LUKA 2 - Zotung Bible 2016

Jesu Khri Puinaw

¹ Tuh ccyh lyakhe Siapharan Awkastas nynh ram pynpi balyn kya milu riaku athua cih cite kaw a tho.

² E milu rianaw hynh masaty milu rianaw thua zah Kuirinias nynh Siria ram a uk lya nynh thua.

³ Ccungccaw hae balyn tuh milu riaku khylan mih khua raveih lang a cceih hae.

⁴ Josef mah David ciihan athua keiccuze, Galilee ram Nazareth khua kyate Judea ram Bethlehem a ci hae paw David khua lang a cceih.

⁵ A zu lang a dykupaw Mary ryte milu riaku lan a cceih hae; Mary tuh ccaawpoi zah,

⁶ tuin kya a um lya hae khe, neitaw pui lan aninsaw akyh.

⁷ Mary a ccatawccaw tuh yn pui zah nolung te a lung koute, vaetua looh-aenaw kua kya a isah; pawccecize minmin hanlan mikhia thuanaw inn kya akhaan um vae khyh.

Tuurin hae te Vaaw hae

⁸ Tuin ram kya khuazi khe mih tuuphu kha rin hae zah ramkaw kya a um hae paw tuurin hae a um hae.

⁹ Bawipaw vaawpaw nynh mih kalan yn thua zah Bawipaw phu-enaw tuh mih pepan phaephae a aw; te minmin tuh myarya a rih hae.

¹⁰ Thuasalama vaawpaw nynh minmin kha, “Rih nan oh, pawccecize ccungccaw balyn hanlan myarya lungtua lan umpaw thongpang hoypaw kha kae thuakhaepya oh:

¹¹ Pawccecize atunin David khua kya nanning hanlan Khumtu Bawi Khri a pui vae.

¹² E hynh nanning hanlan syntawnaw athua cih: imua kha nolung te lung hae zah vaetua looh-aenaw kua kya a isah hae paw kha na la muih cih oh,” a cipya hae.

¹³ Vaekheihmawte vaawpaw ryte vaaw rhawkawbuupi tuh oun langkuh hae zah Pachia kha a thehoysah hae zah,

¹⁴ “Ahang huapaw vaawlang kya Pachia tuh phu-esah thua sah, a sungsah hae paw a umnaw hae lae vawlan hin daenaw um sah!” a ci hae.

¹⁵ Vaaw hae tuh mih kyate vaawlang he a cceih hae te, tuurin hae nynh, “Atu Bethlehem lang cceih oh sih lah Bawipaw nynh oun nysahpaw hynh-e uccaw acyihkuhpaw hynh dotua oh sih,” cite lu kheit te lu kheit a hoku hae.

¹⁶ Minmin tuh arangte cceih hae zah Mary, Josef te vaetua looh-aenaw kua kya a ihpaw imua kha a muih hae.

¹⁷ Tuurin hae nynh imua kha he a muih hae tuh, vaaw hae nynh imua konglang a hopya hae paw kha ccungccaw hae kya a ho pathy hae.

¹⁸ Tuurin hae nynh a ho hae paw bya a thae hae paw balyn tuh mih ngaeangthua.

¹⁹ Mary nynh tuh-e balyn tuh a thinlung kya ccykekuh zah thawte a tua.

²⁰ Tuurin hae tuh vaawpaw nynh a hopya hae thyhte, a thae hae paw te a muih hae paw balyn hanlan Pachia kha phu-esah hae zah thehoysah biate a ki hae.

Beikinn kya Jesu Thuakhaenaw

²¹ Nin tarya ccing vae zah imua kha vingdungaw ccyh yn zaw tuh, Jesu cite min a phu hae, tuh-e min tuh a nung nynh a poi mawze vaawpaw nynh a phu ty vae paw min nynh thua.

²² Moses kawbya thyhte, Mary te Josef elang thyaasahkunaw ccyh yn zaw tuh, minmin nynh imuapaw kha Bawipaw kalan thuakhae khylan Jerusalem lang a cciakhae hae,

²³ (Bawipaw Kawbya kyaze, “Ccatawccaw pise miakaw tuh Bawipaw kalan pya athua cih,” cite azeikuh);

²⁴ “vahu bua kheit, tuhkhyhze valaele anopaw sa ning te silawnaw na rae cih oh,” cite Bawipaw kawbya kya a um thyhte, minmin nynh silawnaw a rae hae.

Simeon Anna nynh Thehoysah hae

²⁵ A min Simeon a ci hae paw ccungccaw lu kheit tuh Jerusalem kya a um. Aning tuh adingpaw te beiknaw lang a zuakuhpaw nynh thua, Israel hae ngaengannaw kha a ngaehoipaw thua zah Thyaa Muisaw tuh amaw kya a um.

