MALAKHI 4 - Zotung Bible 2016

Bawipaw Nin Alesaepaw

¹ Somaee hawte asopaw nin tuh yn thua cih, a lysakuh hae paw te hoyleinaw a raetu hae balyn tuh ccatanphue athua cih hae; mih tharui te mih karan hae kha a laehypaw um lei lan ciate tuh-e nin nynh khaleih a u cih hae, cite vaaw Bawipaw nynh a ci.

² Thuasalama ka min saw na tua oh paw nanning hanlan tuh a sake kya dannaw a umpaw dingnaw khuanin yn thua cih. Sahiinkhia kyate vaetuataw hae thohkute a pou hae hawte lungtuate na pou cih oh.

³ Ka paccynpaw nin kyakhe ccungccaw hoylei hae paw kha na syde cih oh zah, nae ccuphe kaw khe buhhaw lang a tang cih hae, cite vaaw Bawipaw nynh a ci.

⁴ Ka ryalahtu Moses a ccangpyanaw kha liathui oh, Israel hae balyn hanlan Horeb mua kya amaw ka pyapaw phungbya hae te phungzae hae kha liathui oh.

⁵ Alesaepaw nin te ri lan umpaw nin, Bawipaw nin yn thua mawkhe, profeh Elijah kha nae kalan kae saw cih.

⁶ Ram kha thyalawte detah khylan kae thua khyh nawlan, aning nynh nungpaaw hae kha ccaaw hae te thuasah, ccaaw hae kha nungpaaw hae te thuasah a ccawsakuh thui cih hae.