JOB 16 - Zotung Bible 2016

Job Bya

¹ Oute Job nynh khungru zah:

² “Hynhcihawpaw bya hynh patae ka thae vae; nanning balyn tuh lungtangnaw mang nae pya oh zemah, lungriathaenaw yn pyatu hae nynh na thua oh.

³ Accakaepaw bya hae tuh thang khyh tou? Apaekuh lei lan byaho lante paw nynh mou bya ae tou oh?

⁴ Kae ka umnaw kya na la um lanze, nang hawte kae mah bya ka ho kho; nang kha bya kae khungru kho cih zah, ka lu mah kae henua kho cih.

⁵ Ka khalang te thawzung kae pya kho cih zah, lungtangsahnawpaw ka bya nynh na ccinaw kha ae dansah hua cih.

⁶ “Ka ho zemah ka ccinaw danhua lae khyh, ho leite ka um zemah ccinaw nynh yn cciataw lae khyh.

⁷ Atu, Pachia nynh ka thaw yn bangsah ccaccing vae; kae mungkuh hae paw balyn kha a maemih vae hae.

⁸ Kae kha nae khiide vae, tuh-e tuh nae rawsenawpaw ccaekia nynh thua. Ka ngethyanaw nynh yn thonuakuh zah, kae kha rawsete ccaekia a khan.

⁹ Pachia nynh thinriate thoh yn pae zah yn hua vae; a haw yn zynua vae; kae yn rhawtupaw nynh a mit rehahan lante yn do.

¹⁰ Ccungccaw hae nynh mih khalang yn awnua hae; dothatheihte ka mae yn bia hae; kae kha rawsete pynkheihlan yn pumnuaku hae.

¹¹ Pachia nynh amaw pawlangria lei hae paw kalan khe yn ap zah, ccungccaw hoylei hae kuih kalan yn vua.

¹² Daebabi lan zya ka um salamah aning nynh ccangning lang thoh yn khya; ka nging te yn kyng zah palae tui lan yn deihnaw; themuing lang yn tawkuh zah,

¹³ thekawthyapaw a ccungccaw hae nynh yn koihlu hae. Thawccinaw hoi leite, ka kin hae kha yn kaw hae; ka nyngkhaw tui kha laephi vawlan a lae hae.

¹⁴ Kae kha avae patae yn pae zah, rhawkawpaw hawte rangsakute yn kaw.

¹⁵ Ka ving bongku lanpaw buriboei kha ka huikuh zah, ka thawzung kha vuiping kya ka kalouh vae.

¹⁶ Ka rawnaw ze ka mae tuh se zah, ka mitteky kya azipingpaw mohnaw a um,

¹⁷ thuasalama ka kuih kya puathonaw um leite, ka sawsangnaw tuh athyaa.

¹⁸ “Pou laephi, ka chiise kha thei nan; ka siaruanaw hynh dae nan sah.

¹⁹ E konglang ka ccaekia tuh vaawram kya a um, yn nykhaetu tuh ahangnaw kya a um.

²⁰ Ka ban hae nynh yn sarya hae; Pachia malang khe ka mitphi alua.

²¹ Lukhakheit nynh a ruiban hanlan a ngiapya hawte, Pachia kalan kae ka hanlan yn ngiapahpaw um ravo nyn.

²² Pawccecize kum beihtaraw aro mawze, kithui ci a um leinaw laanpi lang ka cceih vae cih.