JEREMIAH 23 - Zotung Bible 2016

Ramccang lang Deeku koute Kithuinaw

¹ Bawipaw nynh a hopaw tuh: Ka ramnonaw kya-e ka tuu hae kha phiariphiarae nung hae zah a roh hae paw tuurin hae hanlan ngaethya lan kou um!

² Tukeiccuze ka ccungccaw hae kha a rintu hae tuurin hae te asekuh lante Bawipaw , Israel Pachia nynh hynhte a ho: Nanning nynh ka tuuphu hae kha phiariphiarae na nung oh zah, ccanglang ccaring na dee oh, minmin kha hoyte na do-oih khyh oh. Tukeiccuze ahoy leipaw nae cyisahnaw hanlan de kae tah cih oh, cite Bawipaw nynh a ci.

³ Te minmin ka deenaw hae ram balyn kyate ka tuuphu kya-e a laehy hae paw kha ka suelua cih hae zah, mih tuukhia langkhe ka kikhae cih hae, te a pungzae cih hae zah a lungthung cih hae.

⁴ Minmin a rin cih hae paw tuurin hae kha ka nungpah cih hae zah, rinaw, siikunaw te zonaw papin tung vae lan khyh hae, cite Bawipaw nynh a ci.

Adingpaw David Ciihan

⁵ Bawipaw nynh a hopaw tuh: David hanlan adingpaw Ciihan kha he ka langsakuh te, aning nynh hawnaw te a ukpaw siapharan hawte a uk cih zah, ram lungkhu kya byading te dingnaw kha a rae ccyh tuh solei yn thua cih.

⁶ Aning ccyh kyakhe Judah tuh khum athua cih zah, Israel tuh khyndadyh lan a um cih. A min kha, “Bawipaw tuh aening dingnaw nynh thua,” cite ko athua cih.

⁷ Tukeiccuze Bawipaw nynh a hopaw tuh: “Israel hae kha Izip ram kyate a poukhae hae paw Bawipaw tuh a hiin,” cite ho lei vae te,

⁸ “Palung lang e ram kyate thuasah, aning nynh minmin a deenaw hae ram balyn kyate thuasah Israel phin hae kha poukhae hae zah a cciakhae hae paw Bawipaw tuh a hiin,” cite a ho ccyh hae tuh solei yn thua cih. Tetuh mih ram kyakhe a um cih hae.

Lingthya Profeh hae Seisahnaw

⁹ Profeh hae te asekuh lante: Ka lungkhu kya ka thinlung phe koi zah, ka ru hae balyn tuh a thyngkuh hae; Bawipaw keiccu thuasah, athyaapaw a bya keiccu thuasah kae tuh aruipaw hawte ka thua zah, misutui nynh a taepaw hawte nynh ka thua.

¹⁰ Pawccecize ram tuh nopi pise ohhuakunaw te phe abeih; thyalawnaw keiccuze ram tuh rawkhuite um zah, ramkaw e ramnonaw hae tuh karae arou. Mih laanpi tuh hoyleinaw thua zah, mih thungnaw tuh ahme leipaw nynh thua.

¹¹ Profeh hae te ranpibawi hae tuh parouh mawte Pachia kha pawlangria khyh hae; ka inn kya heize mih hoyleinaw kha ka muih vae, cite Bawipaw nynh a ci.

¹² Tukeiccuze mih laanpi tuh mohnaw kya-e nawpalaepaw laanpi hawte nynh thua, tuh-e laanpi langkhe dee athua cih hae zah a khuliakuh cih hae; pawccecize minmin detah kum khe mih tungvaw shethya ka thuasah cih, cite Bawipaw nynh a ci.

¹³ Samaria ram e profeh hae tungvaw kya anungsikuhpaw uccaw kha ka muih: Baal min liate profehbya ho hae zah, ka ccungccaw Israel hae kha a cciakhaesei hae.

¹⁴ Jerusalem profeh hae tungvaw kya siiku lan a um huapaw uccaw kha ka muih vae: nopi pise ohhuakunaw rae hae zah a hyn a hu hae; hoyleinaw a rae hae paw kha lu kheit nynh sanmah hoyleinaw kyate a maeleihku khyh nawlan hae, thawzung a pya hae; mih balyn mawte kae ka hanlan Sodom khua hawte thua hae zah, Jerusalem khuaccaaw hae tuh Gomorrah khua hawte nynh athua hae.

¹⁵ Tukeiccuze tuh-e profeh hae te asekuh lante vaaw Bawipaw nynh hynhte a ho: “Minmin kha eccangkary ka aesah cih hae zah, chi sii thungkuhpaw tui kha ka niasah cih hae; pawccecize Pachia pawlangria leinaw tuh Jerusalem profeh hae kyate ram pynpi kya a pazaekuh vae,” a ci.

¹⁶ Vaaw Bawipaw nynh hynhte a ho: Nanning kya profehbya a ho hae paw profeh hae bya kha ngae nan oh; minmin nynh nanning kha ae ling oh. Bawipaw khalang kyate apou leipaw, mih tuanaw kya-e vizin kha ae hopya oh.

¹⁷ Bawipaw bya pawlangria lei hae paw kalan khe, “Nae kya hoynaw a um cih,” a cipya hae; mih lungkhung thyhte a um hae paw kyakhe, “Nae tungvaw shethya thua lan khyh,” a cipya hae.

