MATTHAI 2 - Zotung Bible 2016

Nithua langte Mihaw hae

¹ Herod siapharan lang a tang lya Judea ram Bethlehem khua kya Jesu a pui koute nithua langte awsi dothya hae paw mihaw hae tuh Jerusalem khua oun thua hae zah,

² “Judah siapharan lang a puipaw imua tuh teisangmou a um? Nithua langte yn thuapaw amaw awsi kha kae muih zah amaw beik lan nynh kae thua,” a ci hae.

³ Herod siapharan nynh e bya kha he a thae tuh a thinphang zah Jerusalem khuaccaaw hae balyn mah mih thinphang.

⁴ Aning nynh ranpibawi lepaw hae mih balyn te ccungccaw hae kyaze kawbya sazae hae balyn kha pynkheihlan ko hae zah, “Teisangmou Messiah tuh a pui cih?” cite a khia hae.

⁵ Minmin nynh, “Judea ram Bethlehem khua kya nynh a pui cih; pawccecize profeh nynh hynhte a zei:

⁶ ‘Judah ram umpaw Bethlehem, nang tuh Judah ram khuapi hae lakuze adih huapaw na thua khyh; pawccecize na kyate ka ccungccaw Israel hae tuurintu yn pou cih!’ a ci,” cite a hopya hae.

⁷ Tetuh Herod nynh mihaw hae kha aruh lante ko hae zah, hohtuh ccyh kya mou awsi yn langku cite akaw-aleih a khia hae.

⁸ Tuinte minmin kha Bethlehem lang saw hae zah, “La cceih oh lah imua kha thawte oun ccung oh; amaw kha nae muih oh te, nae hopah bua cih oh, kae mah kae cceih cih zah ka beikbua ccaw,” a cipya hae.

⁹ Siapharan bya he a thae kou hae te minmin tuh a pou hae; te nithua lang a muih hae paw awsi tuh mih malang khe cceih zah imua a umnaw luki khe a thadyn.

¹⁰ Awsi a thadynpaw kha a muih hae tuh myaryamaw mih lungtua.

¹¹ Te inn lungkhu lang tee hae zah imua te a nung Mary kha a muih hae, te ccukharutungte amaw kha a beik hae; minmin nynh mih sisua bawng hae kha hung hae zah sui, frankinsen te mura kha lasung lang a pya hae.

¹² Minmin tuh Herod kalan a ki vae khyh nawlan hae Pachia nynh mih maan kya raeringnaw a pya hae keiccuze laanpi ccanglang te mih ram lang a ki hae.

Izip lang Ccuekhaenaw

¹³ Minmin he a cceih kou hae te, Bawipaw vaawpaw tuh Josef a maan kya yn langkuh zah, “Thokuh lah imua te a nung kha hoei hae lah Izip ram lang ccuekhae hae, bya kae hopya makhia tuin kya la um, pawccecize Herod nynh imua kha chia khylan yn ccung vae cih,” a cipya.

¹⁴ Josef nynh thokuh zah imua te a nung kha hoei hae zah khuazi khe Izip ram lang a cciakhae hae.

¹⁵ Herod a chi mawlaezung tuin kya nynh a um. E tuh Bawipaw nynh profeh kyate, “Ka ccapaw kha Izip ram kyate ka ko vae,” cite a hopaw kha accingnawpaw nynh thua.

¹⁶ Mihaw hae nynh yn ling vae hae cipaw kha Herod nynh he a nyh tuh myaryamaw a thinria, te mihaw hae nynh a ho hae paw accyh kha a khyase koute ccungccaw saw zah Bethlehem khua te a pepan umpaw, kum ning te akaw lang e pise imua hae balyn kha marya a chiasah hae.

¹⁷ Tuhcite profeh Jeremiah nynh a la hopaw bya tuh accing vae.

¹⁸ “Ramah khua kya rawkhuinaw te myarya ccihpaw rawnaw roi kha thae athua. Rachel tuh a ccaaw hae hanlan rawkhuite a um; a ccaaw hae tuh a um vae khyh hae keiccuze soihbiaku ry vae khyh.”

Izip Ram kyate A Ki hae

¹⁹ Herod he a chih te, Bawipaw vaawpaw tuh Izip ram kya Josef a maan kya yn langkuh zah,

²⁰ “Thokuh lah imua te a nung kha hoei hae lah Israel ram lang kikhae ccavae hae, pawccecize imua hiinnaw a ccung hae paw tuh phe chih vae hae,” a cipya.

²¹ Te Josef tuh thokuh zah imua te a nung kha hoei hae zah Israel ram lang a kikhae hae.

²² Thuasalama Arkhelaus nynh a paaw Herod ccelang Judea ram kha a uk cipaw Josef nynh he a thae tuh tuh-e ram lang ccia lan a rih; tuhzemah Pachia nynh a maan kya a hopya thyhte Galilee ram lang a cceih.

²³ Te Nazareth cikuhpaw khua kyakhe a um. “Aning tuh Nazareth khuapaw cite ko athua cih,” cite profeh hae nynh a ho hae paw kha accingnawpaw nynh thua.