JEREMIAH 49 - Zotung Bible 2016

Ammon hae kha Byapianaw

¹ Ammon hae konglang Bawipaw nynh hynhte a ho: Israel nynh ccapaw hae saahkuh khyh tou? Rhoccoutu hoi khyh tou? Athua lanze, pawccemou Milkom pachia nynh Gad ram kha lah zah, amaw a ccungccaw hae nynh Gad ram e khua hae kyakhe a um hae?

² Tukeiccuze Bawipaw nynh a hopaw tuh: Ammon hae khua Rabbah khe rhawtuknaw roi ka ccaesah ccyh tuh solei yn thua cih; Rabbah tuh arohpaw apumkuhpaw lang a tang cih zah, a khua taraw hae tuh maee te soi athua cih hae. Israel kya-e a luade hae paw ram kha Israel nynh bua a lua cih hae zah a lah cih, cite Bawipaw nynh a ci.

³ Pou Heshbon, rawkhuite umtua, pawccecize Ai khua tuh aroh vae! Pou Rabbah ccanung hae, rah oh! Buriboei zingkuh oh, ngaethyate um oh lah, buanawpaw ccungngue khate naemaw toulou kha vaemaw muesaku tua oh! Pawccecize Milkom pachia tuh a ranpibawi hae te a ryalahtu hae ryte a kyng cih hae zah ramccang lang a cciakhae cih hae.

⁴ Pou a lungzi leipaw ccanung, pawccemou na thawzung liate na pooku? Na thawzung tuh athang cciamang vae. Na sisua kha na doliakuh zah, “Hum nynh mou rhaw yn tuk cih?” na ci.

⁵ Vaaw Bawipaw nynh a hopaw tuh: nae pepan um hae paw balyn kyate rinaw kha kae thuakhaepah cih oh, nanning lu kheit cci tuh rangkhirangkhaete na ccue cih oh zah, phiariphiarae ae nung cih oh, rhaw kyate a khyn hae paw kha sueluatu lu kheit san um lan khyh.

⁶ Thuasalama, tukoute tuh Ammon hae kha ka kikhae cih hae, cite Bawipaw nynh a ci.

Edom kha Byapianaw

⁷ Edom ram konglangte Vaaw Bawipaw nynh hynhte a ho: Teman ram kya hawnaw um vae khyh tou? Tuanaw hoi hae paw nynh tuanaw pya vae khyh hae tou? Mih hawnaw tuh azo vae tou?

⁸ Pou Dedan khuaccaaw hae, nulang maeleihkute ccue oh lah, rekuh oh! Esau nynh a tungpaw shethya, detahnaw ccyh kha mih tungvaw ka thuasah cih.

⁹ Misu thae lotu hae nynh nae kalan oun thua hae ze, ccamua kha cciataw khyh hae tou? Miruh hae nynh khuazi oun thua hae ze, a ry hae paw kyalya kha lawkuh khyh hae tou?

¹⁰ Thuasalama Esau a uccaw kha ka khah zah a sasete ka nung, rekunaw hmin a hoi lei lan ciate, a rekunaw hmin kha pong ka langsah. A ciihan hae, a uno hae te a innpaw hae kha ro athua hae; amaw mah um vae khyh.

¹¹ Na ngawraw hae kha cciataw hae, kamaw nynh ka do-oih cih hae; na nomae hae nynh kae kha yn doliakuh hae sah.

¹² Bawipaw nynh hynhte a ho: Banang kha nia lan accan lei hae paw nynh a nia hae ze, nang tuh detahnaw kha na lue cih zawtou? Detahnaw kha na lue lan khyh; tuh-e banang tuh na neih hahe cih.

¹³ Bozrah khua tuh ri lan umpaw, saryapaw te ccungccaw adaepaw khua lang a tang cih zah, thyalaw nawlan a mang cih hae; te a pepan e khua hae balyn tuh ccungccaw adae zungzae cih, cite kamaw ccaccei nynh bya ka kinku, cite Bawipaw nynh a ci.

¹⁴ Bawipaw kyate the ka thae: “Nanning nynh pynkheihlan sueluakuh oh lah, Edom kha tuk oh, rhawtuk khylan, thokuh oh!” cite minphuin hae kalan khe locceihtu kha saw athua vae, a ci.

¹⁵ Nang hynh minphuin hae lakuze adih huapaw lang te ccungccaw hae nynh a theihrya hae paw lang kae rae cih.

¹⁶ Ri lan na umnaw te na lysakunaw thinlung nynh nang kha ae ling vae, nang tuh lungpi akoinaw kya a umpaw te mua ahangnaw kha a reihpekuhpaw nynh na thua. Mosipi hawte ahangnaw khe bu na luaku zemah, tuin kyate nang kha kae sahbung cih, cite Bawipaw nynh a ho.

¹⁷ Edom ram tuh ri lan umpaw lang a tang cih; a pe a cceihpaw miakaw tuh mih ngaeangthua cih zah, aning nynh a tungpaw shethya keiccuze saryanaw roi a sawnua cih hae.

¹⁸ Sodom, Gomorrah te mih pepan e khua hae hawte aroh cih zah, tuin kya khuasahpaw te a umpaw lu kheit san um lan khyh.

