JOB 22 - Zotung Bible 2016

Elifaz Bya

¹ Oute Teman minphuinpaw Elifaz nynh khung zah:

² “Ccungccaw hynh Pachia hanlan ccungkia kho vema? A haw huaccepaw heize Pachia hanlan ccungkia kho vema?

³ Na ding lanze, na dingnaw tuh Athunghuapaw hanlan lungtuanaw hankhakheit thua vema? Tuhkhyhze na ziazae tuh ccaenaw a um khyhnaw liate, Pachia hanlan thanenaw a um vema?

⁴ Ae thuiheinaw hynh amaw kha sawtuate a raw na ri keiccu athua zawtou? Byapiazung lang ae kaethe zawtou?

⁵ Na hoyleinaw tuh myarya ale khaw? Na seinaw tuh thangthya khyh.

⁶ Na uno nynh ae koiipaw uccaw hanlan a boeining kha akonglang um leite na kyngpah zah, a sasete na nung.

⁷ A thawbangpaw kha nia lanpaw tui na pya khyh, a vuelawpaw kha looh na kang.

⁸ Huhan a hoipaw nynh ram kha hoi zah, mih maedo-um hae paw nynh tuin ram kya khua a sah hae.

⁹ Nomae hae kha mih kuih ccakaete na cciasah hae zah ngawraw hae kuih kha na khya vae.

¹⁰ Tukeiccuze na pepan khe kaang phang um zah, rinaw nynh tualeipite ae thuanua,

¹¹ ngaw na muih kho khyh nawlan mohnaw nynh ae thuanua; tui alepaw nynh nang kha ae vu.

¹² “Pachia tuh vaaw ahang huanaw kya um khyh tou? Ahang huanaw umpaw awsi hae heize dotua, pawcih baban mou ahang hae!

¹³ Thuasalama nang nynh tuh, ‘Pachia nynh pawmou a ny? Mohnaw nynh marae ziping zah bya a pia kho cih zawtou?

¹⁴ Ngaw a muih khyh nawlan, marae zipaw maeking nynh Pachia kha phang a lungde, vaawlui adawkuhpaw vawlan khe a cceih bungthung,’ na ci.

¹⁵ Ccungccaw hoylei hae paw nynh a zui hae paw laanpi arynpaw kha nang nynh na zui ung cih tou?

¹⁶ Minmin tuh mih ccyh azaw mawkhe suede thua hae zah, mih thonaw aleihpaw kha tui alepaw nynh a loupya hae.

¹⁷ Minmin nynh Pachia kha, ‘Kae makhaete oun cciataw, Athunghuapaw nynh kaening hynh pawmou oun cyih kho cih?’ a cipya hae.

¹⁸ Tuhzemah Pachia nynh mih inn kha ahoypaw uccaw te phe a biasah, thuasalama ccungccaw hoylei hae paw mih paccynkunaw kha tuh ka nawccah khyh.

¹⁹ Miding hae nynh tuh-e tuh muih hae zah mih lungtua; seinaw hoi lei hae paw nynh saryate nuinse hae zah,

²⁰ ‘Thanccingte, aening oun rawse hae paw tuh a roh vae hae, maee nynh mih sisua kha a upya vae hae,’ a ci hae.

²¹ “Pachia te ccawkuh oh lah, daenaw raetua; tuhteze tuh hoynaw nynh ae thuanua cih.

²² A mung kya-e ccangpyanaw kha lawkuh lah, a bya kha na thinlung kya ccykeku tua.

²³ Athunghuapaw kalan na kithui zetuh, raethui na thua cih, na inn kyate dingleinaw kha na vua ze thuasah,

²⁴ sui kha laenoi lang na ria zah Ofir sui kha vawkhu e lungpyng lang na ria ze thuasah,

²⁵ te Athunghuapaw tuh na sui te aphutepaw na ngunphua athua zetuh,

²⁶ Athunghuapaw tungvaw na lungrythua cih zah, Pachia liate na lungtua cih.

²⁷ Amaw kalan saw na sang cih zah, ae thaepah cih, bya na kinkupaw kha na pya cih.

²⁸ Cyi lan na tuakupaw kha ccingsahpya athua cih zah, na ccianaw laanpi tuh a aw cih.

²⁹ Mingccang hae kha zakawsangsah athua hae ze, tuh-e tuh ryku lan umpaw nynh thua cite na ho cih. pawccecize a thinlung nepaw kha a khum.

³⁰ Pachia nynh a sei hae paw kha heize a luesah cih hae; na kuih athyaanaw liate minmin tuh a lue cih hae,” a ci.