JOB 2 - Zotung Bible 2016

Satan nynh Job kha Bua Syntawtua

¹ Nin kheit tuh Pachia ccapaw hae nynh Bawipaw malang langku khylan oun thua hae zah, minmin kya Satan mah a umbua.

² Bawipaw nynh Satan kha, “Teitemou nae thua?” a cipya. Satan nynh Bawipaw kha, “Laephi vawlan ka khiakuh zah ka ccia bungthungnaw kyate nynh kae thua,” cite a khung.

³ Bawipaw nynh Satan kha, “Ka seepaw Job kha na nyh boi tou? Laephi vawlan aning tahawpaw lu kheit san um khyh, ccaenaw um leipaw te a dingpaw, Pachia rawrihpaw te hoyleinaw a sibiapaw nynh thua. Akonglang um lei pite Job kha ro khylan, kae kha nae tuhou zemah aning tuh a lungzinaw kya ccavyng atyn mamin,” a cipya.

⁴ Tetuh Satan nynh Bawipaw kha, “Ving hanlan ving! cite a um hawte ccungccaw nynh tuh a hiinnaw khumku khylan a hoipaw balyn kha a sya cih.

⁵ Atu na kuih kha dyng lah, a ru te a ngesaw kha tytua, aning nynh na malang mawkhe thya ae law cih,” cite a khung.

⁶ Bawipaw nynh Satan kha, “Kou ahoy, aning tuh na kaw nynh akhya; a hiinnaw kha tuh haang,” a cipya.

⁷ Tukeiccuze Satan tuh Bawipaw umnaw kyate pou zah, Job kha a ccukaw kyate a luding kyacia ri lan umpaw balyh a pousah.

⁸ Job tuh amaw te amaw khuaku nawlan lae-ang akoinahpaw kha lawkuh zah, buhhaw kya a haung.

⁹ Tetuh a zu nynh Job kha, “Na lungzinaw kya ccavyng na tyn ung cih tou? Pachia kha thyalaw lah, chih ccavae,” a cipya.

¹⁰ Thuasalama Job nynh a zu kha, “Angaeepaw nopi nynh bya a ho hawte na ho. Pachia kuih kyate hoynaw ah mue zah, hoyleinaw kha mah mue lei lan tou?” a cipya. E vawsawnaw balyn hynh a teing zemah Job nynh a munglae te heize sei khyh.

Job Ruiban hae Lu Thum

¹¹ Job nynh a tungpaw vawsawnaw balyn kha a ruiban hae lu thum, Temanpaw Elifaz; Shuhpaw Bildad te Naamathpaw Zofar nynh he a thae hae tuh, mih umnaw raveih kyate a pou hae. Minmin nynh Job kha ngaengansah khylan te lungtangsah khylan ccianua lan a tungkuh hae.

¹² Minmin nynh asawnaw kyate he a muih hae tuh Job kha syntaw khyh hae, te thawte sia hae zah a rah hae; mih boeining kha seii hae zah, vuiping kha mih lu luki lang heithung hae zah a ccawphusahku hae.

¹³ Job ryte nin sari zi sari laekhu kya haung hae zah, humhung nynh mah Job kha bya kaw kheit san beih khyh hae, pawccecize Job a teingnaw tuh myaryamaw accih cipaw a muih hae.