JOB 9 - Zotung Bible 2016

Job nynh Bya A Khung

¹ Oute Job nynh khung zah:

² “Thanccingte, e hynh hynhcih mawte nynh athua cipaw ka ny; thuasalama ccungccaw nynh Pachia malang pawtemou a ding kho cih?

³ Ccungccaw nynh Pachia kha bya a ei ry lanze, avae thong kheit kyaze vaekheit sanmah khung kho lan khyh.

⁴ Pachia tuh a thinlung kya haw zah, a thawzung tuh a thawsae, hum nynh mou amaw kha rawsete a tae kho cih?

⁵ Mua hae kha nue zah, mua hae tuh nyhkuh khyh hae, a thinria zah mua hae kha a dawleih hae;

⁶ laephi kha a umnaw hmin kya hy zah, a tung hae tuh a thyngkuh hae;

⁷ khuanin kha kawpya zah, khuanin tuh thua leite a um; awsi hae kha awsah khyh hae;

⁸ a makhaete vaawlui kha daw zah, Rili tuileih kha a syde;

⁹ Pachia nynh Bear awsiphu, Orion awsiphu, Awsitaruh, Awsitaruh te alia lang e awsi umnaw adawkhawkuhpaw kha a rae,

¹⁰ nythya kho leipaw uccaw hae te ngaeang lan umpaw uccaw riatae lei kha a rae.

¹¹ Dotua, ka pe po cceih zah ka muih khyh; a ccia zemah ka lung ka lan la thua khyh.

¹² Aning nynh dae a law; hum nynh mou a kang kho cih? Hum nynh mou amaw kha, ‘Pawmou na cyi?’ a cipah ngan cih?

¹³ “Pachia nynh a thinrianaw kha daesah lan khyh; Rahab a bawmtu hae tuh amaw pe khe a bakhung hae.

¹⁴ Tukeiccuze amaw malang paw bya mou ka pokuh cih zah, pawtemou ka khung kho cih?

¹⁵ Seinaw hoi leipaw ka thua zemah, amaw kha bya ka khung ngan khyh; kae yn ruphutu kalan thawccinaw ka ngiakuh cih.

¹⁶ Amaw kha ka ko zah yn oi zemah, ka bya yn ngaepah cih cite ka zyn khyh.

¹⁷ Pawccecize khise te kae kha yn syro zah, akonglang um leite ka vaemaw kha yn lungsah pya;

¹⁸ ka hy sanmah yn suesah mang khyh, accihpaw teingnaw khate phe yn biasah.

¹⁹ Thawzung te taeku athua lanze, Pachia tuh a thawsaepaw nynh thua! Byading kong athua lanze, hum nynh mou ccaekia lang yn tangpah kho cih?

²⁰ Seinaw hoi leipaw ka thua zemah, ka khalang toulou nynh kamaw hynh sei yn be cih; ccaenaw um leipaw ka thua zemah, ka thinlung akoupaw kha a langsakuh cih.

²¹ Kae tuh ccaenaw um leipaw nynh ka thua; kamaw te kamaw ka nyhkuh khyh; ka hiinnaw hynh ka hua.

²² Ka ho lanpaw bya kaw kheit tuh, Pachia nynh ccaenaw um leipaw te ccungccaw hoy leipaw kha parouh mawte a ro hae.

²³ Vawsawnawpi nynh vaekheitmawte chinaw kha he yn thuakhae tuh, seinaw hoi leipaw a teingnaw kha Pachia nynh a nuinse.

²⁴ Laephi hynh ccungccaw hoylei hae paw kuih kya pya athua; byapiatu hae mit kha phang a hu hae, tuh-e tuh Pachia nynh a cyi khyh lanze, hum nynh mou a cyih?

²⁵ “Ka ccyh tuh a ccuepaw laeze aranghua; ka ccyh tuh po a ccue zemah hoynaw muih khyh.

²⁶ Kohlung hawte thuasah, saw a zounua bungpaw mosipi hawte thuasah myarya a thyrang.

²⁷ ‘Ka vawsawnaw hynh ka ning cih; ngaethyanaw mitmae hynh ka vua cih zah lungpawte ka um cih,’ ka ci lanze,

²⁸ ka teingnaw balyn hynh ka rih, pawccecize seinaw hoi leipaw lang nae ria lan khyh cipaw ka ny.

²⁹ Kae tuh seibe ka thua cih; pawccemou accakaepaw lang ka banghan cih?

³⁰ Saepia te ka singkuh zah, ka kuih hynh thyaapaping lan ka thyaasaku zemah,

³¹ athupaw lungkhu lang nae phangde mamin cih zah, ka boeining hae toulou nynh yn hua cih hae.

³² Pachia tuh kae nynh byakhung kho lanpaw te byapianaw kalan pynkheihlan cciakhae lan ciate, kamaw hawte ccungccaw mah thua khyh.

³³ Kaening lu ning tungvaw kaw a hoipaw, kaening laku hopiatu um khyh.

³⁴ Pachia nynh a ccungngue kha ka kyate lah zah, amaw rawrinaw nynh ka thin yn phangsah khyh zetuh,

³⁵ amaw rawri leite ka hopah cih, pawccecize ka tuaku hawte ka thua khyh cipaw ka ny.