MARKA 6 - Zotung Bible 2016

Nazareth kya Zyn leinaw

¹ Jesu tuh tuin kyate cceih zah amaw a khua lang a thua, a zuitu hae nynh amaw kha a zui hae.

² Sabbath nin kya sinakok kyakhe a ccangpya hae, a thae hae paw patae tuh mih ngaeangthua zah, “E hae balyn hynh paw kyate mou a mueku? Aning nynh a muekupaw e hawnaw hynh pawtecihpaw hawnaw mou? Pawtemou hynhcih ngaeangthua lan umpaw ryalaw hae hynh a kuih te a cyi kho?

³ E paw tuh Mary Ccapaw, lehccamapaw kha thua khyh tou? James, Joses, Judah te Simon mih upaw thua khyh tou? A ccianung hae tuh aening ryte hein kya mang um hae khaw?” cite ho hae zah amaw kha pawlangria khyh hae.

⁴ Jesu nynh, “Profeh tuh amaw a khua, a puizia hae te a innbyn kya holeite hmin ccanglang tuh saw a tua hae,” a ci.

⁵ Tuin kya tuh ngeccih hae beihtaraw tungvaw a kuih khang zah a dansah hae paw laelan ngaeangnaw rae kho vae khyh.

⁶ Zynnaw a hoi khyh hae keiccuze Jesu tuh a ngaeangthua. Te tuin pepan e khua hae kalan cceih zah a ccangpya hae.

Lu Haw Lae Ning A Saw hae

⁷ Zuitu lu haw lae ning kha ko hae zah lu ning ccite a saw hae; te athyaa leipaw muisaw hae tungvaw kawhoinaw kha pya hae zah,

⁸ “Khua na ccongnaw oh kya hoitang ccangkheit laelan pawpaw sanmah ccyngkuh nan oh; sohrae thuasah, sanlou thuasah, phuabu kya phua thuasah phukuh nan oh.

⁹ Phanah nawkuh oh lah, angki zung ning kikuh nan oh,” cite kaw a pya hae.

¹⁰ Te minmin kha, “Teitei hmin kya zemah inn innkheit lungkhu lang na tee vae oh ze, tuh-e hmin kyate na pou makhia oh tuin kya la um oh.

¹¹ Te humhung zemah nanning kha innccong ae doih oh zah nae bya a ngae khyh hae ze, tuin kyate na pou lya oh khe minmin rawsenawpaw ccaekia lang nae ccu kya-e vuiping kha la khuanua sya oh,” a cipya hae.

¹² Te minmin nynh cceih hae zah ccungccaw hae kha a ngaesiku nawlan hae phung a hopya hae.

¹³ Minmin nynh raerangsaro patae dee hae zah ngeccih patae kha chitui thuhpah hae zah a dansah hae.

Baptisma Pyatu Johan Lu Paenaw

¹⁴ Jesu tuh a min athaan keiccuze Herod Siapharan nynh amaw kong kha a thae. Abang nynh, “Baptisma pyatu Johan nynh chinaw kyate a thoothui, tukeiccu nynh ngaeangnaw patae a rae kho,” a ci hae.

¹⁵ Mingccang hae nynh, “Elijah nynh thua,” a ci hae. Te mingccang hae nynh, “Langmawlya e profeh lukhakheit hawte profeh nynh thua,” a ci hae.

¹⁶ Thuasalama Herod nynh he a thae tuh, “A lu ka paepaw Johan nynh yn thoothui vae,” a ci.

¹⁷ Pawccecize Herod nynh a neitawpaw Filip zu, Herodias kha a zu lang a dyku keiccuze ccungccaw saw zah Johan kha kyngsah te hesah hae zah thong a sawsah hae.

¹⁸ Pawccecize Johan nynh Herod kha, “Na neitawpaw zu tuh na dyku lan ccan khyh,” a cipya.

