JOSHUA 22 - Zotung Bible 2016

Nithua lang e hae A Ki hae

¹ Te Joshua nynh Reuben phin hae, Gad phin hae te Manasseh phin angankuh kha ko hae zah,

² minmin kha, “Bawipaw ryalahtu Moses nynh ae hopya oh paw balyn kha na rae oh zah, kaw kae pya oh paw ka bya kha na ngae oh;

³ atunin cia hynhsepi aro vae paw nae uno hae kha na vua khyh oh zah, Bawipaw nae Pachia nynh ae naw oh paw kha tynkaring lan na law oh.

⁴ Atu tuh Bawipaw nae Pachia nynh nae uno hae kha bya a kinpyaku hae hawte haeungnaw a pya vae hae; tukeiccuze ki oh lah, Bawipaw ryalahtu Moses nynh Jordan vaw khuraw lang e ae pya oh paw nae hanpaw umnaw ram kya nae inn lang cciatua oh.

⁵ Bawipaw ryalahtu Moses nynh kaw ae pya oh paw kawbya te phungbya hae athuapaw: Bawipaw nae Pachia sungsah lanpaw, a laanpi zui lanpaw, a kawbya hae rae lanpaw, amaw kya tynkaring lan kyngku lanpaw, te nae thinlung balynte nae hiinnaw balynte amaw ryalawpya lanpaw kha hoyte raeringku tua oh,” a cipya hae.

⁶ Te Joshua nynh hythuapya hae zah a kisah vae hae, te minmin tuh mih inn lang a ki hae.

⁷ Te Moses nynh Manasseh phin angankuh kha Bashan kya umpaw mih hanpaw kha a pya hae; thuasalama Joshua nynh ccangpaw angankuh kha tuh Jordan te niccaw lang ram kya mih uno hae pe khe mih hanpaw kha a pya hae. Te Joshua nynh minmin kha hythuanaw pya hae zah mih inn lang he a kisah hae te,

⁸ minmin kha, “Uccaw patae te sahiin patae te ngun, sui, daw, sivaw te boeining patae kha phukute nae inn lang la cceih oh; nae rhaw hae kya-e na law oh paw rhaw uccaw kha nae uno hae ryte la neekuh oh,” a cipya hae.

⁹ Tukeiccuze Reuben phin hae, Gad phin hae te Manasseh phin angankuh tuh Kanaan ram lungkhu umpaw Shiloh khua e Israel hae kyate phiakuh hae zah, mih inn lang a ki hae. Bawipaw nynh Moses kya kaw a pya liate a ccou hae paw ram, Gilead ram langkhe ccia lan cite a thokuh hae.

Liathuinawpaw Silawhang

¹⁰ Kanaan ram Jordan vaw pe he a thua hae tuh, Reuben phin hae, Gad phin hae te Manasseh phin angankuh nynh tuh-e Jordan vawkhu pe khe myarya lepaw silawhang ccangkheit a rae hae.

¹¹ Reuben phin hae, Gad phin hae te Manasseh phin angankuh nynh Kanaan ramri kya Jordan vaw pe, Israel hae ram lungkhu khe silawhang a rae hae cipaw kha Israel hae nynh a thae hae.

¹² Israel hae nynh tuh-e kong he a thae hae tuh, Israel hae mih balynte minmin kha tuk khylan Shiloh kya a pumkuh hae.

¹³ Te Israel hae nynh Gilead ram kya-e Reuben phin hae, Gad phin hae te Manasseh phin angankuh hae kalan khe ranpibawi Eleazar ccapaw Finehas kha a saw hae.

¹⁴ Te amaw ryte bawi lu haw, Israel phin raveih kyate lu kheit cci, mih phin kyate lu athua hae paw kha a cciasah bua hae.

¹⁵ Te Gilead ram kya um hae paw Reuben phin hae, Gad phin hae te Manasseh phin angankuh hae kalan khe cceih hae zah, minmin kha,

¹⁶ “Bawipaw ccungccaw hae nynh mih balynte, ‘Israel Pachia tungvaw kya na rae oh paw rawsenaw hynh pawmou athua? Atunin Bawipaw kha dou khylan Bawipaw laanpi kyate na cceihsei oh zah, silawhang ccangkheit na raeku oh paw hynh paw suilan mou athua?

¹⁷ Peor kya-e seinaw kha ah zawsakuh loh khyh oh tou! Khah-e seinaw keiccuze Bawipaw ccungccaw zapi hae kya shethya thua zah, atunin cia khah-e seinaw kyate ah thyaa loh khyh oh,

¹⁸ nanning nynh Bawipaw nulang zuiku leite atunin ccanglang na maekuh cih oh tou! Nanning nynh Bawipaw kha atunin na dou oh ze, Israel ccungccaw zapi tungvaw awkhualan a thinria cih.

