JOB 26 - Zotung Bible 2016

Job Bya

¹ Oute Job nynh khung zah:

² “Huhan a hoi leipaw ccungccaw kha pawcih baban mou na la bawm! Thawzung a hoi leipaw kuih kha pawcih baban mou na la bawm!

³ Hawnaw a hoi leipaw ccungccaw kha pawcih baban mou tuanaw na pya zah, ahoypaw hawnaw patae kha na pya!

⁴ Hum kya-e bawmnaw te mou e bya hynh na ho? Hum muisaw mou na kyate yn langkuh?

⁵ Akawlan khe michi hae muisaw tuh tui te tui lungkhu um hae paw ryte a thyngkuh hae.

⁶ Sheol tuh Pachia malang khe khaleih lang zah Abaddon tuh bongnawpaw ahu hoi khyh.

⁷ Pachia nynh vaawlui kha accakaepaw vawlan khe tharae daw zah, laephi kha accakaepaw vawlan khe a sae.

⁸ Varyng zipaw a maeking kyakhe tui kha lungde zah, tui keiccuze maeking tuh seiikuh khyh.

⁹ Sawpaw sahpynglyn kha phang bong zah, sawpaw luki khe a maeking kha tharae a daw.

¹⁰ Mohnaw te awnaw laku umpaw ramri kya, tui vawlan khe apyngpaw syntawnaw kha a nung.

¹¹ A pe hae keiccuze vaaw atung hae tuh hy hae zah a siikuh hae.

¹² A huhan khate rili kha a daesah; a thyanaw te Rahab kha a chia.

¹³ A hy khate vaawlui kha thyaasah zah, a ccue cciamangpaw hupaw kha a kuih te a thuing.

¹⁴ E hae hynh a ryalaw langsakunaw sasaw nynh athua ung; amaw kong ah thae oh paw hynh pawcih baban mou azya! A huhan kholungthyhpaw thathy kha tuh hum nynh mou a thaethya kho cih?” a ci.