JEREMIAH 51 - Zotung Bible 2016

¹ Bawipaw nynh hynhte a ho: Babilon khua te Khaldi ram um hae paw kha rawsete rohtu khivae kha ka thosah cih;

² Ccangkung a vawthya hae paw kha Babilon lang ka saw cih hae zah, Babilon kha a vaw cih hae. Vawsawnaw nin vae tuh, teitei langte balyn oun thuanua cih hae zah, ram kha thyatethya lan a roh cih hae.

³ Thekawtupaw kha the kaw sah nan oh lah, sivaw angki mah kisakuh nan oh. A ccangvae hae kha hiin nan oh; a rhawkaw hae balyn kha marya roh oh.

⁴ Khaldi hae ram khe khuliakute a chih cih hae zah, laanpi hae kyakhe vaemaw a mue cih hae.

⁵ Israel Pachia Athyaapaw malang khe Israel ram te Judah ram tuh seinaw te phe abia zemah, vaaw Bawipaw , mih Pachia nynh minmin kha vua khyh hae.

⁶ Babilon kyate ccue oh lah, nae hiinnaw raveih kha khumkuh oh! Babilon seinaw keiccuze rohbua nan oh, pawccecize e ccyh hynh Bawipaw nynh phu a law ccyh thua zah, Babilon kha accan thyhte a liaru cih.

⁷ Babilon tuh laephi pynpi a ruisahpaw, Bawipaw kuih kya umpaw sui banang nynh thua; minphuin hae nynh a misutui kha neih hae zah, mih lung amua.

⁸ Babilon tuh vaekheihmawte khuliakuh zah akoi; aning hanlan rah oh! A vaemaw hanlan balm isei kha lawpah oh; dan mah a dan kho.

⁹ Kaening nynh Babilon kha dansah lan kae zuakuh, thuasalama dan kho khyh. Babilon kha vua oh lah, ahmaw ram raveih lang cceih oh sih; pawccecize aning nynh a teingpaw byapianaw tuh vaawlang phe phah zah, vaawlui cia phe a phya.

¹⁰ Bawipaw nynh aening dingnaw kha a langsaku vae; rang oh, Bawipaw ah Pachia ryalaw kha Zion kya siakhae oh sih.

¹¹ The kha phe he lan taw oh! The bawng kya the kha phe biasah oh! Bawipaw nynh Babilon kha ro lan a paccyn keiccuze Medes siapharan kha a lung a thosah vae, tuh-e tuh Bawipaw phulawnaw thua zah, a beikinn hanlan phulawnaw nynh thua.

¹² Babilon khualungrua te ahawiliakuh lante alan kha sae oh; rhawviatu hae kha nungchih oh lah, santari ccungtu hae kha nung oh; aruh lante abuhtu hae kha nung oh; pawccecize Bawipaw nynh paccyn zah, Babilon khuaccaaw hae konglang a la ho thyhte a cyi vae.

¹³ Tui patae a umnaw pe khe khuasah zah, sisua patae a hoipaw nang, na thangnaw ccyh a thua vae, na hiinnaw rui kha pae athua vae.

¹⁴ Vaaw Bawipaw amaw ccaccei nynh bya a kinkupaw tuh: Thanccingte, tungkhipaw phu te alokuhpaw rhawkaw hae kha na kya phe ka biasah cih zah, nang taenaw roi kha a saw cih hae.

¹⁵ Laephi kha a huhan te a raetupaw, laephipi kha a hawnaw te a thadynsahtupaw, vaawlui kha a thyanaw te tharae a dawtupaw tuh namaw nynh na thua.

¹⁶ A roi he a saw tuh, vaawlui kya tui roi myarya ccaepaw a um, laephi adianaw kyate tuihu kha a kaesah thung. Khuaaraw nawlan khozaw laesakuh zah, a ccakhungnaw kyakhate khisan kha a pousah.

