JOB 41 - Zotung Bible 2016

¹ “Leviathan kha ngasawbaw te na suebia kho cih tou? Tuhkhyhze a lae kha arui te na khii kho cih tou?

² A naduh kya arui na thuing kho cih tou? Tuhkhyhze a khaw kha bawnawpaw te na baw kho cih tou?

³ Aning nynh thaw beih yn ccih cite ae ngiakuh cih tou? Byanepaw te nang kha ae soihbiakuh cih tou?

⁴ Na ryalahtu lang zungzae tang khylan nang te byakinnaw a rae cih tou?

⁵ Pavaw te zuekheih hawte aning te na zuekheih cih oh tou? Tuhkhyhze na nopi taraw hae hanlan na khii cih tou?

⁶ Uccaw zua hae paw ryte khah-e mee kha na eikuh cih oh tou? Uccaw zua hae paw nynh khah-e kha a neekuh cih hae tou?

⁷ A phaluh kha ccoi te na thuing kho cih tou? Tuhkhyhze a lu kha ngasaw thuingnawpaw ccoi te na thuing kho cih tou?

⁸ Aning vawlan khe na kuih khang lah, rhawtuk lanpaw kha tuatua; nyalang tuhte na cyih ry vae lan khyh!

⁹ Aning kyng lan ngaehoinaw miakaw tuh lungro lan a um vae cih; pachia hae nynh heize he a muih hae tuh siiku leite a um hae zawtou?

¹⁰ Humhung nynh mah aning kha tho ngan khyh. Hummou a malang a thadyn kho cih?

¹¹ Hum nynh mou Leviathan kha a dou kho cih zah a khyn cih? Vaawlui pynpi zakaw umpaw hum nynh mou aning kha a cyih kho cih?

¹² “Leviathan a ccu hae kong thuasah, athungpaw a thawzung kong thuasah, alypaw atung-abaw kong thuasah yccae leite ka um lan khyh.

¹³ Hum nynh mou a boeining kha a khahpah kho cih? Hum nynh mou thyhningpaw a sivaw angki kha po zua lan a thuing kho cih?

¹⁴ Hum nynh mou a mae thuakaw kha a hung kho cih? A hakan balyn tuh ri lan a um.

¹⁵ A ke tuh ataruinte um hae paw aphaluh te rae thua zah, tazeih khiapaw hawte phang beekute varyng zi hae.

¹⁶ Ccangkheit te ccangkheit phang beekuh hae zah, mih laku kya khivae tee kho khyh.

¹⁷ Ccangkheit te ccangkheit a piadekuh hae; phang kyngkuh hae zah phia kho thua khyh hae.

¹⁸ A hachi vae ze awnaw tuh dalah a ak, a mit tuh awkhua takaw e awnaw te nynh aloku.

¹⁹ A khalang kyate zaezae epaw maee-e pou zah, maee-ia a peih.

²⁰ Accoh cciamangpaw ang te arua cciamangpaw lonua kyate ahu apou hawte, a naduh kyate maeekhuh apou.

²¹ A hy nynh maeehue kha esah zah, a khalang kyate maeesoi apou.

²² A nging kya thawzung um zah, a malang khe rinaw tuh thohkute a law.

²³ A ngesaw tuh sihkakin lan abekuh; tynkaring lan um zah nuekuh kho khyh.

²⁴ A thinlung tuh lung hawte a tang, Lungmia akawlan hawte a tang.

²⁵ A thoku vae ze pachia hae tuh a rih hae; myarya rih hae zah a ccue hae.

²⁶ Thaloi nynh a tung zemah pawlangria khyh, ccoi, the, ccoipipi nynh mah vaemaw muesah kho khyh.

²⁷ Sivaw kha ccatanphue lang ria zah, sohin kha thing thuhpaw lang a ria.

²⁸ The nynh aning kha ccuesah kho khyh; lungpyng te deih zemah, lungpyng tuh aning hanlan vaekang lang phe a tang.

²⁹ Ccungngue alepaw kha lonua aroupaw lang a ria; ccoipipi khoihpaw roi kha a nuinse.

³⁰ A vue phaluh tuh ang akoinahpaw ahepaw te nynh aloku; a ccianaw tuh tuiccua vawlan leithue ze anyku hawte anyhkuh.

³¹ Tui akhunaw kha ang accohpaw hawte accohsah; rili kha chitui ang hawte a thuasah.

³² A ccia vae ze a nulang e tui tuh phaephae ak zah, rili tuh sang apawpaw vosi cite tua lan a um.

³³ Laephi vawlan aning te angankuhpaw sarangpaw um khyh, rinaw a hoi leipaw ahysuepaw nynh thua.

³⁴ Aly-asaepaw balyn kha a dothatheih hae; aning tuh alysakuhpaw balyn kyaze siapharan nynh thua,” a ci.