JOSHUA 6 - Zotung Bible 2016

Jeriko Lawnaw te Ronaw

¹ Israel hae keiccuze Jeriko khua tuh alungkhu lang te thuasah, atolang te thuasah phang a khaw hae; tukeiccuze a poupaw te a teepaw humhung mah um khyh.

² Bawipaw nynh Joshua kha, “Dotua, Jeriko khua tuh a siapharan te a rhawkaw hae ryte na kuih kya kae pya vae.

³ Khua kha na voilu cih oh, rhawkaw balyn nynh se kheit a voilu cih hae, tuhcite nin taruh lungkhu na cyih cih oh,

⁴ ranpibawi lu sari nynh byakin thingkua malang khe tuutepaw ki mungkae ccangsari kha a ccyngkuh cih hae. Nin sarinaw nin vae tuh khua kha vae sari na voilu cih oh, ranpibawi hae nynh mungkae kha a tu cih hae.

⁵ Minmin nynh tuutepaw ki kha tu hae zah, mungkae roi kha he na thae oh te, ccungccaw balyn nynh thawmawte a sia cih hae; te khua koihnawpaw khualungrua tuh marya a ting cih zah, ccungccaw hae balyn tuh lawbabin lan malang a cceih cih hae,” a cipya.

⁶ Tukeiccuze Nun ccapaw Joshua nynh ranpibawi hae kha ko hae zah, “Byakin thingkua kha lah oh lah, Bawipaw byakin thingkua malang khe ranpibawi lu sari nynh tuutepaw ki ccangsari kha ccyng oh,” a cipya hae.

⁷ Ccungccaw hae balyn kha mah, “Malang cceih oh lah, khuapi kha voilu oh, zunghe a ccyngkuh hae paw kha Bawipaw byakin thingkua malang cceih oh,” a cipya hae.

⁸ Joshua nynh ccungccaw hae tuh kaw a pya hae thyhte, Bawipaw malang kya tuutepaw ki mungkae ccangsari a ccyngtu hae ranpibawi lu sari tuh mungkae tu biate malang cceih hae zah, Bawipaw byakin thingkua nynh minmin kha a zui hae.

⁹ Te zunghe ccyngkuh hae paw tuh mungkae tu hae paw ranpibawi hae malang a cceih hae; mungkae a tu cciamang lya hae khe, nulang rhawviatu hae nynh byakin thingkua kha a zuibia hae.

¹⁰ Joshua nynh ccungccaw hae kha, “Sia oh kae cipya makhia oh, na sia lan khyh oh, nae roi mah na ccaesah lan khyh oh, bya kaw kheit san na ho lan khyh oh. Tukoute na sia cih oh,” cite kaw a pya hae.

¹¹ Tukeiccuze Bawipaw byakin thingkua nynh khua kha se kheit a voilu; te ryahmin langkhe cceih hae zah tuh-e khuazi tuh ryahmin kya a rya hae.

¹² Te Joshua tuh awkhua takaw te tho zah, ranpibawi hae nynh Bawipaw byakin thingkua kha a puih hae.

¹³ Te Bawipaw byakin thingkua malang khe ranpibawi lu sari tuh tuutepaw ki mungkae ccangsari kha ccyng hae zah tu biate a cceih hae. Zunghe ccyngkuh hae paw tuh minmin malang cceih hae zah, nulang rhawviatu hae tuh Bawipaw byakin thingkua nulang te a cceih hae, ranpibawi hae nynh mungkae kha a tubia lalia hae.

¹⁴ Nin ningnaw nin khe khua kha se kheit a voilu kou hae te, ryahmin lang a ki hae. Tuhcite nin taruh lungkhu a cyi hae.

¹⁵ Nin sarinaw nin khuadaetakaw vyvy aw te tho hae zah, a cyimae hae hawte khua tuh se sari a voilu hae; tuh-e nin rou nynh khua tuh se sari a voilu hae.

¹⁶ Te se sarinaw vae tuh, ranpibawi nynh mungkae he a tu te, Joshua nynh ccungccaw hae kha, “Sia oh! Pawccecize Bawipaw nynh khua tuh ae pya vae oh.

¹⁷ Khua te a lungkhu umpaw balyn tuh ro khylan Bawipaw kalan pya athua cih. Aening nynh ah saw oh paw locceihtu hae kha a thuruh keiccu hae ze, ohhuanung Rahab te a inn kya um hae paw balyn tuh a hiin cih hae.

¹⁸ Ro lan cite pya vae paw uccaw hae kha nanning nynh lah nan oh, ro lan pya vae paw uccaw ccangkhakheit kha na lawsei oh zetuh, Israel tungvaw vawsawnaw thuakhaete Israel ryahmin kha ro lanpaw uccaw lang na raesei cih oh.

¹⁹ Thuasalama sui te ngun, sohin te sivaw uccaw hae balyn tuh Bawipaw hanlan thyaasah athua cih hae zah, Bawipaw sisuainn lungkhu lang a tee cih hae,” a cipya hae.

²⁰ Tukeiccuze ccungccaw hae tuh sia hae zah mungkae kha a tu hae. Ccungccaw hae nynh mungkae roi kha he a thae takaw hae te, thawte sia hae zah khualungrua tuh marya a ting; tukeiccuze ccungccaw hae tuh khua lungkhu lang lawbabin lan tee hae zah khua kha a law hae.

²¹ Te khua kya umpaw balyn, nopi pise, adih ale, vaetua, tuu te lann hae kha thaloi te marya a ro hae.

²² Te Joshua nynh ram dophitu lu ning hae kyakhe, “Ohhuanung inn lang la tee oh lah, bya na kinpyaku oh hawte, tuh-e nopinung te a ccungccaw hae balyn kha oun poukhae oh,” a cipya hae.

²³ Tukeiccuze dophitu athua hae paw ccangvae hae nynh tee hae zah Rahab kha a nung, a paaw, a raee hae te a ccungccaw hae balyn—a puizia hae balyn ryte poukhae hae zah, Israel ryahmin atolang khe a nung hae.

²⁴ Khua te a lungkhu umpaw atyn-are kha maee te a soi hae, sui te ngun, sohin te sivaw uccaw hae rou kha Bawipaw inn kya umpaw sisuainn lungkhu lang a nung hae.

²⁵ Thuasalama ohhuanung Rahab tuh a innbyn hae te a ccungccaw hae balyn ryte Joshua nynh chia leite a haang hae. A ciihan hae tuh Israel hae kya atunin cia a um hae. Pawccecize Joshua nynh Jeriko khua dophi khylan a saw hae paw locceihtu hae kha Rahab nynh a thuruh hae.

²⁶ Tetuh Joshua nynh thyalawkute, “E Jeriko khua hynh raethui lan a zuakuhpaw miakaw tuh Bawipaw malang thyalaw thua sah! A ccatawccaw lu khate khua athonaw aleihpaw kha a thadynsah cih zah, a ccasoi lu khate khua koikua kha a rae cih!” a ci.

²⁷ Tukeiccuze Bawipaw tuh Joshua kya um zah, ram pynpi kya a min tuh athaan.