JOB 30 - Zotung Bible 2016

¹ “Thuasalama atu tuh kamaw laeze a nohua hae paw nynh kae kha yn zuenaw hae, mih paaw hae tuh ka tuuphu a rintu ui hae phu san ka umsah lei hae paw nynh thua.

² Mih thawzung balyn tuh athang vae keiccuze mih thawzung kyate paw thanenaw mou ka mue kho cih?

³ Ryachi te ccakancci keiccuze minmin nynh arounaw te ccungccaw um leinaw ramkaw e kha a bou hae,

⁴ Mallow haetapaw te thabu kya-e anaw hae kha ae lan siakuh hae zah, innphi ku atharui kha a thaeku hae.

⁵ Minmin kha ccungccaw kyate dee hae zah, ccungccaw hae nynh mih nulang te miruh hawkhate a sianua hae.

⁶ Vahung lungkhu, laekarung te lungkarung kyakhe a um hae.

⁷ Thabu lungkhu khe sarangpaw hawte sia hae zah, hinpawbu lungkhu khe a tuh-eihkuh hae.

⁸ A ngaeepaw, a thethahpaw ccungccaleipaw thua hae zah, ram kyate dee athua hae.

⁹ “Atu vae tuh hlaw te yn kee hae zah yn sarya hae; kae hynh tousenawpaw lang yn mang hae.

¹⁰ Yn hua hae zah yn sibia hae; ka muihnaw kya tuing thoi lan synkuh khyh hae.

¹¹ Pachia nynh ka li arui kha ccua zah yn nyaasah vae keiccuze, ka malang khe mih rythyte a cyi vae hae.

¹² Ka ranglang e keisukeilae um hae paw nynh thokuh hae zah, kae kha yn eih hae, kae kha ro nawlan cite laanpi a sah hae.

¹³ Ka laanpi kha roh hae zah, kae kha ro lan yn zuanuaku hae; lu kheit nynh sanmah minmin kha khee khyh hae.

¹⁴ Akopaw a ua kyate oun tee hae zah, vaekheihmawte yn lungnuaku hae.

¹⁵ Rinaw nynh yn thuanua zah, ka phu-enaw tuh khisan nynh a mungpaw hawte phe zo zah, ka hoirumnaw tuh maeking hawte phe azo.

¹⁶ “Atu tuh ka thinlung phe koi; vawsaw teingnaw ccyh nynh yn thuanua.

¹⁷ Khuazi kya ka ru tuh ccih zah yn reepaw ccinaw nynh daebabi lan yn umsah thya khyh.

¹⁸ Puathote ka boeining khate yn kyng zah, ka angkile nging khate phang yn kyng.

¹⁹ Tuiccua lungkhu lang dae yn vua zah, kae tuh laenoi te buhhaw lang phe ka tang.

²⁰ Pou Pachia, na kalan ka sia zah nae leih khyh; ka thadyn zah dote kyalya nae do.

²¹ Ka tungvaw vawsaw pya khylan nae hawinua zah, athungpaw na kuih te nae tuaa nae sah.

²² Nae hangthung zah khivae kha nae ccisaku, khise nynh thawte yn mung bungthung.

²³ A hiinpaw ccungccaw balyn hanlan na nungpaw hmin kalan te chinaw kalan nae cciakhae cih cipaw ka ny.

²⁴ “Thanccingte, vawsaw tung zah bawmnaw mue khylan a siapaw minyaapaw kha lukhakheit nynh rawsete hawilia khyh.

²⁵ Vawsaw a tung hae paw hanlan ka rah ka khui khyh tou? Ryachi hae hanlan ka thinlungccih khyh tou?

²⁶ Thuasalama hoynaw kha he ka ngaehoi vae ze, hoyleinaw yn thua; awnaw kha he ka ngaehoi vae ze, mohnaw yn thua.

²⁷ Ka thinlung tuh a thinphang zah kharouh dae khyh; vawsaw teingnaw ccyh nynh yn thuanua.

²⁸ Khuanin apaw leinaw mohnaw kya ka khiavuikuh; zapi laku ka thadyn zah bawmnaw mue khylan ka sia.

²⁹ Kae tuh suizaw hae uno ka thua vae zah, kalauh pavaw hae ruiban nynh ka thua vae.

³⁰ Ka ving tuh pong mang zah akuakuh, ka ru hae tuh asopaw nynh a u.

³¹ Ka tintang tuh rawkhuinaw roi lang tang zah, ka phyly tuh a rah hae paw roi lang nynh a tang.