JEREMIAH 5 - Zotung Bible 2016

Pachia Ccungccaw hae Seinaw

¹ Jerusalem e laanpi hae kya ccia bungthungte, ngawdo oh lah, ccungtua oh! Jerusalem kha ka ngaethya kho nawlan, hmerarih lan hiin zah byaccing a ccungpaw lu kheit kha khualae e laanpi hae kya hoyte ccungtua oh.

² Minmin nynh, “Bawipaw tuh a hiin,” a ci hae zemah, ahme lei lante thyalawkute bya a kinku hae.

³ Pou Bawipaw , na mit nynh byaccing kha a ccung khaw? Minmin kha de na tah hae zemah pawlangria khyh hae; minmin kha na ro hae zemah thuiheinaw kha a vua hae. Mih mae kha lungpi laeze tansakuh hae zah, kithui lan a mya vae hae.

⁴ Te kae nynh, “E hae hynh ryachi hae thua hae zah, nythyanaw hoi khyh hae; Bawipaw laanpi te mih Pachia phung kha nyh khyh hae.

⁵ Alesae hae paw kalan ka cceih cih zah, ka hopah cih hae; minmin nynh Bawipaw laanpi te mih Pachia phung kha a ny ccaccing hae,” ka ci. Thuasalama minmin nynh Pachia kya-e puihnawpaw ccong kha khya hae zah, heenawpaw arui kha a paeku vae hae.

⁶ Tukeiccuze ramkaw e chindeih nynh minmin kha a theih cih hae zah, laesia ram e suizaw nynh a roh cih hae. Kaesing nynh mih khuapi hae kha phang buh zah, khua atolang a poupaw miakaw kha zoihtatyh lan a tei cih hae, pawccecize mih cyiseimenaw tuh myarya lung zah, lungzinaw thyhsan hoi khyh hae.

⁷ Pawtemou nang kha kae ngaethya kho cih? Na ccaaw hae nynh kae kha yn vua hae zah, pachia athua lei hae paw min kha phyate bya a kinku vae hae. Minmin kha phe byn lan looh he ka dang hae tuh, nopi pise seinaw rae hae zah, ohhuanung hae inn khe a sueluakuh hae.

⁸ Minmin tuh thobaleih lan looh dangpaw rangtepaw athungpaw hawte thua hae zah, minmin nynh mih innpaw hae raveih zu kha seikhae rynaw te soihnaw bya a hopya hae.

⁹ E cyisahnaw hanlan minmin kha de ka tah lan khyh hae tou? Hynhcihawpaw minphuin tungvaw khe liarunaw ka thuasah lan khyh tou? cite Bawipaw nynh a ci.

¹⁰ A misu karan hae laku khe po cceihthung lah rotua hae, thuasalama marya thangsah nan; akaran hae tuh Bawipaw kya-e athua khyh keiccuze bae hae.

¹¹ Israel phin te Judah phin hae tuh ka tungvaw papinmaw mih lungzi khyh, cite Bawipaw nynh a ci.

¹² Minmin nynh Bawipaw kong kha ahme lei lante ho hae zah, “Bawipaw nynh pawpaw mah cyih lan khyh. Hoyleinaw nynh oun thuanua lan khyh, thaloi rhaw khyhze ccakannaw kha ah tung lan khyh oh,” a ci hae.

¹³ Profeh hae tuh accakaepaw khivae nynh thua hae, minmin kya Pachia bya um khyh. Minmin nynh a ho hae thyhte mih tungvaw cyi athua cih!

¹⁴ Tukeiccuze Bawipaw , vaaw Pachia nynh hynhte a ho: Minmin nynh e bya a ho hae keiccuze, ka bya kha na khalang kya maee lang ka tangsah cih, e ccungccaw hae hynh maeething lang ka tangsah cih hae zah, maee nynh a u cih hae.

¹⁵ Pou Israel phin, asawnaw e minphuin phuin kheit kha na kalan kae thuakhae cih, cite Bawipaw nynh a ci. Tuh-e tuh athungpaw minphuin, langmawlya te a la um vae paw minphuin, a bya na thaepya leipaw minphuin, a hopaw kha na thaethyapya leipaw minphuin nynh thua.

