LEVITIKAS 18 - Zotung Bible 2016

Nopi Pise Seinaw te Asekuhpaw hae

¹ Bawipaw nynh Moses kha hynhte a hopya:

² Israel ccungccaw hae kha hynhte hopah hae: Kae tuh Bawipaw nae Pachia nynh ka thua.

³ Na la umnaw oh Izip ram kya minmin nynh a cyi hae hawte na cyih lan khyh oh, te kae cciakhae cihnaw oh Kanaan ram kya minmin nynh a cyi hae hawte mah na cyih lan khyh oh. Mih phungbya kha na zui lan khyh oh.

⁴ Ka phungzae hae kha na zui cih oh zah ka phungbya hae kha na tynsah cih oh zah na zui cih oh: kae tuh Bawipaw nae Pachia nynh ka thua.

⁵ Ka phungbya hae te ka phungzae hae kha na zui cih oh; tuhcite cyi liate ccungccaw tuh a hiin cih: Kae tuh Bawipaw nynh ka thua.

⁶ Nanning laku e humhung nynh mah amaw te anaekuhpaw uno lukhakheit ryte naekute nopi pise seinaw rae lan khyh: Kae tuh Bawipaw nynh ka thua.

⁷ Na nung te nopi pise seinaw raete na paaw kha thethyasah nan. Aning tuh na nung thua zah aning te nopi pise seinaw na rae lan khyh.

⁸ Na paaw zu te nopi pise seinaw na rae lan khyh; tuh-e raenaw nynh na paaw kha the a thyasah cih.

⁹ Innbyn bynkheit lungkhu a puipaw thuasah, ccanglang a puipaw thuasah, na ccianung athuapaw na paaw ccanung khyhze na nung ccanung te nopi pise seinaw na rae lan khyh.

¹⁰ Na ccapaw a ccanung khyhze na ccanung a ccanung te nopi pise seinaw na rae lan khyh, pawccecize tuh-e nynh nang kha the ae thyasah cih.

¹¹ Na paaw zu a ccanung, athuapaw na paaw nynh a saahpaw tuh na ccianung athua keiccuze aning te nopi pise seinaw na rae lan khyh.

¹² Na paaw a ccianung te nopi pise seinaw na rae lan khyh; aning tuh na paaw te chiisaw anaekuh hae paw nynh thua.

¹³ Na nung a neitawnung te nopi pise seinaw na rae lan khyh, pawccecize aning tuh na nung te chiisaw anaekuh hae paw nynh thua.

¹⁴ Na paaw a upaw zu te thuasah, a neitawpaw zu te thuasah nopi pise seinaw na rae lan khyh, aning tuh na nung lanpaw nynh thua.

¹⁵ Na monung te nopi pise seinaw na rae lan khyh: aning tuh na ccapaw zu nynh thua; aning te nopi pise seinaw na rae lan khyh.

¹⁶ Na upaw zu te thuasah, na neitawpaw zu te thuasah nopi pise seinaw na rae lan khyh; tuh-e nynh na upaw khyhze na neitawpaw kha the a thyasah cih.

¹⁷ Nopinung te thuasah, a ccanung te thuasah, nopinung a ccapaw ccanung te khyhze nopinung a ccanung te thuasah nopi pise seinaw na rae lan khyh; minmin tuh nang te chiisaw na naekuh oh paw nynh thua hae; tuh-e tuh hoyleinaw nynh thua.

¹⁸ Te na zu phang a hiin lungkhu kya na zu te khungtaeku khylan a unung kha thuasah, a neitawnung kha thuasah zu lang na umkhae lan khyh.

¹⁹ Nopinung nynh nopiny nyh zah a thyaa khyh lyakhe ikhae khylan na naenuakuh lan khyh.

²⁰ Na unopaw zu te nopi pise seinaw na rae lan khyh, tuh-e nopinung te namaw te namaw kha na thusakuh lan khyh.

²¹ Na ccaaw hae lukhakheit kha Molek pachia kalan silaw nawlan na pya lan khyh, tuhcite na Pachia min kha na thusah lan khyh: kae tuh Bawipaw nynh ka thua.

²² Nopi te ihkheih hawte pise te pise na ihkheih lan khyh oh; tuh-e tuh anungsikupaw nynh thua.

²³ Sarangpaw sakhakheit te ihkheih te namaw te namaw kha thusakuh nan, nopi lukhakheit nynh mah sarangpaw te ihkheih khylan amaw te amaw kha pyakuh lan khyh: tuh-e tuh aphung thua leipaw ikheihnaw nynh thua.

²⁴ Hynh-e hae ccangkhakheit cyite namaw te namaw kha thusakuh nan, pawccecize nae malang kyate ka dee cih hae paw minphuin hae nynh hynh-e cyisahnaw hae balyn hynhte mimaw te mimaw kha a thusahku hae.

²⁵ Tuhcite ram tuh a thu vae; ram tuh ahoy khyh keiccuze de ka tah zah ram nynh tuin kya um hae paw kha moh a lua hae.

²⁶ Thuasalama ka phungbya hae te ka phungzae hae kha na zui cih oh zah anungsikupaw kha ramccungccaw nynh thuasah, nanning laku umpaw ramccang ccungccaw nynh thuasah na rae lan khyh oh,

²⁷ (pawccecize nanning mawze ram kya a la um hae paw nynh hynh-e anungsikupaw balyn kha rae hae zah ram tuh a thu vae);

²⁸ tuhkhyhze tuh nanning mawze a la um hae paw kha ram nynh moh a la lua hae hawte, ram kha na thusah oh keiccuze ram nynh moh ae lohsei cih oh.

²⁹ Pawccecize humhung zemah hynh-e anungsikuhpaw ccangkhakheit kha a raepaw tuh a ccungccaw hae kyate vua athua cih hae.

³⁰ Tukeiccu nae malang rae a la thuapaw hynh-e anungsikuhpaw ccangkhakheit kha na rae khyh nawlan oh te tuh-e hae khate naemaw te naemaw kha na thusahku khyh nawlan oh, kaw kae pya oh paw kha na zui cih oh: kae tuh Bawipaw nae Pachia nynh ka thua.