JOEL 3 - Zotung Bible 2016

¹ Tuin nin te tuin ccyh kyakhe, Judah te Jerusalem kha hoynaw he ka pyathui hae te,

² minphuin hae balyn kha ka suelua cih hae zah Jehoshafat accya langkhe ka cciakhae bung cih hae; tuin kyakhe minmin kha bya ka pia cih hae, pawccecize minmin nynh ka ccungccaw hae te ka rho Israel kha minphuin hae laku kya phiariphiarae a nung hae. Ka ram kha neekuh hae zah,

³ ka ccungccaw hae kha see lang lawku lanpaw kong kha ccungthy a dung hae, pise taraw hae kha ohhuakunaw khate rulaekuh hae zah, nopi taraw hae kha misutui lang a zuaku hae, te a nia hae.

⁴ Pou Tair khua, Sidon khua te Filistia ram hae balyn, nanning tuh kae ka hanlan pawmou na thua oh? Kae kha nae liaru cih oh tou? Kae kha nae liaru oh ze, nae cyisahnaw kha naemaw lu vawlan palou ka khangru cih.

⁵ Pawccecize ka sui te ka ngun kha na lawku oh, ka sisua patae kha nae beikinn lang na phuku oh.

⁶ Judah hae te Jerusalem khuaccaaw hae kha mih ram kyate asawnaw lang na cciakhae oh zah, Grik hae kalan na zuaku oh.

⁷ Thuasalama atu tuh, minmin na zuanaw oh hmin hae kha cciataw khylan ka tuhou cih hae zah, nae cyisahnaw kha naemaw lu vawlan ka khangru cih.

⁸ Nae ccanung hae te nae ccapaw hae kha Judah hae kuih kalan ka zua cih hae zah, minmin nynh asawnaw umpaw minphuin, Seba hae kalan a zua cih hae; pawccecize Bawipaw nynh a ho vae.

Jehoshafat Accya kya Byapianaw

⁹ E bya hynh minphuin hae kalan thaesah hae: Rhawtuk lan paccynkuh, rhawkaw hae kha lungthobya hopah oh. Rhawkaw hae balyn tuh oun naekuh hae sah lah, oun cceihthung hae sah.

¹⁰ Nae tamuin hae kha thaloi lang suhkuh oh lah, nae rungkou hae kha ccoi lang suhkuh oh; a thawzyapaw nynh, “Kae tuh ka thawsae,” cite ho sah.

¹¹ Po voilu lan um hae paw minphuin hae balyn, arangte oun cceih oh lah, tuh-e accya kyakhe sueluakuh oh. Pou Bawipaw , na rhawkaw hae kha beih yn saw hae.

¹² Minphuin hae tuh thokuh hae sah lah, Jehoshafat accya kalan cceihthung hae sah; pawccecize a pepan e minphuin hae balyn kha byapia khylan tuin kya ka haung cih.

¹³ Loohrue lanpaw tuh avoi vae keiccuze rungkou kha lawku tua. Misu mianaw khu tuh phe abia vae keiccuze cceih oh lah, sutua oh. Mih hoyleinaw tuh myarya ale keiccuze misu mianaw khu tuh aleikuh vae.

¹⁴ Byapaenaw accya kya ccungccaw zapi, ccungccaw pataepi a um hae, pawccecize byapaenaw accya kya Bawipaw nin tuh anae vae.

¹⁵ Khuanin te sawpaw tuh moh hae zah, awsi hae tuh aw vae khyh hae.

¹⁶ Bawipaw tuh Zion kyate sia zah, Jerusalem kyate a roi a saw, vaaw te lae tuh a thyngkuh hae. Thuasalama Bawipaw tuh a ccungccaw hae hanlan khynnaw thua zah, Israel ccungccaw hae hanlan rhawlungrua nynh thua.

Judah hanlan Malang Ccyh

¹⁷ Tetuh nang nynh athyaapaw ka mua, Zion kya ka umpaw, kae, Bawipaw na Pachia kha nae nyh vae cih. Jerusalem tuh athyaa cih zah, khua lungkhu kya ramccang hae nynh papinmaw bua cceih vae lan khyh hae.

¹⁸ Tuin nin vae tuh mua hae kyate a-epaw misutui abya cih zah, sangpyng hae kyate mateitui alua cih, Judah ram e vawkhu hae balyn tuh tui alua cih; Bawipaw inn kyate tuidy apou cih zah, Shittim Accya kha tui a ciasah cih.

¹⁹ Izip ram tuh ccungccaw adaepaw lang a tang cih zah, Edom ram tuh ccungccaw adaepaw ramkaw lang a tang cih, pawccecize Judah hae tungvaw kya puathote ryalah hae zah, ram pynpi kya a sei leipaw chiise kha a luasah hae.

²⁰ Thuasalama Judah ram kya ccungccaw a um zungzae cih zah, Jerusalem kya she takyh ccungccaw a um vae cih.

²¹ Mih chiise mee kha phu ka lah cih hae zah, mih seinaw kha ka thyaasah lan khyh hae, pawccecize Bawipaw tuh Zion kya a um.