¹⁹ Thuasalama atu nae ram tuh athyaa khyh lanze, Bawipaw beikbu a thadynnaw Bawipaw ram lungkhu lang oun cceihbua oh lah, kaening kae ccoupaw ram hynh lawkuh bua oh; thuasalama Bawipaw palia than nynh dou nan oh, Bawipaw ah Pachia kya-e silawhang laelan ccangpaw silawhang kha raekute kaening hynh mah oun dou nan oh.

²⁰ Pya vae paw uccaw konglang te Zerah ccapaw Akhan nynh a lungzi khyh keiccuze Israel ccungccaw zapi balyn tungvaw kya thinrianaw yn ccah khaw? Te aning a hoyleinaw keiccuze amaw kyalya chih khyh!’ a ci hae,” cite a hopya hae.

²¹ Te Reuben phin hae, Gad phin hae te Manasseh phin angankuh hae nynh Israel puizia hae kya-e lupi hae kha khung hae zah,

²² “Bawipaw , pachia hae Pachia! Bawipaw , pachia hae Pachia! Aning nynh phe a ny; Israel maw nynh mah nyh sah! Bawipaw tungvaw dounaw te lungzi leinaw um zah,

²³ Bawipaw nulang zuiku leite ccanglang maeku khylan silawhang kha kae la rae lanze, atunin kae hiinnaw hynh oun haang nan oh; te tuh-e silawhang vawlan khe maee-ute silawnaw, ccathae silawnaw te ccawkunaw silawnaw kha kae rae lan athua ze, Bawipaw amaw ccaccei nynh oun liaru vae sah.

²⁴ Tukeiccuze kae rae khyh, thuasalama malang ze nae ccaaw hae nynh kae ccaaw hae kha, ‘Bawipaw , Israel Pachia te kyngkunaw pawmou na hoi oh?

²⁵ Pawccecize nanning Reuben phin hae te Gad phin hae, nanning te kaening laku kya Bawipaw nynh Jordan tuh ramri lang a rae; Bawipaw kya nanning tuh ccou lanpaw nae hanpaw na hoibua khyh oh,’ a cisei cih hae cipaw kae tua keiccuze kae raepaw nynh thua. Tuhawte nae ccaaw hae nynh kae ccaaw hae kha Bawipaw beik lanpaw kha a umtawsahsei cih hae.

²⁶ Tukeiccuze kaening nynh, ‘Maee-ute silawkunaw elang thua leite,

²⁷ kaening te nanning laku kya ccaekia thua zah, Bawipaw rya tuh kaening nynh amaw malang maee-ute silawnaw te silawnaw hae te ccawkunaw silawnaw rya kae la lahbua ci nawlan, silawhang ccangkheit rae oh sih; malang ze nae ciihan hae nynh kae ciihan hae kha, “Bawipaw kya ccoupaw pawsang na hoibua khyh oh,” cite a cisei khyh nawlan hae,’ cite kae ci.

²⁸ Te e hynh kaening kya thuasah, kae ciihan hae kya thuasah, hosei athua lanze, ‘Bawipaw silawhang hynh dotua oh, kae minpaaw hae nynh silaw nawlan thua leite nanning te kaening lakuze ccaekia lang la rae hae paw hynhsa athua,’ cite kae ho cih cite kae tua.

²⁹ Amaw beikbu malang a thadynpaw Bawipaw ah Pachia kya-e silawhang laelan, maee-ute silawnaw te ccathae silawnaw athua khyhze silawnaw rae nawlan ccangpaw silawhang raete Bawipaw laanpi kyate atunin cciaseite Bawipaw doupaw tuh kaening kyate sawkuh sah!” a ci hae.

³⁰ Ranpibawi Finehas te amaw kya um hae paw ccungccaw zapi kya-e piccan hae te Israel phin hae kya-e cciakhaetu hae nynh Reuben phin hae, Gad phin hae te Manasseh phin hae nynh a ho hae paw kha a thae hae tuh, mih lung myarya ccing.

³¹ Te ranpibawi Eleazar ccapaw Finehas nynh Reuben phin hae te Gad phin hae te Manasseh phin hae tuh, “Bawipaw kha na rawse khyh oh keiccuze atunin Bawipaw tuh ah kya nynh um cipaw na ny oh; Israel ccungccaw hae tuh Bawipaw kuih kyate atu na khum vae oh,” a ci hae.

³² Ranpibawi Eleazar ccapaw Finehas te bawi hae tuh Gilead ram te Reuben phin hae te Gad phin hae kyate Kanaan ram lang Israel hae kalan ki hae zah, bya kha oun thuakhae hae.

³³ E konglang te Israel hae nynh myarya mih lungrythua. Israel hae nynh Pachia kha thehoysah hae zah Reuben phin hae te Gad phin hae umnaw ram ro lan te minmin dou lanpaw konglang kha ho vae khyh hae.

³⁴ Reuben phin hae te Gad phin hae nynh silawhang tuh Ed cite min a phu hae; “Pawccecize Bawipaw tuh Pachia nynh thua cipaw hynh-e silawhang tuh aening laku kya ccaekia nynh thua,” a ci hae.