¹⁹ Tukeiccuze Herodias nynh Johan kha lung-ungtungpah zah chia lan a ry; thuasalama theih kho khyh.

²⁰ Pawccecize Johan tuh adingpaw te athyaapaw ccungccaw nynh thua cipaw kha Herod nynh a ny keiccuze a rawrih zah a thungkhaw. Johan bya kha he a thae vae ze, a lunghoy khyh, tuhzemah a bya kha a ngaepya ry.

²¹ Herod nynh a pui nin kya uktu bawi hae, rhawbawi hae te Galilee pee e cciakhaetu hae elang loohdangnaw poi he a tua tuh Herodias hanlan ccyhhoy yn thua vae.

²² Herodias ccanung nynh tee zah he yn law tuh Herod te a mikhia hae kha mih lungry a thuasah hae; tukeiccuze siapharan nynh nopinung taraw kha, “Na rypaw miakaw yn ngiakuh lah kae pya cih,” a cipya.

²³ Tukoute, “Nae ngiakupaw miakaw kae pya cih, ka peenaw angankuh cia heize kae pya cih,” cite thyalawkute bya a kinpyaku.

²⁴ Nopinung taraw nynh toikuh zah a nung kyakhe, “Pawmou ka ngiakuh cih?” cite a khia. A nung nynh, “Baptisma pyatu Johan lu kha ngiakuh,” a cipya.

²⁵ Tuh-e nung nynh vaekheihmawte siapharan kalan ki kangmaw zah, “Baptisma pyatu Johan lu kha pakephepaw te atumaw yn pya ci nynh ka ry,” cite a ngiaku.

²⁶ Tetuh siapharan tuh myaryamaw a ngaethah, tuhzemah a kinku vae paw bya te a mikhia hae keiccuze tuh-e nung kha ei ry vae khyh.

²⁷ Tukeiccuze siapharan nynh rhawkaw lu kheit kha palou saw zah Johan lu thuakhae lan kaw a pya; tuh-e paw nynh cceih zah thonginn kyakhe Johan lu kha a pae.

²⁸ Te a lu kha pakephepaw te yn ccyng zah nopinung taraw kha a pya; tuh-e nung nynh tuh-e tuh a nung kalan a pya.

²⁹ Tuh-e kong tuh Johan zuitu hae nynh he a thae hae te, oun cceih hae zah a rhua kha lah hae zah shaw kya a ccy hae.

Thong Pangaw Looh Dangnaw

³⁰ Locceihtu hae nynh Jesu kalan oun sueluakuh hae zah a cyi hae paw te a ccangpya hae paw balyn kha a hopya hae.

³¹ Jesu nynh minmin kha, “Nae makhaete ccungccaw adaenaw lang rang oh; sosoh haeung oh,” a cipya hae; pawccecize a teepaw te a poupaw ccungccaw myarya lung zah minmin tuh aenaw ccyh san hoi khyh hae.

³² Te minmin tuh mih makhaete ccungccaw adaenaw lang kohlung te a cceih hae.

³³ A ccia hae paw kha ccungccaw patae nynh muih hae zah hum hae mou cipaw a ny hae keiccuze khua takyh kyate mih ccu te oun rangsakuh hae zah locceihtu hae laeze a thuaty hae.

³⁴ Jesu tuh kohlung kyate yn pou zah ccungccaw zapi kha a muih hae tuh ngaethya a umsah hae, pawccecize minmin tuh tuurin a hoi leipaw tuu hae nynh a lo hae; te minmin kha patae a ccangpya hae.

³⁵ Zete tuh a zuitu hae nynh a kalan oun cceih hae zah, “E kya tuh ramkaw thua zah atu khua yn zi vae cih.

³⁶ E ccungccaw hae hynh anaenaw umpaw khua taraw hae te khua hae kalan ccia sah hae lah mimaw elang aepaw hankhakheit la rekuh hae sah,” cite a hopya hae.

