JEREMIAH 6 - Zotung Bible 2016

Jerusalem te Judah Ronaw Anae

¹ Pou Benjamin phin hae, lue khylan Jerusalem kyate ccue oh! Tekoa kya mungkae tu oh lah, Beth-hakkherem kya alan kha saetua oh; pawccecize ahoy leipaw myarya lepaw ronaw tuh thahlang te yn langkuh.

² Puithya zah a ninccehoypaw Zion ccanung kha ka roh cih.

³ Tuurin hae te mih tuuphu hae nynh aning kha a ccianua cih hae zah, a pepan khe bu a saknuakuh cih hae; minmin nynh mih umnaw raveih kyakhe tuu hae kha rampaeesakuh cih hae.

⁴ “Aning kha dou khylan paccynkuh oh; thokuh oh lah, ninthuccynglyn khe rhawtuk oh sih!” “Aening elang ngaethya lan kou um, pawccecize taezaw vae, khuazi bia vae!”

⁵ “Thokuh oh, khuazi khe rhawtuk oh sih lah, a siapharan inn hae kha ropah oh sih!”

⁶ Vaaw Bawipaw nynh hynhte a ho: Jerusalem a thingku hae kha nge oh; Jerusalem dou nawlan laephi kha thae oh lah dohsah oh. E khua tuh detah hahe lanpaw khua nynh thua; khua lungkhu kya tuaasahkunaw laelan pawpaw mah um khyh.

⁷ Tuisung nynh tui thawpaw kha palei a pousah hawte, e khua nynh a hoyleinaw kha palei a pousah; khua lungkhu khe puathonaw te ronaw the kha thae athua; ccihawnaw te vaemaw hae kha zungzae ka muih.

⁸ Pou Jerusalem, raeringkuh, tuhkhyhze tuh na nungsiku keiccuze kae maetawkuh cih, nang kha kae roh cih zah ccungccaw um leinaw ram lang kae rae cih.

⁹ Vaaw Bawipaw nynh hynhte a ho: Misu ku kya a laehypaw athae kha lo hawte, Israel hae a laehy hae paw kha marya lo oh; misu thae a lotu hawte na kuih kha misu karan kalan khe bua dyngtua.

¹⁰ A thae ccaw hae cite hum hae kha mou ka hopah cih hae zah, raeringnaw ka pya cih hae? Dotua, mih nakaring kha hu thua zah, thae kho khyh hae. Bawipaw bya tuh minmin hanlan saryapaw uccaw nynh thua; tuh-e bya kya mih lungrythua khyh.

¹¹ Bawipaw thinrianaw tuh ka tungvaw phe beih; ka ngaesang kho vae khyh. Tuh-e thinrianaw tuh laanpi kya um hae paw imua hae te a sueluakuh hae paw ccangvae hae tungvaw khe ccawsah tua; zu te vaw parouh mawte law athua cih hae zah, kum tang vae hae paw te myarya taw vae hae paw kha mah law athua cih hae.

¹² Mih inn mih loo hae te mih zu hae kha milae kalan pya athua cih hae; pawccecize tuin ram kya um hae paw kha ka kuih ka hangnua cih hae, cite Bawipaw nynh a ci.

¹³ Minmin tuh adih huapaw kyate ale huapaw kyacia ahme leipaw muenaw hanlan mih balyn mawte a karankuh hae; profeh kyate ranpibawi kyacia mih balyn mawte a hyn a hu hae.

¹⁴ Daenaw a um vae khyh ze, “Daenaw, daenaw,” cite ho hae zah, ka ccungccaw hae vaemaw kha oihsah khyh hae.

¹⁵ Maethya lan umpaw kha cyih hae zah, anungsikuhpaw rya kha a law hae; tuhzemah mih maethah khyh, maethya mah nyh khyh hae. Tukeiccuze a khuliakuh hae paw kyakhe a khuliakuh bua cih hae; minmin kha de he ka tah hae te, vua athua cih hae, cite Bawipaw nynh a ci.

