung hae.

³ Tukeiccuze minmin nynh ae ccangpya oh paw miakaw kha zui oh lah cyih oh; thuasalama a cyi hae hawte la cyihbua nan oh, pawccecize minmin tuh ho hae zah cyih khyh hae.

⁴ Minmin nynh phupaw aripaw te phu arupaw kha tung hae zah ccungccaw hae raw vawlan a khang hae, thuasalama mimaw tuh mih kuihdung te sanmah nue ry khyh hae.

⁵ Thuasalama rya a law hae paw balyn kha ccungccaw hae nynh muih hae sah cite leih a law hae. Mih terui kya te mih kuihbaw kya a khiibiaku hae paw Ccathyaa zeikuhpaw bawngtaraw kha kosah hae zah mih angkile adung kha a ccuasaku hae.

⁶ Poi kya ahoy huanaw hmin kha ry hae zah sinakok hae kya ahoy huapaw haungnaw hae kya haung lan a ry hae.

⁷ Kungkunaw hae kya sawtuate byabeihku ry hae zah ccungccaw hae nynh, ‘Sazae, Sazae’ cite koku kha a ry hae.

⁸ Thuasalama nanning tuh ‘Sazae’ cite la kokuh ry nan oh; pawccecize nanning nynh sazae lu kheit rou nynh na hoi oh; nanning balyn tuh siaimua hae nynh na thua oh.

⁹ Laephi vawlan hum sanmah ‘Apang’ cite ko nan oh; pawccecize vaawlang umpaw nae Paaw lu kheit rou nynh Paaw na hoi oh.

¹⁰ ‘Lupi’ cite mah la kokuh ry nan oh; pawccecize lupi lu kheit kyalya na hoi oh zah amaw tuh Messiah nynh thua.

¹¹ Nanning lakuze ale huapaw tuh nae ryalahtu lang a tang cih.

¹² Humhung zemah amaw te amaw a hangsakuhpaw tuh sawbung athua cih; amaw te amaw zakaw a sangsakuhpaw tuh hangthung athua cih.

¹³ “Thuasalama kawbya sazae hae te Farasi hae, thyaruh hae, nae hanlan ngaethya lan kou um! Pawccecize vaawlang peenaw thuakaw kha ccungccaw hae elang phe na khaw oh, naemaw mah na tee khyh oh zah a tee ry hae paw mah na uapah khyh oh.

¹⁴ Kawbya sazae hae te Farasi hae, thyaruh hae, nae hanlan ngaethya lan kou um! Pawccecize nomae hae inn kha na luade oh zah cyisakuthya nawlan saw kha khaw cia na sang oh; tukeiccuze ale huapaw detahnaw kha na teing cih oh.

¹⁵ Kawbya sazae hae te Farasi hae, thyaruh hae, nae hanlan ngaethya lan kou um! Pawccecize ccungccaw lu kheit a beiknaw paleih khylan rili te laephi kya khua na ccong oh, he yn paleihkuh tuh tuh-e paw kha naemaw laeze leit ning hell kalan ccawsah lan rya na law oh.

¹⁶ “Cciakhaetu hae mitmoh hae, nae hanlan ngaethya lan kou um! Nanning nynh ‘Humhung zemah beikinn phyate thyalawku ze pawtua-ung khyh; thuasalama humhung zemah beikinn kya-e sui phyate thyalawku ze atyn,’ na ci oh.

¹⁷ Nanning mingaee hae te mitmoh hae! Sui tou abyapihua, tuhkhyhze sui a thyaasahpaw beikinn tou abyapihua? Pawtuhmou abyapihua?

¹⁸ Te ‘Humhung zemah silawhang phyate thyalawku ze pawtua-ung khyh, thuasalama humhung zemah silawhang vawlan umpaw lasung phyate thyalawku ze atyn,’ na ci oh.

¹⁹ Nanning mingaee hae te mitmoh hae! Silawhang vawlan e lasung tou abyapihua, tuhkhyhze lasung a thyaasahpaw silawhang tou abyapihua? Pawtuhmou abyapihua?

²⁰ Tukeiccuze silawhang phyate thya a lawku ze silawhang ry, a vawlan umpaw lasung balyn ryte thya a lawde vae.

²¹ Beikinn phyate thya a lawku ze beikinn te tuin kya umpaw Pachia kha thya a lawde vae.

