JOEL 1 - Zotung Bible 2016

¹ Pethuel ccapaw Joel kalan yn thuapaw Bawipaw bya:

Ram Ro keiccu Rawnaw

² Pou piccan hae, e hynh thaetua oh, ram kya um hae paw balyn, nae nakaring te ngaetua oh! E tahawpaw uccaw hynh nae she kya acyihkuh boi vae tou? Nae minpaaw hae she kya so acyihkuh boi vae tou?

³ E konglang hynh nae ccaaw hae kha hopah oh, nae ccaaw hae nynh mih ccaaw hae kha hopah hae sah, mih ccaaw hae nynh ccangpaw she kya-e hae kha hopah hae sah.

⁴ Tungkhipaw alepaw nynh a ae bangpaw alaepaw kha tungkhipaw aphu nynh a ae. Tungkhipaw aphu nynh a ae bangpaw alaepaw kha tungkhipaw adihpaw nynh a ae, tungkhipaw adihpaw nynh a ae bangpaw alaepaw kha ro a mangpaw tungkhipaw nynh a ae.

⁵ A zu a ae hae paw nanning, nae inaw kyate thokuh oh lah, rawtua oh; misutui alawe lan a neih hae paw miakaw balyn, emamiapaw misutui kha nae mung kyate thoh phia athua vae keiccuze rawkhuite um oh.

⁶ Pawccecize athawsae zah riatae um lei hae paw minphuin nynh ka ram kha a thiing vae; tuh-e minphuin a haw tuh chindeih haw hawte thua zah, a nua tuh chindeih pinung anua hawte nynh thua.

⁷ Tuh-e minphuin nynh ka misu khokhu kha roh zah, ka thaeku aku hae kha a khya; akaloh kha kia zah a vua; a karan hae tuh pong araw hae.

⁸ A zawthaw lya-e a vawpaw hanlan buriboei a zingkuhpaw liaccady hawte rawkhuitua oh.

⁹ Bawipaw inn kya pya lanpaw ccathae te misutui um khyh. Bawipaw ryalahtu hae, ranpibawi hae tuh rawkhuite a um hae.

¹⁰ Loo hae tuh aroh hae, laephi tuh rawkhuite a um; pawccecize ccathae tuh aroh, misutui tuh arou, chitui mah um vae khyh.

¹¹ Loopho hae nanning, nae bungzou sah, misu khokhu do-oihtu hae nanning, rawkhuite um oh, pawccecize chanvuih, barli te loo kya-e ruepaw ccathae hae tuh aroh hae.

¹² Misu ku tuh naan zah thaeku ku tuh arou. Ccalee thae, ungcci ku te epal— loo kya-e thingku balyn tuh pong arou hae; ccungccaw hae mih lungtuanaw tuh azo ccaccing.

Ngaesiku lan Hyynaw

¹³ Ranpibawi hae nanning, buriboei kha zingkute rawkhuitua oh; silawhang kya ryalahtu hae nanning, rawkhuite umtua oh. Ka Pachia rya a lahtu hae nanning, rang oh lah, buri boeining lawkute khuazi ccyh kha liasah oh! Nae Pachia inn kya pya lanpaw ccathae te misutui um khyh.

¹⁴ Looh-aesung ccyh kha thaesah oh, athyaapaw pumkunaw kha rae oh. Piccan hae te ram lungkhu a um hae paw balyn kha Bawipaw nae Pachia inn lang suelua oh lah, Bawipaw kalan siatua oh.

¹⁵ Tuh-e nin hanlan ngaethya lan kou um! Pawccecize tuh-e Bawipaw nin tuh anae vae, tuh-e nin tuh Athunghuapaw kya-e ronaw hawte yn thua cih.

¹⁶ Aening ah muihnaw oh kya maw looh tuh phe athang khaw? Ah Pachia inn kya lungtuanaw te lungpawnaw um vae khyh khaw?

¹⁷ Laephi aroupaw kya ccacii tuh aroh, uccaw ccakhungnaw inn hae tuh aroh hae, looh a um khyh keiccuze ccung-inn hae tuh aroh hae.

¹⁸ Sarangpaw hae tuh a hawkhaekuh hae! Sahiin hae tuh rampaeekunaw a um khyh keiccuze a khiavuikuh hae; tuuphu hae mah a teing hae.

¹⁹ Pou Bawipaw , nang kha thawte kae ko. Pawccecize ramkaw e sahiin hae rampaeekunaw hae kha maee nynh a u vae, ramkaw e thingku balyn tuh maeesoi nynh a u vae.

²⁰ Tuinaw hae tuh arou hae keiccuze loramsaw hae heize na kalan a sia hae, ramkaw e sahiin hae rampaeekunaw hae tuh maee nynh phe u vae.