JOB 17 - Zotung Bible 2016

Job Sawsangnaw

¹ Ka thinlung akoi vae, ka ccyh tuh athang vae, ka hanlan shawku tuh phe a umty vae.

² Yn saryatu hae tuh ka pepan kya um hae zah, peku a rypaw mih thinlung kha ka mit nynh a muih.

³ “Pachia, namaw nynh aamah yn khanpyaku tua, ka hanlan aamah yn khanpakuh lanpaw hummou a um?

⁴ Nythyanaw a hoi khyh nawlan hae, mih thinlung kha na pingsah vae, tukeiccuze taenaw na pya vae lan khyh hae.

⁵ Lasung mue khylan a ruiban kha a pheepaw tuh a ccaaw hae mit amoh cih.

⁶ “Ccungccaw hae nynh phungtangbya lang mang lante aning nynh yn rae vae, kae tuh ccungccaw hae nynh a malang mih tuing a thoinua hae paw nynh ka thua.

⁷ Ngaethyanaw keiccuze ka mit tuh ccaerarih lan ngawmuih vae khyh, ka kuih ka ccu balyn tuh mynlyh te nynh aloku vae hae.

⁸ Hynh-e keiccuze miding hae tuh siikuh hae zah, seinaw hoi lei hae paw nynh kae kha Pachia pawlangria leipaw lang yn ria hae.

⁹ Tuhzemah miding hae tuh mih laanpi kya tyn hae zah, mih kuih a thyaa hae paw tuh houhouh a lethung hae.

¹⁰ Thuasalama nanning, nae balyn mawte atu oun kitua oh, nanning laku kya a hawpaw lu kheit sanmah ka muih lan khyh.

¹¹ Ka nin hae tuh alia vae, ka paccynkunaw hae tuh aroh vae; ka thinlung te ka rypaw tuh phe zo vae.

¹² Minmin nynh khuazi kha khuadae lang a rae hae, awnaw tuh mohnaw kalan anaekuh vae, a ci hae.

¹³ Michi khua tuh ka inn lante ka ngaehoi ze thuasah, ka iphae kha mohnaw kya ka phae ze thuasah,

¹⁴ shawku kha, ‘Nang tuh ka paaw nynh na thua,’ ka cipah zah, tangkaria kha, ‘Ka nung’ khyhze ‘Ka ccianung nynh na thua,’ ka cipya lanze,

¹⁵ ka ngaehoinaw tuh teimou a um? Hum nynh mou ka ngaehoinaw kha a muih cih?

¹⁶ Ka ngaehoinaw tuh michi khua lang a rungbung cih tou? Laenoi lungkhu lang pynkheihlan kae rungbung cih tou?” a ci.