²² Te vaawlang phyate thya a lawku ze Pachia kya-e bawitungkhung phyate thyalawkuhpaw thua zah, tuh-e vawlan a haungpaw Pachia phyate thyalawkuhpaw nynh thua vae.

²³ “Kawbya sazae hae te Farasi hae, thyaruh hae, nae hanlan ngaethya lan kou um! Pawccecize nanning nynh hangmae, pucinan te khanmuin kha pumhaw pumkheit na pya oh zah kawbya kyaze akhincci huapaw atazanaw, ngaethyaumsahnaw te lungzinaw tuh pawlang na ria khyh oh; ccangpaw kha mah sawphah leite hynh-e hae hynh na cyi lan oh paw nynh thua.

²⁴ Cciakhaetu hae mitmoh hae, na nia lan oh paw tui kya-e maseih khaze na kihbia oh zah kalauh khaze po na due oh.

²⁵ “Kawbya sazae hae te Farasi hae, thyaruh hae, nae hanlan ngaethya lan kou um! Pawccecize nanning nynh banang te pake kha avawlan kyalya na sing oh, thuasalama alungkhu tuh luadenaw te karankunaw khate phe abeih.

²⁶ Farasi mitmoh hae, pakekhupaw te banang alungkhu kha singty oh, tuhteze nynh tuh-e hae avawlan kha mah athyaabua cih.

²⁷ “Kawbya sazae hae te Farasi hae, thyaruh hae, nae hanlan ngaethya lan kou um! Pawccecize nanning tuh asi rawpaw a thuh hae paw shawku te nynh na loku oh; avawlan tetuh kou puithya salamah alungkhu tuh michi hae ru te athupaw aphuinphuin te phe abeih.

²⁸ Tuhawte nanning mah avawlan tetuh ccungccaw hae malang adingpaw hawte nynh na langku oh, thuasalama nae lungkhu tuh thyaruhnaw te hoyleinaw te nynh phe abia.

²⁹ “Kawbya sazae hae te Farasi hae, thyaruh hae, nae hanlan ngaethya lan kou um! Pawccecize profeh hae shawku kha na raepah oh zah miding hae lungbing kha na ccaan oh.

³⁰ Nanning nynh, ‘Kae minpaaw hae she lyakhe kae la hiinbua ze, profeh hae chiise luasahnaw kya kae umbua lan khyh,’ na ci oh.

³¹ Tukeiccuze nanning tuh profeh hae a la theih hae paw ciihan hae nynh kae thua cipaw kha naemaw toulou nynh ccaekia na khanku vae oh.

³² Tukeiccuze nae minpaaw hae kya-e cyisahnaw tounawpaw kha phe biasah lalae oh.

³³ Nanning hupaw hae, huparepaw ciihan hae! Pawtemou hell kalan ccawnaw kyate na lue kho cih oh?

³⁴ Tukeiccuze profeh hae, mihaw hae te kawbya sazae hae kha nae kalan kae saw hae; te minmin lakuze abang kha nae theih cih oh zah nae khiade cih oh; abang kha nae sinakok hae kya nae bua cih oh zah khua khuakheit kyate khuakheit kalan nae dee cih oh.

³⁵ Tukeiccuze adingpaw Abel chiise kyate, beikinn te silawhang laku na chia oh paw Berakhiah ccapaw Zekhariah chiise kyacia laephi vawlan aluapaw miding hae chiise balyn tuh nae tungvaw accah cih.

³⁶ Byaccaccing kae hopya oh, e uccaw hae balyn hynh atu she e ccungccaw hae tungvaw yn ccah cih.

Jerusalem elang Jesu A Rah

³⁷ “Pou Jerusalem, Jerusalem, nang nynh profeh hae kha na theih hae zah na kalan oun saw hae paw ccungccaw hae kha lung te na deih hae; awpinung nynh a taw hae kha a sake kaw a khong hae hawte na ccaaw hae kha pynkheihlan suelua lan palei ka ry, thuasalama na ry khyh!

³⁸ Na inn tuh vuasya thua zah ccungccaw phe adae vae.

³⁹ Pawccecize kae hopya oh, ‘Bawipaw min te yn thuapaw Ccungccaw tuh hythua ccoupaw nynh thua,’ cite na ho mawlaezung oh, atu te nae muih vae lan khyh oh,” a ci.