³⁷ Jesu nynh khung hae zah, “Nanning nynh minmin kha ae lanpaw hankhakheit pya oh,” a cipya hae. Te minmin nynh, “Kae cceih cih zah denari phua za ning mee sanlou kha kae re cih zah tetou ae lan kae pya cih hae?” cite a khia hae.

³⁸ Jesu nynh, “Sanlou hohzeihmou na hoi oh? Cceih oh lah dotua oh,” a cipya hae. Minmin nynh a do kou hae te, “Sanlou phe pangaw te ngasaw zaw ning,” a ci hae.

³⁹ Tetuh Jesu nynh ccungccaw hae balyn kha lonua ahinpaw vawlan aphuphute haungsah lan a zuitu hae kha kaw a pya hae.

⁴⁰ Te ccungccaw hae tuh za kheit phu, sung pangaw phu cite aphuphute a haung hae.

⁴¹ Jesu nynh sanlou phe pangaw te ngasaw zaw ning kha lah zah vaawlang dothung zah lungtuabya a ho koute sanlou kha eih zah a zuitu hae kha ccungccaw hae malang nyapya lan a pya hae; ngasaw zaw ning kha mah ccungccaw hae pong a nee hae.

⁴² Ccungccaw hae balyn tuh ae hae zah phe byn hae.

⁴³ A zuitu hae nynh ngasaw te sanlou a eihpaw kha kee haw lae ning phe beih lan a khuin hae.

⁴⁴ Sanlou a ae hae paw tuh pise thong pangaw loukaw acih hae.

Jesu Tui vawlan A Cceih

⁴⁵ Jesu nynh ccungccaw zapi a saw lya hae khe, a zuitu hae kha arangte kohlung kya ccisakuh hae zah khuraw lang e Bethsaida khua lang a cciasah lalo hae.

⁴⁶ Minmin kha a saw kou hae te Jesu tuh sawsang lan mua langkhe a cceih.

⁴⁷ Khua yn zi tuh kohlung tuh rili ngaelung kya um zah Jesu tuh a makhaete laerou kya a um.

⁴⁸ Khisan nynh arawsekuh lante azaw keiccu zuitu hae nynh thawte kohlung a zaw hae paw kha a muih; awkhua suimilan ccangthum te ccangtaruh laku khe minmin pe po ccia lan cite mih kalan rili vawlan khe a cceih.

⁴⁹ Thuasalama minmin nynh rili vawlan a cciapaw kha a muih hae tuh khozi nynh thua cite tua hae zah a sia hae.

⁵⁰ Pawccecize mih balyn te amaw kha muih hae zah a rih hae. Jesu nynh bya hopah kangmaw hae zah, “Nae thinphang nan sah, kamaw nynh ka thua, rih nan oh,” a cipya hae.

⁵¹ Kohlung lungkhu lang mih kalan kaebua zah khisan tuh zya adae; minmin tuh myaryamaw mih ngaeangthua.

⁵² Pawccecize mih thinlung akhung keiccuze sanlou kya a langsahkupaw kha thaethya khyh hae.

Genesaret kya A Dansah hae

⁵³ Minmin tuh khuraw a zua kou hae te, Genesaret ram kya thua hae zah varang langkhe kohlung kha a khii hae.

⁵⁴ Kohlung kyate he a pou hae tuh ccungccaw hae nynh amaw kha palou a ny hae.

⁵⁵ Tuin pepan e ram hae balyn kalan khe ccue hae zah ngeccih hae kha mih iphae ryte Jesu a um cite a thaenaw lang hae khe oun thuakhae hae.

⁵⁶ Jesu a ccianaw miakaw khua taraw hae, khuapi hae kya thuasah, loo kya thuasah ngeccih hae kha kungkunaw hmin kya nung hae zah, minmin nynh a boei dung sankaw kha a hae nawlan hae amaw kha a ngia hae; tuh-e a haepaw miakaw tuh a dan hae.