JOB 14 - Zotung Bible 2016

¹ “Nopi nynh saahpaw ccungccaw tuh a she dyn zah vawsawnaw te phe abeih,

² haetapaw hawte paw zah anaan, mynlyh hawte ccue zah tyn khyh.

³ Tuhcihawpaw ccungccaw kha na mit te na do ry tou? Byapianaw kalan nang nynh nae thuakhae tou?

⁴ Athyaa leipaw lungkhu kyate athyaapaw uccaw kha hummou a thuakhae kho? Humhung nynh mah thuakhae kho khyh.

⁵ A nin tuh khyapya thua zah, a sawpaw sah hohzeihmou cipaw phe na ny, a lawe kho leipaw ramri kha na nungpya vae,

⁶ amaw nin kya vaeluatupaw hawte, a lungtua nawlan, amaw kha ccanglang hawitaw lah, sibiatua.

⁷ “Thingku tuh nge zemah, toih leite um lan khyh zah, bua a toihthui cih cite ngaehoinaw a um.

⁸ A tharui tuh lae kaw khe taw vae zah, a ccungmuing tuh lae vawlan a chi vae zemah,

⁹ tuihu liate a toih cih zah, aku taraw hawte akaran hae tuh a toihthung cih.

¹⁰ Thuasalama ccungccaw tuh chih zah a uu hae; ccungccaw tuh a chih koute teimou a um?

¹¹ Kuapi kya tui aky hawte thuasah, tui kan zah vawkhu tuh karae arou hawte thuasah

¹² ccungccaw tuh ih zah, bua tho vae khyh; vaawlui azo mawlaezung thaekuh lan khyh, a inaw kyate tho vae lan khyh.

¹³ Sheol kya beih yn thuruh, na thinrianaw adae mawlaezung yn thuruhtua, accyh yn khyapah lah, beih yn ning nan!

¹⁴ Ccungccaw tuh a chi ze, a hiinthui ung cih tou? reihkute rya ka law ccyh balyn kha ka luenaw ccyh azaw mawlaezung ngaesangte ka ngaw cih.

¹⁵ Nae ko cih zah kae oi cih; na kuih te na raepaw kha na lungrythua cih.

¹⁶ Tetuh ka ccunoh kha nae ria vae lan khyh zah, ka seinaw kha mah nae dokhaw vae lan khyh;

¹⁷ ka cyiseinaw kha zaw kyakhe tazeihkhia athua cih zah, ka hoyleinaw kha nae bongpah vae cih.

¹⁸ “Thuasalama mua tuh pong ting zah phe azo, lungpi tuh a umnaw kyate nue athua;

¹⁹ tui nynh lung kha phe zo lan asoh; tui alepaw nynh lae hoypaw kha a lou; tuhawte nang nynh ccungccaw hae ngaehoinaw kha na ro.

²⁰ Ccungccaw kha zungzae na tae zah phe azo; a mitmae kha na rulae zah ccaring na cciasah.

²¹ A ccaaw hae nynh sawtuanaw a mue hae zemah nyh khyh; minmin kha nyaasah athua hae zemah, tuh-e tuh nyhlae khyh hae.

²² A pyn ccinaw kyalya kha mue zah, a makhae kyalya te a rah,” a ci.