¹⁶ Mih the bawng tuh shaw ahungkuhpaw te nynh aloku; mih balyn mawte a thungpaw nynh thua hae.

¹⁷ Minmin nynh na thingthae-eccang te na looh kha a ae cih hae; na ccapaw hae te na ccanung hae kha a ae cih hae; na tuu hae te na vaetua hae kha mah a ae cih hae; na misu ku te na thaeku ku hae kha mah a ae cih hae; na doliakupaw khuapi hae akoihkhawkuhpaw kha mah mih thaloi te a roh cih hae.

¹⁸ Thuasalama tuin nin kya heize na thangnaw ccaccing kha ka thuasah loh lan khyh, cite Bawipaw nynh a ci.

¹⁹ Te na ccungccaw hae nynh, “Pawccemou Bawipaw ah Pachia nynh e uccaw hae balyn hynh aening tungvaw a cyi?” cite ae khia hae ze, “Nanning nynh amaw kha na vua oh zah, nae ram kya ramccang pachia hae kha na beik oh, tukeiccuze nae ram athua leipaw ram kyakhe ramccang hae kha rya na lawpah cih oh,” cite na hopah cih hae.

²⁰ Jakob ciihan te Judah ram kya hynhte ho oh lah siakhae oh:

²¹ Mit a hoi hae zemah a muih lei hae paw, nakaring a hoi hae zemah a thae lei hae paw, pou mingaee hae te tuanaw hoi lei hae paw, e hynh ngaetua oh.

²² Kae hynh nae rih khyh oh tou? cite Bawipaw nynh a ci. Ka malang na thyngkuh khyh oh tou? Rili hanlan laesia kha ramri lang ka nung, tuh-e tuh tui nynh a lawe kho leipaw zungzae tynpaw khawtu nynh thua; tuileih atho zemah lawe kho khyh, tuileih nynh a siarua zemah po khung kho khyh.

²³ Thuasalama e ccungccaw hae tuh mih lungkhung zah, dou rynaw thinlung a hoi hae; ccanglang maekuh hae zah a cceih vae hae.

²⁴ Minmin nynh, “Kumvaelori thyhte khuaarawsah zah, khuaatui te hawkhuaa kha amaw accyh thyhte a rawsahpaw, loohrue ccyh kha aening hanlan a tynsahpaw Bawipaw ah Pachia kha rih oh sih,” cite mih thinlung kya cikuh khyh hae.

²⁵ Nae hoyleinaw nynh tuh-e ccyh hae kha pong paleih zah, nae seinaw nynh hoynaw kha phang ae khawpya oh.

²⁶ Pawccecize ccungccaw hoylei hae paw kha ka ccungccaw hae laku a umbua hae; minmin nynh milae hae uccaw kha a luade hae; kaangsyatu hae hawte kaangsya hae zah, ccungccaw hae kha a kyng hae.

²⁷ Pavaw phe abeihpaw awbu hawte mih inn tuh hynhunaw te phe abeih; tukeiccuze minmin tuh alesaepaw te mihoipaw lang a tang hae,

²⁸ mih ngesaw tuh tho zah anae. Hoyleinaw raenaw kya azaw ci nykuh khyh hae; ngawraw hae byathan kha a tae nawlan hae ahmete byapiapah khyh hae, a nyaa hae paw nynh mue lan accan hae paw kha pankhae khyh hae.

²⁹ E cyisahnaw hanlan minmin kha de ka tah lan khyh hae tou? Hynhcihawpaw minphuin tungvaw khe liarunaw ka thuakhae lan khyh tou? cite Bawipaw nynh a ci.

³⁰ Siiku lan umpaw te ri lan umpaw uccaw kha ram lungkhu kya acyihkuh:

³¹ profeh hae nynh ahme leipaw bya kha ho hae zah, ranpibawi hae nynh mah profeh hae bya thyhte a uk hae; ka ccungccaw hae nynh mah tuhcihawpaw tuh a ry hae, thuasalama athangnaw he yn thua te, pawtemou na um cih oh?