JOB 21 - Zotung Bible 2016

Job Bya

¹ Oute Job nynh khung zah:

² “Ka bya hynh hoyte yn ngaepya tua oh, tuh-e tuh lungtangnaw nae pya oh paw lang tang vae sah.

³ Yn ngaesangpah hin oh, ka ho cih; ka ho koute nae sarya ry oh ze nae sarya cih oh.

⁴ Ka bokhaekupaw hynh ccungccaw hae kalan zawtou ka bo? Pawccemou thindyn leite ka um cih?

⁵ Kae hynh yn do oh lah, nae ngaeangthua sah, nae kuih khate nae mung kha huhkuh oh.

⁶ Ka tungvaw acyihkuhpaw hynh ka tua vae ze, ka lungroh zah ka thyngkuh.

⁷ Pawccemou ccungccaw hoylei hae paw nynh hiin hae zah, phe taw lan shesaete huhan hoi hae zah a lesae hae?

⁸ Mih ccaaw hae tuh mih malang khe tynkaring lan um hae zah, mih ciihan hae tuh mih mitmuihnaw khe tynkaring lan a um hae.

⁹ Mih inn tuh rinaw kyate khyn zah, Pachia detahnaw tuh mih tungvaw ccah khyh.

¹⁰ Mih tangnuapaw nynh a ciihan saw zah, mih vaetuapi tuh ataw roh boi khyh.

¹¹ Mih ccaaw taraw hae kha tuuphu hawte saw hae zah, mih ccaaw hae tuh thohkute a law hae.

¹² Tyng te daw khuakute hlawsah hae zah, phyly roi khate mih lungtua.

¹³ Hoirumnaw te mih hiinshe kha liasah hae zah, michi khua lang daenaw te a cceih hae.

¹⁴ Ccungccaw hoylei hae paw nynh Pachia kha, ‘Kae makhaete oun cciataw! Na laanpi kha ny kae ry khyh.

¹⁵ Kaening nynh a ryalawpya lan ciate Athunghuapaw tuh pawcihawpaw mou athua? Amaw kalan saw kae sang ze, thanenaw pawmou kae mue cih?’ a ci hae.

¹⁶ Mih hoirumnaw tuh mimaw kuih kya um ccaccing khyh khaw? Ccungccaw hoylei hae paccynkunaw kha ka nawccah khyh.

¹⁷ Ccungccaw hoylei hae mih maeekhua kha vae hohzeihmou a thepya boi hae? Shethya nynh vae hohzeihmou mih tungvaw a thuanua boi hae? Pachia nynh thinriate ccinaw kha vae hohzeihmou a sawnua boi hae?

¹⁸ Khisan malang e ccatanphue hawte thuasah, khise nynh a mungpaw vaekang hawte thuasah vae hohzeihmou athua boi hae?

¹⁹ ‘Pachia nynh mih hoyleinaw kha mih ccaaw hae hanlan a ccakhungpya hae,’ na ci oh. Minmin nynh a ny nawlan hae, minmin kha liaru thua hae sah.

²⁰ Mimaw mit ccaccei te mih ronaw kha muih hae sah lah, Athunghuapaw thin-unaw tui kha neih hae sah.

²¹ Mih hiinnaw ccyh athang vae ze, mih nukhu e mih innbyn hae kha pawlangria ung hae vema?

²² Ahangnaw kya a um hae paw kha bya a piatupaw Pachia kha hum nynh mou a ccangpah cih?

²³ Lukheitpaw tuh hoirumnaw phe beih lante, lungtua ngaengante a chih,

²⁴ tuh-e paw a cce tuh myarya tho zah, a ru kya mah kintui phe abeih.

²⁵ Ccangpaw lu kheit tuh ccihtaci lante hoynaw kharouh taang boi leite a chih.

²⁶ Mih lu ning mawte phe lokuh lante laenoi kya ih hae zah, zanpaw hae nynh pong a bong hae.

²⁷ “Na tuanaw te ka tungvaw seinaw rae lan na paccynkupaw kha phe ka ny.

²⁸ ‘Alesaepaw ccungccaw inn tuh teimou a um? Ccungccaw hoylei hae paw nynh a umnaw hae paw bu tuh teimou a um?’ na ci.

²⁹ Khycce cceih hae paw kha na khia boi khyh oh tou? Minmin nynh a ho hae paw kha na nyh boi khyh oh tou?

³⁰ Ccungccaw hoylei hae paw kha shethya ccyh kya haang athua hae paw te Pachia a thinria nin kya luesah athua hae paw kha na thae boi khyh oh tou?

³¹ Ccungccaw hoyleipaw a cyisahnaw kha amaw malang khe hum nynh mou a ho? A la cyipaw kha hum nynh mou a liaru?

³² Aning kha shawku lang cciakhae he athua te, a shawku kyakhe ngawtu kha a nung hae.

³³ Aning hanlan akhunaw e laeccan tuh a e; a nulang te ccungccaw miakaw nynh a zui cih hae zah, a malang cceih hae paw tuh riatae lei acih hae.

³⁴ Tukeiccuze pawtemou accakaepaw bya te lungtangnaw nae pya cih oh? Nae khung oh paw bya tuh hynbya cci nynh thua.