JEREMIAH 4 - Zotung Bible 2016

¹ Bawipaw nynh a hopaw tuh: Pou Israel, nae ki ze, ka kalan nae ki cih. Na kya-e anungsikuh hae paw kha ka malang te na vua zah, na cciasei khyh ze thuasah,

² “Bawipaw tuh a hiin thyhte!” cite byaccing te, byading te dingnaw khate bya na kinku ze thuasah minphuin hae tuh tuh-e Pachia liate hythua a ccou cih hae zah, tuh-e Pachia liate a pookuh cih hae, a ci.

³ Judah hae te Jerusalem um hae paw kalan Bawipaw nynh hynhte a ho: Athuekuh boi leipaw lei kha thue oh, hinpaw hae laku khe ccacii kha vua nan oh.

⁴ Pou Judah hae te Jerusalem um hae paw, Bawipaw hanlan vingdungawkuh oh lah, nae thinlung vingdung kha awkuh oh, tuhkhyhze tuh na rae oh paw hoyleinaw keiccuze ka thinrianaw tuh maee lang arua cih zah, humhung nynh mah the kho lei lan ciate arua cih.

Judah kha Rhawthiingnaw

⁵ Judah ram kya te Jerusalem kyakhe siatua oh: Ram pynpi balyn kya mungkae tuu oh; “Pynkheihlan sueluakuh oh sih lah, rhawlungrua akoihkuhpaw khuapi hae kalan tee oh sih!” cite siatua oh.

⁶ Zion lang ccianaw laanpi a muihsahpaw alan kha saetua oh, khyn khylan ccuetua oh, nae thysung nan sah, pawccecize hoyleinaw te myarya lepaw ronaw kha thahlang te kae thuakhae cih.

⁷ Chindeih tuh a umnaw thabu kyate yn pou vae, minphuin hae a rohtu tuh yn cceih vae; nae ram kha ccungccaw adaenaw ram lang rae khylan a umnaw kyate yn pou vae; nae khuapi hae tuh ccungccaw um lei lan ciate aroh cih.

⁸ E keiccuze buriboei kha zingkuh oh lah, ngaethyate rah oh: “Bawipaw thinrianaw myarya lepaw tuh aening kyate maekuh khyh,” cite rah oh.

⁹ Tuin nin kya tuh siapharan te a kuihkaw e bawi hae tuh mih rawthah cih; ranpibawi hae tuh a siikuh cih hae zah, profeh hae tuh myarya mih ngaeangthua cih.

¹⁰ Tetuh kae nynh, “Pou Bawipaw PACHIA, thaloi kha mih nging kya phang nungde athua lya heize, ‘Nae kya daenaw a um cih,’ cite na ho zah, e ccungccaw hae te Jerusalem kha ccadya na ling vae hae!” ka ci.

¹¹ Tuin ccyh lyakhe e ccungccaw hae te Jerusalem khuaccaaw hae kha hynhte hopya athua cih hae: Asopaw khisan tuh ramkaw e ahangnaw hmin kyate ka ccungccaw ryachi hae kalan azaw; tuh-e khisan tuh vaekang mungsah khylan thua khyh, thyaasah nawlan mah thua khyh.

¹² Tuh-e khisan laeze a thawsaepaw khisan tuh Bawipaw kyate yn thua cih. Atu minmin kha bya ka pia cih hae.

¹³ Dotua! Rhaw tuh maeking hawte yn thua cih zah, rhaw a marangle hae tuh khiccung hawte yn thua cih hae; a marang hae tuh mosi laeze aranghua hae, aening hanlan ngaethya lan kou um, pawccecize ro ah thua vae oh!

¹⁴ Pou Jerusalem, khum na thua nawlan, na thinlung kya-e hoyleinaw kha thyaasahku tua. Ahoy leipaw na paccynkunaw kha na lungkhu kya hohseciamou a um ung cih?

¹⁵ Dan ram kyate roi roikheit yn ccae zah, Efraim Mua kyate shethya kong kha a siakhae.