¹⁹ Jordan vaw kin thing alungnaw kyate sarangpaw hae rampaeekunaw hae kalan yn cceihthungpaw chindeih hawte, Edom kha ccaring ka dee cih zah, ka popaw kha Edom kya ka nung cih. Pawccecize kae yn lopaw hummou a um? Kae yn ngankuhpaw hummou a um? Ka malang a thadyn nganpaw tuurintu a um tou?

²⁰ Tukeiccuze Bawipaw nynh Edom tungvaw a paccyn nuapaw te Teman ram um hae paw hanlan a eenaw kha thaetua oh: Tuuphu kya-e a nohua hae paw kha ccaring a cciakhae ccaccing cih hae; mih tuukhia kya-e tuu hae tuh mih tungvaw acyihkuhpaw keiccuze a siikuh ccaccing cih hae.

²¹ Minmin a khuliaku hae paw roi keiccuze laephi tuh a hy cih; a sia hae paw roi tuh Rili Se kyate heize thae athua cih.

²² Rhaw tuh cceihthung zah, mosi hawte Bozrah khua kha uingnuakuh zah a sake a dawnua; tuin nin kya Edom rhawkaw hae thinlung tuh neitangia accihpaw nopi hawte athua cih.

Damaskas kha Byapianaw

²³ Damaskas khua konglangte, Hamath te Arpad nynh thethyapaw a thae hae keiccuze phe siikuh hae; rih hae zah mih lungvawsaw, adae kho leipaw rili hawte mih thinphang.

²⁴ Damaskas tuh a thawzya vae, ccue khylan a maeleihkuh vae, a bungzou zah neitangia accihpaw nopi hawte lungriathaenaw te teingnaw nynh a thuanua vae.

²⁵ A minthaanpaw khuapi, lungtuanaw khua tuh vua athua vae ccarei!

²⁶ Tukeiccuze khuapi lungkhu e ccangvae hae tuh khualae e laanpi hae kya a khuliakuh cih hae, tuin nin khe a rhawkaw hae balyn tuh ro athua cih hae, cite vaaw Bawipaw nynh a ci.

²⁷ Damaskas khualungrua kha maee te ka soi cih zah, Benhadad siapharan inn hae kha maee nynh a u cih.

Kedar te Hazor kha Byapianaw

²⁸ Babilon Siapharan Nebukhadnezzar nynh a taepaw Kedar ram te Hazor peenaw hae konglang kha Bawipaw nynh hynhte a ho: Thokuh oh lah, Kedar ram kha ccianua oh! Nithua lang e ccungccaw hae kha roh oh!

²⁹ Mih bu hae te mih tuuphu hae kha thuasah, zokhawpaw mih boei hae te mih uccaw hae balyn kha thuasah luade oh; mih kalauh hae kha mah suekuh oh, “Pawpaw kya balyn ri lanpaw a um,” cite siapah oh.

³⁰ Pou Hazor ram um hae paw, ccue oh, asawnaw lang cceih oh lah, akhunaw hmin kya rekuh oh! Pawccecize Babilon Siapharan Nebukhadnezzar nynh nanning kha rawsete khuakhan zah, ae paccynnuaku vae oh. cite Bawipaw nynh a ci.

³¹ Thokuh oh, koikua te sakoihccaw hoi leite, ngaengante khyndadyh lan a makhaete a umpaw minphuin kha ccianua oh, cite Bawipaw nynh a ci.

³² Mih kalauh hae te mih sahiin phu hae tuh luadepaw lang a tang cih hae. Mih nakalia a ngokuh hae paw kha teitei lang balyn phiariphiarae pong ka nung cih hae zah, hmin takyh kyate shethya kha mih tungvaw ka thuasah cih, cite Bawipaw nynh a ci.

³³ Hazor ram tuh suizaw karung, ccungccaw zungzae adaenaw lang ka tangsah cih zah, tuin kya humhung mah um lan khyh, lu kheit nynh sanmah tuin kya khuasah lan khyh.

Elam kha Byapianaw

³⁴ Zedekiah nynh Judah siapharan lang a tang takaw lyakhe, Elam ram konglangte Bawipaw bya tuh profeh Jeremiah kya yn thua zah,

³⁵ Vaaw Bawipaw nynh hynhte a ho: Elam thawzung kyaze abyapi huapaw a li kha ka khyapah cih;

³⁶ Hmin takyh kyate khisan phuin pali kha Elam lang ka zawsah cih; e khisan hae balyn khate minmin kha phiariphiarae a um lan hae ka mungsah cih hae, kyngte ramccang lang a cciakhae hae paw Elam hae nynh a thuanua lei hae paw ram um lan khyh.

³⁷ Elam hae kha mih rhaw hae malang te mih hiinnaw a ccung hae paw malang khe ka risah cih hae; myarya lepaw ka thinrianaw shethya kha mih tungvaw ka thuasah cih, cite Bawipaw nynh a ci. Minmin kha ka maemih makhia hae, mih nulangte thaloi ka sawnua cih hae;

³⁸ Ka bawitungkhung kha Elam ram kya ka nung cih zah, mih siapharan te mih bawi hae kha ka roh cih hae, cite Bawipaw nynh a ci.

³⁹ Thuasalama Elam kha nyalang ccyh kya ka kikhae thui cih, cite Bawipaw nynh a ci.