²⁶ Thyaa Muisaw nynh amaw kha, Bawipaw kya-e Messiah kha na muih makhia na chih lan khyh, cite a hopya.

²⁷ Muisaw nynh cciakhae zah Simeon tuh beikinn voidu kya a thua; imuapaw Jesu kha kawbya phung thyhte cyipya lan cite a nung te a paaw nynh he a teekhae hae tuh,

²⁸ Simeon nynh imua kha a kuih kya duate Pachia kha thehoysah zah,

²⁹ “Bawipaw, na bya thyhte atu na seepaw hynh daebabi lan yn cciasah ccavae;

³⁰ pawccecize na khumnaw kha ka mit te phe ka muih vae,

³¹ tuh-e tuh ccungccaw balyn muihnaw kya na paccyn vae;

³² tuh-e tuh Zenta hae a awsah cih paw awnaw te na ccungccaw Israel hae hanlan phu-enaw nynh thua,” cite a ho.

³³ Simeon nynh imuapaw konglang a hopaw kha a thae hae tuh, Josef te a nung tuh mih ngaeangthua.

³⁴ Simeon nynh minmin kha hythuapya hae zah a nung Mary kha, “E imua tuh Israel hae patae khulia nawlan te tho nawlan Pachia nynh a popaw nynh thua. Amaw tuh ccungccaw hae nynh a thethyasah hae paw te Pachia kyate yn thuapaw syntawnaw athua cih zah,

³⁵ mih thinlung kya-e tuanaw balyn kha a langsahtu lang a tang cih. Thaloi nynh namaw na thinlung kha mah ae thuing cih,” a cipya.

³⁶ Asher phin, Fanuel ccanung Anna a ci hae paw profehnung lu kheit a um. Aning tuh myarya taw vae, vawpaw a hoi koute kum sari cia a vawpaw ryte a umkheih hae.

³⁷ Sung tarya kum pali cia nomaenung lang a tang, khuazi khuadae sawsangte looh-ae sungte Pachia beik zah beikinn kyate papin pou khyh.

³⁸ Aning mah tuh ccyh lyakhe yn tee zah Pachia kha the a hoysah, te Jerusalem tuh shawkhaw athua cih cite a ngaehoi hae paw balyn kyakhe tuh-e imua kong kha a hopya hae.

Nazareth lang A Ki hae

³⁹ A nung te a paaw nynh Bawipaw kawbya thyhawte pawpaw balyn kha phe a cyih kou hae te, Galilee ram umpaw mih khua Nazareth langkhe a ki hae.

⁴⁰ Imua tuh yn lethung zah myarya a thung, hawnaw te beih zah Pachia thawccinaw tuh a tungvaw a um.

Beikinn kya Imuapaw Jesu

⁴¹ A nung te a paaw tuh Kawtaw Poi ccyh kya kum takyhte Jerusalem lang leih a cceih hae.

⁴² Jesu tuh kum haw lae ning he acih te, Kawtaw Poi phung thyhawte Jerusalem lang a cceihthung hae.

⁴³ Poi nin he athang te a nung te a paaw tuh a ki hae, imuapaw Jesu tuh Jerusalem kya a umhy ung, Josef te a nung nynh tuh-e tuh nyh khyh hae.

⁴⁴ A kikheih hae paw kya nynh a umbua cih cite minmin nynh tua hae zah nin kheit laanccia cia a cceih vae hae; te mih vaeccaw hae te mih ban hae kya a ccung hae.

⁴⁵ Minmin nynh amaw kha a muih khyh hae keiccuze Jerusalem lang bua ki hae zah a ccung hae.

⁴⁶ Nin thum koute, minmin nynh amaw kha beikinn kya ccangpahtu hae laku haung zah mih bya kha ngae zah minmin bya a khia hae paw kha a muih hae.

⁴⁷ A bya a thae hae paw balyn nynh a hawzia te bya a khungzia kha mih ngaeangthua.

⁴⁸ A nung te a paaw nynh he a muih hae tuh, mih ngaeangthua zah, a nung nynh, “Ka ccapaw, pawccemou kaening hynh hynhte nae cyi? Dotua, na paaw te kae tuh thinphangte nang kha kae ccung,” a cipya.

⁴⁹ Jesu nynh minmin kha, “Pawccemou nae ccung oh? Ka Paaw inn kya ka um lanpaw nynh ka thua cipaw na nyh khyh oh tou?” a cipya hae.

⁵⁰ A hopya hae paw bya kha minmin nynh thaethya khyh hae.

⁵¹ Te Jesu tuh a nung a paaw hae ryte cceihbung hae zah Nazareth khua a thua hae, aning nynh minmin kaw kha a ngae. A nung nynh e konglang balyn hynh a thinlung kya a ccykeku.

⁵² Jesu tuh pyn lante thuasah, hawnaw lante thuasah yn lethung zah, Pachia malang te ccungccaw malang maehoynaw a mue.