JOB 6 - Zotung Bible 2016

Job nynh A Ruiban hae A Pe hae

¹ Oute Job nynh khung hae zah,

² “Ka thinrianaw hynh akhin sae thua sah lah, ka vawsawnaw balyn hynh zawccu te tou thua sah!

³ Rili laesia laeze arihua cih; tukeiccuze ka bya tuh phe lawesei vae.

⁴ Pawccecize Athunghuapaw nynh a kawpaw the nynh yn tung; tuh-e the asy nynh ka muisaw kha a ccisah; Pachia rawrinaw kha ka malang khe po tarynua ka thua.

⁵ Ramkaw e lann tuh lonua a bouku lya a sia boi tou? Tangnuapaw so a ae lya a sia boi tou?

⁶ Athua leipaw looh kha loi leite ae kho thua zawtou? Awtui kya-e arawpaw kha ae lan athua zawtou?

⁷ Khah-e looh hae kha ka kuih te san ka ty ry khyh zah, ka hanlan anungsikuhpaw looh te nynh aloku hae.

⁸ “Ka ngiapaw hynh ka mue vae sah, Pachia nynh ka rypaw kha yn pya vae sah;

⁹ Pachia nynh kae hynh yn roh sah lah, a kuih kha dyngte kae hynh thoh yn pae sah!

¹⁰ E hynh ka hanlan lungtangnaw pyakupaw athua cih; apaekuh leipaw ccinaw kyakhe ka lungtua paleih cih; pawccecize Athyaapaw Pachia bya kha ka ei vae khyh.

¹¹ Ka ngaehoinaw lanpaw thawzung ka hoi ung zawtou? Ka hiinnaw athangnaw kha lungsaete ngaw aho ung zawtou?

¹² Ka thawzung tuh lung thawzung zawtou athua? ka ngesaw tuh sohin zawtou athua?

¹³ Thanccingte ka lungkhu kya bawmtu ka hoi khyh, ka thawzung balyn phe thang vae.

¹⁴ “Ruiban tungvaw ngaethyaumsahnaw a hoi leipaw tuh Athunghuapaw tungvaw rawrinaw a hoi leipaw nynh thua.

¹⁵ Ka uno hae tuh vahungtui hawte a hynhu hae paw thua zah, tuihung alua hawte phe a zo hae,

¹⁶ tuh-e tuihung tuh tuiting ryte mankhaekute lua zah, atuipaw vuiraw ryte anuihkhaekuh.

¹⁷ Aso ccyh kya vae tuh, tuh-e tui hae tuh phe azo hae; he aso vae ze, mih umnaw kya phe akan hae.

¹⁸ Minmin tuh mih laanpi kyate a cceihsei hae, ramrou lungkhu lang tee hae zah a roh hae.

¹⁹ Tema khua e ataruinte a cceih hae paw nynh tui a ccungku hae, Sheba khua e khuaccong hae paw nynh ngaehoite a ccia hae.

²⁰ A zynku hae keiccuze mih lungroh; tuh-e hmin kya thua hae zah mih maethah.

²¹ Nanning mah ka hanlan tuhawte nynh na thua oh; ka vawsawnaw kha na muih oh zah na rih oh.

²² ‘Lasung yn pya oh,’ ka ci tou? Tuhkhyhze, ‘Nae sisua kya-e kha pyaruh lang yn pya oh,’ ka ci tou?

²³ Tuhkhyhze, ‘Rhaw kuih kyate yn khum oh,’ ka ci tou? Tuhkhyhze, ‘Tuaasahtu hae kuih kyate yn shawkhaw oh,’ ka ci tou?

²⁴ “Yn ccangpah oh lah, daetedae lan ka um cih; pawtemou ka cyisei cipaw kha yn nysah tua oh.

²⁵ Ahmepaw bya tuh pawcih baban mou a thawsae! Thuasalama nae thuiheinaw oh paw bya nynh akyhpaw pawmou a langsaku?

²⁶ Ngathu-ngaraepaw ccungccaw nynh a hopaw bya tuh khivae athua hawte, ka bya hynh seisah kho lan cite tou na tuaku oh?

²⁷ Ngawraw hae kha heize ccungthydungte vawsaw na pya oh, nae ban hae kha kungku nawlan na mang oh.

²⁸ “Thuasalama atu kae hynh yn dotua oh, nanning malang ka hyn lan khyh.

²⁹ Tuathui hin oh, ka tungvaw hoyleinaw kha rae thua nan vae sah. Tuathui hin oh, ka bya tuh ahme.

³⁰ Ka byaho kya hoseinaw ccangkhakheit a um tou? Akyhpaw te akyh leipaw kha ka nyh kho khyh tou?