JOB 42 - Zotung Bible 2016

Job kha Zakawsangsah Athua

¹ Oute Job nynh Bawipaw kha byakhung zah:

² “Atyn-are balyn na rae kho cipaw te na eenaw tuh khee kho um khyh cipaw kha ka ny.

³ ‘Hawnaw a hoi lei pite ka paccynnaw a thuruhpaw tuh hummou athua?’ cite na khia. Tukeiccuze ka nythya leipaw kha thuasah, ka ny leipaw, ka hanlan myaryamaw ngaeangthua lan umpaw uccaw hae kha thuasah phe ka ho vae.

⁴ ‘Ngae lah, kae hopah cih; bya kae khia cih zah, nae khungru cih,’ nae cipya.

⁵ Thaenawpaw nakaring kyalya te nang kha kae la thae boi, thuasalama atu tuh ka mit te kae muih vae;

⁶ tukeiccuze kamaw toulou kha ka huakuh zah, laenoi te buhhaw kya haungte ka ngaesikuh,” a cipya.

Athangnaw

⁷ E bya hae hynh Bawipaw nynh Job kalan a hopah koute, Bawipaw nynh Teman minphuinpaw Elifaz kha, “Nang te na ban hae lu ning tungvaw ka thinrianaw tuh maee lang arua; pawccecize ka ryalahtu Job nynh ka konglang ahmepaw kha a ho hawte, nanning nynh na ho khyh oh.

⁸ Tukeiccuze atu nanning nynh tangnuapaw sa sari te tuutepaw sa sari kha lah oh lah, ka ryalahtu Job kalan cciakhae oh, naemaw hanlan maee-ute silawnaw kha rae oh; ka ryalahtu Job nynh nanning hanlan saw ae sangpah cih oh, pawccecize na ngaeenaw oh thyhte nae tungvaw ka cyi khyh nawlan, Job sawsangnaw kha ka thaepah cih, pawccecize ka ryalahtu Job nynh a cyi hawte, nanning nynh ahmepaw ka konglang kha na ho khyh oh,” a cipya hae.

⁹ Tukeiccuze Teman minphuinpaw Elifaz, Shuh minphuinpaw Bildad te Naamath minphuinpaw Zofar tuh cceih hae zah, Bawipaw nynh a hopya hae thyhte a cyi hae; te Bawipaw nynh Job sawsangnaw kha a thaepya.

Job nynh Leit Ning A Muethui

¹⁰ Te Job nynh a ban hae hanlan saw he a sang koute vae tuh, Bawipaw nynh Job kha hoynaw a pyathui; Bawipaw nynh Job kha langmaw a la hoipaw laeze leit ning alung lan a pya.

¹¹ Tetuh Job a upaw hae te a neitawpaw hae, a ccianung hae balyn te langmawlya Job a la nyh hae paw balyn nynh Job kalan oun cceih hae zah, Job inn kyakhe Job ryte looh a aekheih hae; Bawipaw nynh Job tungvaw a thuakhaepaw hoyleinaw balyn hanlan kha minmin nynh Job tungvaw ngaethyaumsahnaw langsakuh hae zah lungtangnaw a pya hae; te minmin lu kheit cci nynh Job kha phua beihtaraw te sui kuihpu ccangkheit cci a pya hae.

¹² Bawipaw nynh Job kha atakaw lya laeze nyalang ccyh kya hythuanaw a pyahua; Job tuh tuu thong haw lae pali, kalauh thong taruh, tangnuapaw toi thong kheit te lann thong kheit a hoi.

¹³ Ccapaw lu sari te ccanung lu thum a hoi.

¹⁴ Atawccanung tuh Jemimah, alaelahnung tuh Keziah, asoinung tuh Kerenhappuk cite min a phu hae.

¹⁵ Ram pynpi kya Job ccanung hae hawte a puithyapaw nopi um khyh hae; mih paaw nynh mih raeepaw hae hawte rho a pyabua hae.

¹⁶ E koute Job tuh kum za kheit sung pali hiin zah, a ccaaw hae, a mintaw hae, she pali cia a muih hae.

¹⁷ Te Job tuh taw zah a she phe dia te a chih.