¹⁸ Minmin lakuze Bawipaw bya kha muih khylan te thae khylan, a khuakhannaw kya hummou a umbua? Bawipaw bya phy khylan hummou a bya kha a peki?

¹⁹ Bawipaw khise khuh dotua! Thinrianaw tuh apou, athawsaepaw khiccung thua zah, ccungccaw hoylei hae paw mih lu vawlan khe thawte a khia cih.

²⁰ Bawipaw nynh a tuapaw a paccynnaw kha ccingsah te a thangsah mawlaezung a thinrianaw tuh dae lan khyh. Nyalang ccyh kya nanning nynh ccaerarih lan nae thaethya cih oh.

²¹ Kae nynh ka saw lei hae pite profeh hae tuh a ccue hae; kae nynh ka hopah lei hae pite profehbya kha a ho hae.

²² Thuasalama ka khuakhannaw kya a thadyn hae lanze, ka ccungccaw hae kalan ka bya kha a ho cih hae zah, ahoy leipaw mih laanpi kyate thuasah, ahoy leipaw mih cyisahnaw kyate thuasah a maeleihsakuh cih hae.

²³ Kae tuh anaenaw kyalya a umpaw Pachia tou ka thua? Asawnaw kya mah a umpaw Pachia ka thua khyh tou?

²⁴ Ka muih kho lei lan ciate muih leinaw kya a rekuh khopaw hummou a um? cite Bawipaw nynh a ci. Vaaw te lae kya pong ka um khyh tou? cite Bawipaw nynh a ci.

²⁵ “Maan ka sah vae, maan ka sah vae!” cite ka min te hynbya a ho hae paw profeh hae bya kha ka thae vae.

²⁶ Hynbya a ho hae paw te mih thinlung kya-e lingnaw bya a ho hae paw e profeh hae thinlung hynh hohseciamou paleihku leite a um cih?

²⁷ Mih minpaaw hae nynh Baal keiccuze ka min kha a ning hae hawte, lu kheit te lu kheit a hoku hae paw mih maan khate ka ccungccaw hae nynh ka min kha ning hae sah cite a paccyn hae.

²⁸ Maan a sahpaw profeh nynh a maan kha ho sah, thuasalama ka bya a hoipaw nynh ka bya kha lungzite ho sah. Ccatanphue tuh chanvuih te pawmou asekuh? cite Bawipaw nynh a ci.

²⁹ Ka bya tuh maee te lokuh khyh tou? Lung kha zoihtatyh lan a koisahpaw khynlyng te lokuh khyh tou?

³⁰ Tukeiccuze lu kheit te lu kheit ka bya a rupakuh hae paw profeh hae kha ka rawse hae, cite Bawipaw nynh a ci.

³¹ Mimaw munglae nynh a hopaw bya kha, “Bawipaw nynh a ho,” cite a hothya hae paw profeh hae kha ka rawse hae, cite Bawipaw nynh a ci.

³² Hynhupaw maan kha ho hae zah, hynbya te accakaepaw mih bya khate ka ccungccaw hae kha a cciakhaesei hae paw profeh hae kha ka rawse hae, cite Bawipaw nynh a ci; minmin kha ka saw khyh hae, ryalaw mah ka naw khyh hae; tukeiccuze minmin tuh e ccungccaw hae hanlan papin thane khyh hae, cite Bawipaw nynh a ci.

³³ E ccungccaw hae nynh thuasah, profeh nynh thuasah, ranpibawi nynh thuasah, “Bawipaw kya-e phupaw ripaw tuh pawmou athua?” cite ae khia hae ze, minmin kha, “Nanning hynh phupaw ripaw na thua oh zah, ccaring kae vua cih oh, cite Bawipaw nynh a ci,” cipaw kha na hopah cih hae.

³⁴ Profeh nynh thuasah, ranpibawi nynh thuasah, e ccungccaw hae laku e lukhakheit nynh thuasah, “Bawipaw kya-e phupaw ripaw nynh thua,” cite a ho lanze, amaw te a innbyn kha de ka tah cih hae.

³⁵ Naemaw lu kheit te lu kheit laku kya, “Bawipaw nynh pawtemou bya a khungru?” tuhkhyhze, “Bawipaw nynh pawtemou a ho?” cite bya na khiakuh cih oh.

³⁶ “Bawipaw kya-e phupaw ripaw,” cite na ho vae lan khyh oh, pawccecize tuhte bya a hopaw tuh amaw hanlan phupaw ripaw athua ccaccing cih, tuhte na ho oh ze, a hiinpaw Pachia, vaaw Bawipaw , ah Pachia bya kha na ro vae oh.

³⁷ “Bawipaw nynh pawtemou ae khungru?” tuhkhyhze “Bawipaw nynh pawtemou a ho?” cite profeh kha na khia cih.

³⁸ Thuasalama, “Bawipaw kya-e phupaw ripaw,” cite na ho oh zetuh, Bawipaw nynh hynhte a ho: “Bawipaw kya-e phupaw ripaw,” cite na ho lan khyh oh, mang kae cipah oh pite, “Bawipaw kya-e phupaw ripaw,” cite na ho oh keiccuze,

³⁹ kae hang ccaccing cih oh zah, naemaw kha thuasah, nanning te nae minpaaw hae kae pya oh paw khuapi kha thuasah ka kyate ccaring kae vua cih oh.

⁴⁰ Ning kho ung leipaw zungzae thethyanaw te zungzae maethyanaw kha nae tungvaw ka ccawsah cih.