JOB 24 - Zotung Bible 2016

Job A Ccohkunaw

¹ “Pawccemou Athunghuapaw nynh ccyh kha a khya khyh? Pawccemou amaw a nyh hae paw nynh bya a pia nin kha kharouh a ny khyh hae?

² Ccungccaw hoyleipaw nynh ramri kha a nue; milae tuuphu kha luade zah amaw hanlan a rinku.

³ Ngawraw hae lann kha ccaring deepah hae zah, nomae hae tangnuapaw kha ponpaw uccaw lante a kyngpya hae.

⁴ A nyaa hae paw kha laante lang ccaring tu hae zah, ram lungkhu e ryachi hae balyn tuh zya a rekuh hae.

⁵ Tukeiccuze ryachi hae tuh mih ccaaw hae hanlan ramrou kya looh ccungkute, laesia ram kya um hae paw ramkaw e lann hae hawte, ryalawku lan a pou hae.

⁶ Milae loo kya loohruekuh hae zah, ccungccaw hoyleipaw a misu khokhu kya-e ccamua kha a loku hae.

⁷ Boeining leite, mih sasete zidae a ih hae, khuacci lya thykupaw boei hoi khyh hae.

⁸ Mua vawlan arahpaw khuaa nynh pong a ciasah hae, bu a um khyh keiccuze lungpi kya a rekuh hae.

⁹ “A paaw um leipaw nosi kha a nung matei kyate luade hae zah, ryachi hae ccaaw kha ponpaw uccaw lante a lawku hae.

¹⁰ Ryachi hae tuh boeining leite, mih sasete khiakuh hae zah, mih vuelaw zemah loohku acce kha a puihpya hae;

¹¹ Milae chitui kha miapah hae zah, milae misu mianaw khu kya a supyaku hae zemah, mih tui ahaw mamin.

¹² Vyavya chih hae paw tuh khuapi lungkhu te hawkhaekuh hae zah, vaemaw a mue hae paw tuh bawmnaw mue khylan a sia hae; tuhzemah Pachia nynh mih sawsangnaw kha pawlangriapah khyh hae.

¹³ “Awnaw kha rawse hae zah awnaw laanpi kha ny leite, awnaw laanpi kya a um ry leipaw ccungccaw a um hae.

¹⁴ Ccungccaw theihpaw tuh ryachi hae te anyaa hae paw kha chia khylan awkhua takaw te a tho; khuazi khe miruh hawte a ruh.

¹⁵ Milae zu a seikhaepaw nynh tuh zetepakaw kha a ngaehoi, Humhung nynh sanmah yn muih lan khyh, a ciku, te a mae kha a bongku.

¹⁶ Miruh hae nynh khuazi khe milae inn kha a kiabia hae; khuadae khe tuh zya rekuh hae zah, awnaw kha a sibia hae.

¹⁷ Marae zipaw mohnaw tuh minmin hanlan awkhua ccyh nynh thua; pawccecize minmin tuh marae zipaw mohnaw ruiban nynh athua hae.

¹⁸ “Minmin tuh tui vawlan a zawbahae hae; ram lungkhu e minmin hanpaw tuh thyalaw athua; mih misu khokhu lang cceih khyh hae.

¹⁹ Sonaw te khuaakannaw nynh vuiraw kha phe a zosah; tuhawte Sheol nynh mah misei hae kha a zosah hae.

²⁰ Mih nung hae nynh minmin kha a ning hae; Tangkaria nynh minmin kha muihkuh hae zah myarya thua lante a ae hae; minmin kha hum nynh sanmah liathui vae khyh hae; tukeiccuze hoyleinaw tuh thingku hawte akhyathya.

²¹ “Ccungccaw hoyleipaw nynh ccaaw a saah leipaw nopi kha vawsaw pya zah, nomae tungvaw mah hoynaw rae khyh.

²² Tuhzemah Pachia nynh a huhan liate a thawsaepaw kha a ro; ccungccaw hae tuh mih hiinnaw hanlan mih thin he aphang te, a thokuh hae.

²³ Pachia nynh minmin kha khynnaw pya hae zah a bawm hae; mih cyisahnaw kha a mit te a rin hae.

²⁴ Ccungccaw hoylei hae paw tuh sosoh kyalya hangthung athua hae, tukoute phe azo hae; minmin tuh ming hae hawte baleih naan hae zah arou hae; ccavui si hawte si athua hae.

²⁵ Tuhte athua khyh ze, kae hynh mihyn nynh ka thua cipaw hum nynh mou ccaekia a khan cih? Ka hopaw tuh accakaepaw nynh thua cipaw hum nynh mou a langsakuh cih?” a ci.