¹⁶ “E kya rhaw hae a um hae!” cite minphuin hae kha hopah hae. Jerusalem kha rawsete, “Rhaw hae tuh asawnaw kyate oun thua hae zah, Judah ram e khuapi hae kha a sianua hae.

¹⁷ Loo a ngaw hae paw hawte, rhaw hae nynh Judah kha a koihlu vae hae, pawccecize Judah nynh kae kha yn rawse vae, cite Bawipaw nynh a ci.

¹⁸ Na umtu te na cyisahnaw nynh e hynh na tungvaw a thuakhae vae. E hynh na ronaw nynh thua; pawcih baban mou acci! Tuh-e tuh na bung lungkhu lang phe athua vae,” a ci.

Arohpaw Ram hanlan Ngaethyanaw

¹⁹ Ka thin tuhlou, ka thin tuhlou! Ccinaw keiccuze ka khang ka tua khyh! Ka thinlungcci tuhlou! Ka bung tuh thawte asohkuh; “Daebabi lan ka um kho khyh; pawccecize rhaw roi, mungkae roi kha ka thae.

²⁰ Shethya ccangkheit koute ccangkheit yn thua, ram pynpi tuh aroh. Ka bu hae tuh vaekheihmawte aroh hae, zokhawpaw ka boei hae tuh sosoh taraw kya aroh hae.

²¹ Hohseciamou alan kha ka muih ung cih zah, mungkae roi kha ka thae ung cih?

²² “Ka ccungccaw hae tuh a ngaee hae, kae kha yn nyh khyh hae; minmin tuh angaeepaw ccaaw thua hae zah, nythyanaw hoi khyh hae. Minmin tuh ahoy leipaw kha myarya raethya hae, thuasalama ahoypaw kha pawtemou rae lan cipaw nyh khyh hae.”

²³ Laephi kha ka do zah pawpaw mah um leite accawnghan; vaawlui kha mah ka do zah awnaw um khyh.

²⁴ Mua hae kha ka do zah ahy hae, sangpyng balyn tuh hebung hethung a hekuh hae.

²⁵ Ka do zah ccungccaw lu kheit san um khyh, vaawlang e pavaw balyn tuh a zou vae hae.

²⁶ Ka do zah looh voipaw ram tuh laesia ram lang tang zah, khuapi balyn tuh Bawipaw malang aroh hae, myarya a thinrianaw malang khe aroh hae.

²⁷ Bawipaw nynh hynhte a ho: Ram pynpi tuh aroh cih; tuhzemah athangnaw ccaccing tuh ka thuasah lan khyh.

²⁸ E keiccuze laephi tuh a rah a khui cih zah, vaawlang e vaawlui tuh aman cih; ka ho vae paw te ka paccyn vae paw thua zah, ka ngaesikuh lan khyh, ka thinlung mah paleihkuh lan khyh.

²⁹ Marang rhawkaw hae te li rhawkaw hae siho keiccuze khua miakaw tuh a ccue hae; ramkaw lang a ccue hae; lungpi hae kalan a kae hae; khua hae balyn kha ccuetaw thua hae zah, tuin kya ccungccaw lu kheit san um khyh.

³⁰ Pou a lanmepaw nang, boei sepaw kha zingkute ccaankunawpaw sui te na ccaankuh zah, na mit kha thuhkuhpaw si na thuhkuhpaw hynh paw suilan mou athua? Alakaw lan na ccaanku. Na sungsah hae paw nynh nang kha ae dothatheih hae zah, na hiinnaw kha chia lan ae ccung hae.

³¹ Neitangia accihpaw nopinung roi hawte siaruanaw roi, ccatawccaw a saahpaw nopinung roi hawte teingnaw roi kha ka thae, tuh-e tuh a hysue a vawsawkhaekuhpaw Zion ccanung a rawnaw roi nynh thua, a kuih kha dyng zah, “Ka hanlan ngaethya lan kou um! Kae tuh ccungccaw theihtu hae malang ka thawthang!” a ci.