JEREMIAH 47 - Zotung Bible 2016

Filistin hae kha Byapianaw

¹ Faro nynh Gaza a tuk mawze, Filistin hae konglangte profeh Jeremiah kya yn thuapaw Bawipaw bya tuh hynhte nynh thua:

² Bawipaw nynh hynhte a ho: Dotua, palung langte tui yn le cih zah, paepae leikuhpaw tui alepaw lang yn tang cih; tui alepaw nynh ram pynpi te ram lungkhu umpaw balyn kha thuasah, khuapi te tuin kya um hae paw kha thuasah pong avu cih hae. Ccungccaw hae tuh a sia a rua cih hae zah, ram lungkhu um hae paw balyn tuh rawkhuite a um cih hae.

³ Mih marang hae ccukoh roi, mih marangle hae amiakuhpaw roi, marangle accu hae amiakuhpaw roi keiccuze nungpaaw hae kuih tuh a thawzya keiccuze, ccaaw hae kha kinua vae khyh hae,

⁴ pawccecize Filistin hae balyn kha ronaw ccyh te Tair te Sidon khua kyate a laehypaw bawmtu miakaw kha ronaw ccyh tuh yn thua cih. Pawccecize Bawipaw nynh Filistin hae te a laehypaw Kaftor tuikoih kya-e hae kha a roh cih hae.

⁵ Gaza tuh a lu phe o lan a sang ngo athua vae, Ashkelon hae tuh zya adae vae hae. Pou a laehypaw Filistin hae! Hohseciamou naemaw toulou kha vaemaw na muesakuh ung cih oh?

⁶ Pou Bawipaw thaloi! Hohseciamou dae leite na um ung cih? Na thaloibu lungkhu lang sangkuh lah, daetedae lan umtua!

⁷ Ashkelon khua te rili kin um hae paw kha rawsete Bawipaw nynh kaw a pya vae keiccuze pawtemou daebabi lan a um kho cih? Tuh-e tuh cyi khylan Bawipaw nynh rya phe a naw vae.