Biblia Todo Logo
Bìoball air-loidhne

- Sanasan -

JOSHUA 23 - Zotung Bible 2016


Joshua nynh Lungthosahnaw

1 Ccyh khaw cia aro koute Israel hae kha mih pepan e rhaw hae kyate Bawipaw nynh haeungnaw a pya hae, Joshua tuh a kum yn tang zah myarya a taw te,

2 Israel hae mih balynte, mih piccan hae, lu lang um hae paw, mih byapiatu hae te mih bawi hae kha Joshua nynh ko hae zah minmin kyakhe, “Atu tuh ka kum tang vae zah myarya ka taw vae;

3 te Bawipaw nae Pachia nynh e minphuin hae kyaze nae hanlan a raepaw kha na muih vae oh; pawccecize nanning hanlan rhaw ae tukpah oh paw tuh Bawipaw nae Pachia nynh thua.

4 A laehy hae paw minphuin hae kha nae phin raveih hanlan rho lang kae pya oh, ka tae ty vae paw minphuin hae balyn hynh Jordan vaw kyate atho cih zah niccaw lang Rili Pi kyacia,

5 Bawipaw nae Pachia nynh nae malang kyate a dee cih hae zah, nae mit nynh a muih kho leinaw kyacia a dee cih hae; te Bawipaw nae Pachia nynh bya ae kinpyaku oh hawte mih ram kha na ccou cih oh.

6 Tukeiccuze Moses kawbya ccauh kya azeikuhpaw balyn kha zui lan te rae lan kha tynkaring lan um oh, voilang ranglang maekuh nan oh.

7 Nanning nynh nae laku kya a laehy ung hae paw minphuin hae ryte pyku leite, mih pachia hae min kha ho leite, tuh-e pachia hae min phyate byakinku leite, mih ryalawpya leite, mih malang bakhung leite,

8 atunin cia na cyi oh hawte Bawipaw nae Pachia kha tynkaring lan kyngkuh oh.

9 Pawccecize le hae zah athungpaw minphuin hae kha Bawipaw nynh nae malang te a dee hae keiccuze atunin cia hum nynh san nae malang thadyn ngan khyh.

10 Bawipaw nae Pachia nynh bya ae kinpyaku oh hawte, amaw tuh rhaw ae doupahtu oh paw athua keiccuze nanning kya-e lu kheit nynh rhaw thong kheit kha a dee kho.

11 Tukeiccuze Bawipaw nae Pachia sungsah lanpaw kha hoyte raeringku tua oh.

12 Na maetawkuh oh zah nanning laku kya-e a laehy ung hae paw ryte pykute nopi hae kha zu lang na dykuh oh zah minmin nynh mah ae dyru oh zetuh,

13 Bawipaw nae Pachia nynh hynh-e minphuin hae hynh nae muihnaw kyate dee vae lan khyh hae cipaw kha ccaerarih lan nyh oh; thuasalama Bawipaw nae Pachia nynh ae pya oh paw hynh-e ram hoy kyate na ro mawlaezung oh, nae hanlan kaang te saehung, nae ke hanlan ccungbua te nae mit lungkhu kya hinpaw lang a tang cih hae.

14 “Te atu tuh laephi vawlan ccungccaw hae phung hawte ka cceihbua vae cih, nae balynte Bawipaw nae Pachia nynh nanning konglang te byakinnaw a raepaw uccaw hoypaw balyn ccangkheit san accakaepaw thua khyh cipaw kha nae thinlung te na tuanaw oh te na ny oh; nae hanlan marya accing, ccangkheit sanmah ahobounaw um khyh.

15 Thuasalama Bawipaw nae Pachia nynh nanning kya bya ae kinpyaku oh paw uccaw hoypaw balyn tuh nae kya accing hawte, Bawipaw nae Pachia nynh hynh-e ram hoypaw ae pya oh paw kyate ae ro mawlaezung oh, Bawipaw nynh uccaw hoy leipaw balyn kha nae tungvaw kya a thuasah cih.

16 Bawipaw nae Pachia nynh ae pya oh paw byakinnaw kha na ei oh zah, ccangpaw pachia hae kha ccianuate a rya kha na lawpah oh zah, a malang na bakhung oh zetuh, Bawipaw thinrianaw tuh nanning kya maee hawte arua cih zah ae pya oh paw ram hoypaw kyate arangte na roh cih oh,” a cipya hae.

Zotung Bible © Bible Society of Myanmar, 2016.

Bible Society of Myanmar
Lean sinn:



Sanasan