¹⁶ Bawipaw nynh hynhte a ho: Laanpi atungkunaw khe thadyn oh lah dotua oh, langmawlya e laanpi, laanpi hoypaw tuh teimou a um cite khiakuh oh lah zui oh, nae hiinnaw hanlan haeungnaw kha muihkuh oh. Thuasalama minmin nynh, “Tuh-e laanpi kha kae zui lan khyh,” a ci hae.

¹⁷ Nanning hanlan rhawviatu kae nungpya oh: “Mungkae roi kha hoyte ngae oh!” ka cipya hae. Thuasalama minmin nynh, “Pawlang kae ria lan khyh,” a ci hae.

¹⁸ Tukeiccuze, pou minphuin hae, ngaetua oh. Pou zapi hae, minmin tungvaw yn cyihkuh cih paw kha nytua oh.

¹⁹ Pou laephi, ngaetua; e ccungccaw hae tungvaw kya mih khuakhannaw athae athuapaw ronaw kha ka thuasah cih, pawccecize ka bya kha pawlangria vae khyh hae; ka ccangpyanaw kha a vua vae hae.

²⁰ Sheba ram kyate yn thuapaw amynkhuhpaw frankinsen te laansaw langte yn thuapaw ccazung epaw kha ka hanlan pawmou a ccungkia? Nae kya-e maee-ute silawnaw hae kha ccoupya thua lan khyh, nae kya-e silawnaw hae kha mah ka lungrythua khyh.

²¹ Tukeiccuze Bawipaw nynh hynhte a ho: Dotua, a thy a pawku nawlan hae paw kha e ccungccaw hae malang khe ka nungkhaw cih hae; nungpaaw hae te ccaaw hae, innpaw hae te ruiban hae tuh pynkheihlan aroh cih hae.

²² Bawipaw nynh hynhte a ho: Dotua, thahlang e ram kyate minphuin phuin kheit yn thua cih, myarya lepaw minphuin tuh laephi adianaw kyate paccynkute a um.

²³ Minmin nynh li te ccoi kha a ccyngku hae, mih rysawthah zah thawccinaw hoi khyh hae, mih roi tuh rili roi te nynh aloku. Pou Zion ccanung, minmin tuh marang kha ccikuh hae zah rhaw a tuk cih paw rhawkawpaw hawte nang kha zunghe ae ccyngnuakuh hae!

²⁴ “Minmin konglang kae thae zah, kae thawzung phe ting; lungriathaenaw nynh oun thuanua, neitangia ccihpaw nopi hawte kae teing.

²⁵ Ramkaw lang cceih nan oh, laanpi kya cceih nan oh; pawccecize rhaw tuh thaloi a hoi, pawpaw kya balyn ri lan phe um.”

²⁶ Pou aryachipaw ka ccungccaw hae, buriboei kha zingkuh oh lah, buhhaw kya toukuh oh; lu kheit kyalyapaw ccaaw chih zah raw hawkhate, thawmawte rah oh, pawccecize rohtu tuh vaekheihmawte aening tungvaw yn thua cih.

²⁷ Pou Jeremiah, ka ccungccaw hae mih hiinzia kha ny khylan na syntawtua ccaw hae cite, nang kha syntawtuanawpaw uccaw lang te minmin thyaasahnawpaw lang kae rae vae.

²⁸ Mih balyn mawte lungkhungte rawse a mang hae paw, ccungccaw lawtyte a khiavuikuh hae paw nynh thua hae; minmin tuh sohin te sivaw thua hae zah, mih balyn mawte ro a mang hae.

²⁹ Sosuhnawpaw maee tuh thawte rua zah, kuee mah maee nynh pong u vae, paw sanmah thanenaw um khyh, pawccecize sivaw-ia tuh thyaa kho lae khyh.

³⁰ Minmin kha “vua athuapaw ngun” cite ko athua cih hae, pawccecize Bawipaw nynh minmin kha a vua vae hae.