LOCCEIHTU 6 - Zotung Bible 2016Lu Sari A Po hae 1 Tuh ccyh lyakhe zuitu hae he oun lungthung hae tuh, Grik bya a hopaw Judah hae nynh Judah bya a hopaw Judah hae kha a ccohnuaku hae; pawccecize Grik bya a hopaw Judah hae kya-e nomae hae kha nin takyh looh pyanaw kya pyabua khyh hae cite a ccohnuaku hae. 2 Locceihtu lu haw lae ning nynh zuitu hae balyn kha ko hae zah, “Kaening nynh Pachia bya hynh cciataw te ccaboi kya loohdangpaw rya hynh kae law lan ccan khyh. 3 Tukeiccuze uteno hae, thehoy ccou zah Thyaa Muisaw te hawnaw te a beihpaw ccungccaw lu sari kha po oh lah, hynh-e ryalaw lan ah khang cih oh. 4 Thuasalama kaening tuh sawsangnaw te Pachia bya hopaw rya hynh po kae lah cih,” a cipya hae. 5 Tuh-e bya tuh ccungccaw zapi balyn nynh mih lungrythua zah, zynnaw te Thyaa Muisaw te a beihpaw Stefen, Filip, Prokhoras, Nikanor, Timon, Parmenas te Antiok khuapaw Judah beiknaw kalan a paleihkuhpaw Nikolas kha a po hae. 6 Minmin kha locceihtu hae malang khe a nung hae, te locceihtu hae nynh sawsangpah hae zah mih kuih kha tuh-e hae tungvaw a khang hae. 7 Pachia bya tuh houhouh pazaekuh zah zuitu hae tuh Jerusalem kya myarya a lungthung hae; ranpibawi hae patae nynh tuh-e zynnaw tuh a pombua hae. Stefen A Kyng hae 8 Stefen tuh zynnaw te thungnaw te phe a beihpaw thua zah myarya lepaw ngaeangnaw te muihsahnaw kha ccungccaw hae kya a langsaku. 9 ‘A lue hae paw kya-e Sinakok’ a ci hae paw kya-e Sairin hae, Alexandria hae, Silisia ram te Asia ram e ccungccaw hae abang tuh Stefen ryte bya a eikuh hae. 10 Tuhzemah Muisaw nynh Stefen kha hawnaw a pya keiccuze a hopaw kha minmin nynh ei kho khyh hae. 11 Tetuh, “Hynh-e paw nynh Moses te Pachia saryanaw bya a hopaw kha kae thae,” cite a ho lanpaw ccungccaw abang kha minmin nynh aruh lante a soih hae. 12 Minmin nynh ccungccaw hae, piccan hae te kawbya sazae hae kha a tuhou hae; tetuh Stefen kha kyng hae zah kungsi malang a thuakhae hae. 13 Minmin nynh ahme leipaw ccaekia hae kha konua hae zah tuh-e hae nynh, “Hynh-e paw nynh hynh-e athyaapaw hmin te Kawbya saryanaw bya kha palei a ho; 14 pawccecize, ‘Nazareth khuapaw hynh-e Jesu nynh hynh-e hmin hynh yn roh cih zah Moses nynh aening oun pyapaw phungbya kha yn rulae cih,’ cite hynh-e paw nynh a hopaw kha phe kae thae,” a ci hae. 15 Kungsi zung kya a dahung hae paw balyn nynh Stefen kha riri do hae zah a maesue tuh vaawpaw maesue hawte a muih hae. |
Zotung Bible © Bible Society of Myanmar, 2016.
Bible Society of Myanmar