¹⁷ Ccungccaw miakaw tuh nythyanaw hoi leipaw mingaee nynh thua hae; suilaeethyapaw balyn tuh mih zohtuh hae keiccuze maethyanaw a ccou hae; pawccecize mih zohtuh hae tuh ahme leipaw thua hae zah, minmin kya hy um khyh.

¹⁸ Minmin tuh alakawpaw, ahynhupaw ryalaw nynh thua hae; minmin detahnaw ccyh khe minmin tuh aroh cih hae.

¹⁹ Jakob hanpaw athuapaw Bawipaw tuh hynh-e hae hawte thua khyh, pawccecize aning tuh atyn-are a raetu thua zah, Israel tuh a rho minphuin nynh thua; a min tuh vaaw Bawipaw acikuh.

Raetu Zunghe Israel

²⁰ Nang tuh ka khynlyng, rhawtuknawpaw ka zunghe nynh na thua: nang kha mangte minphuin hae kha zoihtatyh lan ka koi hae; nang kha mangte peenaw hae kha ka ro hae;

²¹ nang kha mangte marang te a ccikuh hae paw kha thuasah, marangle hae te a ccikuh hae paw kha thuasah zoihtatyh lan ka khya hae;

²² nang kha mangte nopi pise hae kha thuasah, pise ataw vae paw te pise taraw kha thuasah, liaccaw ccangvae hae kha thuasah zoihtatyh lan ka pae hae;

²³ nang kha mangte tuurin hae te mih tuuphu hae kha thuasah, leithue hae paw te mih vaetua hae kha thuasah, uktu hae te bawi hae kha thuasah zoihtatyh lan ka khya hae.

Babilon Ronaw

²⁴ Babilon khua te Khaldi ram um hae paw balyn nynh Zion kya a rae hae paw hoyleinaw balyn keiccuze minmin kha na muihnaw ccaccei khe ka liaru cih hae, cite Bawipaw nynh a ci.

²⁵ Bawipaw nynh a hopaw tuh: Laephi pynpi kha a rohpaw, pou ro athyapaw mua, nang kha kae rawse; nang kha ka kuih kae dyngnua cih zah, nang kha lungpi karynkarenaw kyate kae toubung cih, te maee a upaw mua lang kae rae cih.

²⁶ Inn apaki hanlan thuasah, inn aleihpaw hanlan thuasah na kyate lung kha lah lan khyh hae, nang tuh zungzae arohpaw na thua cih, cite Bawipaw nynh a ci.

²⁷ Ram lungkhu kya alan sae oh, minphuin hae laku kya mungkae tu oh; Babilon kha tuk khylan minphuin hae kha paccyn oh, aning kha rawsete Ararat, Minni te Ashkenaz peenaw hae kha pum oh; aning kha rawsete rhawbawi lepaw lu kheit kha khang oh lah, marang hae kha tungkhipaw aphupi hawte cciakhae oh.

²⁸ Babilon kha tuk khylan minphuin hae kha paccyn oh, Medes siapharan hae ryte mih ram uktu hae, bawi hae te mih uknaw kuihkaw umpaw ram miakaw kha paccyn oh.

²⁹ Babilon ram tuh thyngkuh zah a teing, pawccecize Bawipaw nynh Babilon ram kha khuasahtu um leite ccungccaw adaenaw ram lang rae lan a paccynnuaku.

³⁰ Babilon rhawkaw hae tuh rhawtuk kha umtaw hae zah, rhawlungrua te akoihlukunaw kyakhe zya a um hae; mih thawthah zah, nopi hae hawte athua hae; Babilon e inn hae tuh maee te soi thua zah, khua koikua ccong hae tuh khya athua hae.

³¹ Na khuapi tuh teitei langte balyn teenua thua zah law athua vae, cite Babilon siapharan kha hopya khylan zeccuetu lu kheit koute lu kheit oun thua hae:

³² rhaw hae nynh vawkhu zuanaw hmin kha a law vae hae, rhawlungrua kha maee te a soi vae hae, te rhawkaw hae tuh thinphang bungzoute a um hae, cite a hopya hae.

³³ Israel Pachia, vaaw Bawipaw nynh hynhte a ho: Ccanung Babilon tuh ccathae tin ccyh lya-e huimin te nynh aloku; tuhzemah sosoh aro te, loohrue ccyh yn thua vae cih.

³⁴ “Babilon siapharan Nebukhadnezzar nynh kae kha zoihtatyh lan yn pae zah yn laang vae; kae kha ang accawnghanpaw lang yn rae vae, hupi nynh laang hawte po yn laang vae; ka saw athuathuapaw khate a vuesosakuh zah, kae kha moh yn lua vae.

³⁵ Ka ngesaw yn pae keiccuze Babilon tungvaw liarunaw um vae sah,” cite Zion kya um hae paw nynh a ho cih hae. Jerusalem nynh mah, “Ka chiise yn luasah keiccuze Khaldi ram um hae paw kya liarunaw um sah,” cite a ho cih.

³⁶ Tukeiccuze Bawipaw nynh hynhte a ho: Na byathan kya kae pankhae cih zah, na hanlan liarunaw ka rae cih. A rili kha ka rousah cih zah, a tuidy kha ka kangsah cih.

³⁷ Babilon tuh arohpaw apumkuhpaw, suizaw hae karung, ngaeangthua lan umpaw, saryanaw roi a sawnua hae paw, ccungccaw a um leinaw hmin lang a tang cih.

³⁸ Babilon hae tuh chindeih hawte ngingrarih lan a sia cih hae; chindeih taw hae hawte are-aro a tuakuh cih hae.

³⁹ Minmin tuh mih lungtua zah thoku leite po a ih lan hae cia, minmin nynh myarya he a ry hae te, ka niasah cih hae zah ka ruisah cih hae, cite Bawipaw nynh a ci.

⁴⁰ Sawchianaw kalan a cciakhae hae paw tuutaw hawte thuasah, tuutepaw te miaatepaw hawte thuasah minmin kha ka cciakhae cih hae.

⁴¹ Laephi pynpi nynh a lunglekhaekupaw Sheshach khua tuh kyng phe athua vae rei! Babilon tuh minphuin hae lakuze ri lan umpaw lang phe a tang vae rei!

⁴² Rili nynh Babilon kha po phah zah, aroi myarya ccaepaw tuileih hae nynh pong avu vae.

⁴³ A khuapi hae tuh ri lan umpaw, khuaakannaw ram te laesia ram, ccungccaw lu kheit san a um leipaw ram, lu kheit nynh sanmah po a ccianaw leipaw ram lang a tang vae.

⁴⁴ Babilon e Bel pachia kha de ka tah cih zah, a laangpaw kha moh ka luasah cih. Minphuin hae nynh amaw kalan sueluakuh vae lan khyh hae; Babilon khualungrua tuh phe ting vae.

⁴⁵ Ka ccungccaw hae, Babilon khuapi kyate pou oh! Bawipaw thinrianaw myarya lepaw kyate nae hiinnaw raveih kha khumkuh oh!

⁴⁶ Khah-e ram kya na thae oh paw laanbya keiccuze nae rawthah nan sah, ri mah rih nan oh— kum kheit ze laanbya phuin kheit yn ccae zah, malang kum kya ccangpaw laanbya phuin kheit yn than cih, ram lungkhu kya puathonaw laanbya te uktu lu kheit te lu kheit rawsekunaw kong kha athaan.

⁴⁷ Tukeiccuze Babilon ram e zohtuh hae kha de ka tahnaw hae ccyh tuh solei yn thua cih; a ram pynpi tuh maethya a ccou cih zah, khuapi lungkhu chia athuapaw balyn tuh khua lungkhu a khuliakuh cih hae.

⁴⁸ Tetuh palung lang e rohtu hae nynh Babilon kha oun thuanua hae keiccuze vaaw te lae te tuin kya umpaw balyn tuh lungtuate a sia cih hae, cite Bawipaw nynh a ci.

⁴⁹ Babilon keiccuze laephi pynpi kya ccungccaw patae a chi hawte, Israel hae kha chianaw keiccuze Babilon tuh a chih hahe cih.

⁵⁰ Thaloi rhaw kyate a lue hae paw nanning, thysung leite cceih oh! Asawnaw ram kya na um oh zemah Bawipaw kha ning nan oh, Jerusalem kha nae thinlung kya um sah:

⁵¹ Aening nynh saryanaw bya kha ah thae vae oh keiccuze maethya ah ccou oh; thethyanaw nynh ah mae phang oun bong vae, pawccecize ramccang hae nynh Bawipaw inn e hmin thyaa lungkhu lang a tee vae hae.

⁵² Tukeiccuze Bawipaw nynh a hopaw tuh: Babilon a zohtuh hae kha de ka tah ccyh te a ram pynpi kya vaemaw a mue hae paw nynh a raw a khui hae ccyh tuh solei yn thua cih.

⁵³ Babilon tuh vaaw cia hangkuh zah, sihkakinpaw khualungrua kha a rae zemah ka saw hae paw rohtu hae nynh a tungvaw a thuanua cih hae, cite Bawipaw nynh a ci.

⁵⁴ Babilon e rawnaw roi tuh ngaetua oh! Khaldi ram e myarya lepaw ronaw roi tuh ngaetua oh!

⁵⁵ Pawccecize Bawipaw nynh Babilon kha a roh cih zah, myarya ccaepaw a roi kha a daesah cih. Mih tuileih accaepaw roi tuh athawsaepaw tui roi hawte thua zah, mih roi accaepaw tuh anawhoih;

⁵⁶ pawccecize rohtupaw nynh Babilon kha a thuanua vae; a rhawkaw hae tuh rhaw hae kuih kya thua hae zah, mih li kha a khyapya hae; pawccecize Bawipaw tuh liaru a mangpaw Pachia nynh thua, phe ccing lan a pyaru cih hae.

⁵⁷ Babilon a bawi hae, a mihaw hae, a uktu hae, a rhawbawi hae te a rhawkaw hae kha a ruisah cih hae; minmin tuh kharouh thoku leite po a ih zungzae cih hae, cite a min vaaw Bawipaw cikuhpaw Siapharan nynh a ho.

⁵⁸ Vaaw Bawipaw nynh hynhte a ho: Thaawkalaepaw Babilon khualungrua kha laephi te phe nging lan a tingbung cih hae zah, ahangpaw a koikua hae kha maee te a soi cih hae. Ccungccaw hae tuh accakaepaw hanlan mih thawthangsakuh hae zah, minphuin hae tuh maee hanlan mih thaw a bangsakuh hae.

Jeremiah nynh Saraiah kha Kawpya

⁵⁹ Zedekiah nynh Judah siapharan lang a tangnaw kum palinaw kum khe, amaw ryte Babilon lang a cceihkheih hae paw Mahseiah ccapaw Neriah a ccapaw Seraiah kha profeh Jeremiah nynh kaw a pya. Seraiah tuh Zedekiah a do-oihtu bawi nynh thua.

⁶⁰ Babilon tungvaw accah cih paw shethya balyn, Babilon konglang zei athuapaw bya balyn kha Jeremiah nynh ccakue ccangkheit kya a zei.

⁶¹ Jeremiah nynh Seraiah kha hynhte a hopya: “Babilon khua he na thua te, e bya balyn hynh na ria cih,

⁶² ‘Pou Bawipaw , e hmin kya ccungccaw te sarangpaw a um khyh nawlan te zungzae adaepaw lang athua nawlan, namaw ccaccei nynh e hmin ro lanpaw kha phe na ho vae,’ cite na ria cih.

⁶³ E ccakue hynh na ria koute lung te na khiide koute Zufrates vawkhu angaelung langkhe na phung cih zah,

⁶⁴ ‘Babilon tungvaw ka thuasah cih paw shethya keiccuze, Babilon tuh tui kaw lang accah cih zah, pou vae lan khyh,’ cite na ho cih,” a cipya. E hae hynh Jeremiah bya nynh thua.